ຍີ່ປຸ່ນຊ່ວຍ 114,6 ຕື້ກີບ ປັບປຸງໂຮງຮຽນ 4 ແຂວງ

  ເຊົ້າວັນທີ 30 ທັນວາ 2020 ຜ່ານມາພະແນກສຶກສາທິການ ແລະກີລາແຂວງສະຫວັນນະເຂດໄດ້ຈັດພິທີມອບ-ຮັບໂຄງການປັບປຸງສະພາບແວດລ້ອມຂອງໂຮງຮຽນມັດທະຍົມສຶກສາໃຫ້ແກ່ 4 ແຂວງພາກກາງ ແລະພາກໃຕ້ທີ່ເດີ່ນໂຮງຮຽນ ມສ ພີນ ເມືອງອຸທຸມພອນ ໃຫ້ກຽດເປັນປະທານໃນພິທີໂດຍທ່ານ ນາງ ແສງເດືອນ ຫຼ້າຈັນ ທະບູນ ລັດຖະມົນຕີກະຊວງສຶກສາທິການ ແລະກີລາ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ທາເກວາກະ ເຄໂຊ ເອກອັກຄະຣາຊະທູດຜູ້ມີອໍານາດເຕັມແຫ່ງປະເທດຍີ່ປຸ່ນປະຈໍາລາວ, ທ່ານ ໂຢຊິ ຮາຣຸໂຢເນຢາມະມີ ຫົວໜ້າໂຄງການໄຈກາປະຈໍາ ລາວ, ບັນດາຕົວແທນຈາກແຂວງຄໍາມ່ວນ, ສາລະວັນ ແລະ  ແຂວງຈໍາປາສັກພ້ອມດ້ວຍພະນັກງານທີ່ກ່ຽວຂ້ອງ, ຄູ-ອາຈານ ແລະນັກຮຽນເຂົ້າຮ່ວມ.

  ໃນໂອກາດນີ້, ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດຫົວໜ້າພະແນກສຶກສາທິການ ແລະກີລາແຂວງກໍ່ໄດ້ລາຍງານຜົນຂອງການກໍ່ສ້າງໂຄງໂຮງຮຽນມັດທະຍົມຢູ່ແຂວງພາກກາງ ແລະພາກໃຕ້ຊຶ່ງໃຫ້ຮູ້ວ່າ: ລັດຖະບານ ສປປ ລາວ ໄດ້ຮັບທຶນຊ່ວຍເຫຼືອລ້າຈາກລັດຖະບານຍີ່ປຸ່ນຈໍານວນ  1.415 ລ້ານເຢນ ຫຼື 12,46 ລ້ານໂດລາ (114,6 ຕື້ກີບ) ເພື່ອປັບປຸງສະພາບແວດລ້ອມຂອງໂຮງຮຽນມັດທະຍົມໃນ 4 ແຂວງພາກກາງ ແລະພາກໃຕ້ຄື: ແຂວງສະຫວັນນະເຂດ, ຄໍາມ່ວນ, ສາລະວັນ ແລະແຂວງຈໍາປາສັກ.

  ໂຮງຮຽນທີ່ນອນໃນບູລິມະສິດເປົ້າໝາຍຂອງໂຄງການໃນ 4 ແຂວງນີ້ລວມມີທັງໝົດ 37 ແຫ່ງ, ໃນນີ້ມີຫ້ອງຮຽນ 238 ຫ້ອງ, ຫ້ອງການຄູ 9 ຫ້ອງ, ຫ້ອງລວມ 4 ຫ້ອງ, ຫໍສະໝຸດ ແລະຫ້ອງເກັບເຄື່ອງ 28 ຫ້ອງ, ຫ້ອງນໍ້າ 144 ຫ້ອງ, ກະດານດໍາ251 ແຜ່ນ, ເຟີນີເຈີ້, ຕິດຕັ້ງລະບົບໄຟຟ້າ ແລະອື່ນໆ.

   ການດໍາເນີນໂຄງການແບ່ງອອກເປັນ 2 ໄລຍະຄື: ໄລຍະທີ 1 ແມ່ນເລີ່ມດໍາເນີນຢູ່ແຂວງສາລະວັນ ແລະແຂວງຈໍາປາສັກໃຊ້ເວລາກໍ່ສ້າງ 10  ເດືອນ ແລະໄລຍະທີ 2 ແມ່ນດໍາເນີນການກໍ່ສ້າງຢູ່ແຂວງສະຫວັນນະເຂດ ແລະແຂວງຄໍາມ່ວນຕາມແຜນແມ່ນໃຊ້ເວລາກໍ່ສ້າງ 10 ເດືອນ ແຕ່ເນື່ອງດ້ວຍເກີດການແຜ່ລະບາດໜັກຂອງພະ ຍາດໂຄວິດ-19 ຈຶ່ງເຮັດໃຫ້ການກໍ່ສ້າງຫຼ້າຊ້າເປັນ 12 ເດືອນ ຈຶ່ງສໍາເລັດຜົນ.

  ໂອກາດດຽວກັນນີ້, ບັນດາຄະນະປະທານ, ແຂກທີ່ຖືກເຊີນ, ພະນັກງານ, ຄູ-ອາຈານ, ພາກສ່ວນທີ່ກ່ຽວຂ້ອງກໍ່ໄດ້ຮ່ວມກັນຕັດແຖບຜ້າ ແລະປ່ອຍໝາກປຸ້ມເປົ້າເປີດງານຢ່າງເປັນທາງການ.

------------

ຂ່າວ: ສະຫວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์