ເມືອງກາສີ ເຊື່ອມຊຶມນິຕິກຳການປ່ອນບັດເລືອກຕັ້ງສະມາສິກສະພາ

  ກອງປະຊຸມເຊື່ອມຊຶມນິຕິກຳກ່ຽວກັບການກະກຽມການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະມາຊິກສະພາປະຊາຊົນແຂວງວຽງຈັນຊຸດທີ II ໄດ້ຈັດຂຶ້ນໃນວັນທີ 29 ທັນວາ 2020 ທີ່ສະໂມສອນເມືອງກາສີ ພາຍໃຕ້ການເປັນປະທານຮ່ວມຂອງທ່ານ ສີທົນ ແສງພະຈັນ ເຈົ້າ ເມືອງກາສີ ແລະທ່ານ ບຸນເພັງ ສາຍນໍລະດີ ສະມາຊິກສະພາແຫ່ງຊາດປະທານສະພາປະຊາຊົນແຂວງວຽງຈັນ, ມີບັນດາຄະນະປະຈຳ-ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ຫົວ ໜ້າກຸ່ມບ້ານພ້ອມດ້ວຍຄະນະຮັບຜິດຊອບໜ່ວຍປ່ອນບັດເລືອກຕັ້ງຢູ່ເມືອງກາສີເຂົ້າຮ່ວມ.

 ໃນກອງປະຊຸມໄດ້ເຊື່ອມຊຶມບັນດາເນື້ອໃນເອກະສານທີ່ສຳຄັນ 4 ເອກະສານປະກອບມີ: ມະຕິຂອງກົມການເມືອງສູນກາງພັກສະບັບເລກທີ 118/ກມສພ,ລົງວັນທີ 7 ກັນຍາ 2020 ວ່າດ້ວຍ: ການເພີ່ມທະວີການຊີ້ນຳ-ນຳພາຂອງຄະນະພັກຕໍ່ການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະມາຊິກສະພາປະຊາຊົນແຂວງຊູດທີ II ຊຶ່ງສະເໜີໂດຍທ່ານ ສີທົນ ແສງພະຈັນ ເຈົ້າເມືອງໆກາສີ, ເອກະສານເສີມຂະຫຍາຍສິດເປັນເຈົ້າຂອງປະຊາຊົນເຂົ້າໃນການເລືອກຕັ້ງສະມາຊິກສະພາແຫ່ງ ຊາດຊຸດທີ IX ແລະສະມາຊິກສະພາປະຊາຊົນແຂວງຊຸດທີ II ສະເໜີໂດຍທ່ານ ແພງຄຳ ຈັນທະມຸງຄຸນ ຮອງເລຂາພັກເມືອງປະທານກວດກາພັກ-ລັດເມືອງ, ເອກະ ສານການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນຂັ້ນແຂວງຊຸດທີ II ສະເໜີໂດຍທ່ານ ອໍາໄພ ໂສລັດ ຕະນະວົງ ຮອງເລຂາພັກເມືອງພ້ອມນັ້ນທ່ານ ບຸນມີ ບົວລິວັນ ຄະນະປະຈຳພັກເມືອງປະທານແນວລາວສ້າງຊາດເມືອງຍັງໄດ້ຂື້ຜ່ານຂໍ້ຕົກລົງຂອງທ່ານເຈົ້າເມືອງກາສີວ່າດ້ວຍການແຕ່ງຕັ້ງຄະນະກຳມະ ການເລືອກຕັ້ງຂັ້ນເມືອງ; ອະນຸກຳມະການເລືອກຕັ້ງຂັ້ນເມືອງ ແລະຂໍ້ຕົກລົງແຕ່ງຕັ້ງຫົວໜ້າໜ່ວຍປ່ອນບັດເລືອກຕັ້ງປະຈຳຢູ່ເມືອງກາສີ.

  ທ້າຍກອງປະຊຸມທ່ານ ບຸນເພັງ ສາຍນໍລະດີ ປະທານສະພາປະຊາຊົນແຂວງວຽງຈັນໄດ້ເນັ້ນໜັກໃຫ້ຄະນະກໍາມະການເລືອກຕັ້ງຂັ້ນເມືອງເອົາໃຈໃສ່ໃນການນຳເອົາບັນດາເອກະສານ, ນິຕິກຳຕ່າງໆທີ່ຕິດພັນກັບການເລືອກຕັ້ງລົງໄປເຜີຍແຜ່ໃຫ້ພໍ່ແມ່ປະຊາຊົນບັນດາເຜົ່າໄດ້ຮັບຮູ້ ແລະເຂົ້າໃຈຢ່າງເລິກເຊິ່ງເຖິງຖອງໃຫ້ຮັບຮູ້ພາລະບົດບາດຂອງສະພາແຫ່ງຊາດ ແລະສະພາປະຊາຊົນຂັ້ນແຂວງ ໂດຍ ສະເພາະແມ່ນຄວາມຕື່ນຕົວເຂົ້າຮ່ວມໃນການໃຊ້ຊິດປ່ອນບັດເລືອກຕັ້ງ, ຄະນະກໍາມະການຂັ້ນເມືອງຕ້ອງໄດ້ກັບນົດໜ່ວຍປ່ອນບັດເລືອກຕັ້ງໃຫ້ລະອຽດເກັບກຳລາຍຊື່ຜູ້ທີ່ມີສິດປ່ອນບັດໃຫ້ຊັດເຈນຕາມຕົວເລກຜູ້ທີ່ມີໜ້າຕົວຈິງ ແລະບັນດາຂໍ້ຫ້າມຕ່າງໆໃນການເລືອກຕັ້ງພ້ອມນັ້ນ ທ່ານຍັງຮຽກຮ້ອງມາຍັງຄະນະພັກ, ອົງການປົກຄອງເມືຶອງ ແລະພໍ່ແມ່ປະຊາຊົນພາຍໃນເມືອງກາສີຈົ່ງເຫັນໄດ້ຄວາມສຳຄັນຂອງວຽກງານດັ່ງກ່າວ ແລະປະກອບສ່ວນເຮັດໃຫ້ການປ່ອນບັດເລືອກຕັ້ງຄັ້ງນີ້ກາຍເປັນປາງບຸນໃຫຍ່ຂອງຊາດໃຫ້ດຳເນີນໄປດ້ວຍບັນຍາກາດເບີກບານມ່ວນຊື່ນ, ມີປະຊາທິປະໄຕ, ຖືກ ຕ້ອງຕາມກົດໝາຍ ແລະຮັບປະກັນໃຫ້ໄດ້ຕາມ 4 ຄາດໝາຍຄື: 1) ຜູ້ມີສິດປ່ອນບັດຕື່ນຕົວສະໝັກໃຈໄປໃຊ້ສິດເລືອກຕັ້ງ 100%; 2) ຮັບປະກັນບໍ່ໃຫ້ມີບັດຕາຍ 100%; 3) ແຕ່ລະໜ່ວຍປ່ອນບັດ ແລະເຂດເລືອກຕັ້ງຕ້ອງຮັບປະກັນໃຫ້ມີຄວາມສະຫງົບປອດໄພໃນວັນເເລືອກຕັ້ງ 100% ; 4) ຮັບປະກັນໃຫ້ມີຄວາມວ່ອງໄວທັນກັບເວລາ 100%.

-----------

ຂ່າວ: ເມືອງກາສີ 

แชร์