ທ່ອງທ່ຽວພິຊິດຍອດພູເບ້ຍຄຶກຄັກລັດຖະມົນຕີປະຈຳສຳນັກງານນາຍົກ ຂື້ນຢ້ຽມຊົມ

 ທ່ານ ຈະເລີນ ເຢຍປາວເຮີ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂຄສົກລັດຖະບານພ້ອມດ້ວຍຄະນະໄດ້ຂຶ້ນທ່ອງທ່ຽວພິຊິດຍອດພູເບ້ຍຢູ່ແຂວງໄຊສົມບູນ ໃນວັນທີ 3 ມັງກອນ 2021 ໂດຍການນຳພາຂອງ ທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ ແລະ ທ່ານ ຄຳໄພ ສົມຊະນະ, ປະທານບໍລິສັດ ກຸ່ມຄຳໄພ ຊະນະຈຳກັດຜູ້ດຽວ ພ້ອມດ້ວຍພາກສ່ວນພາຍໃນແຂວງໄຊສົມບູນ ແລະເມືອງອະນຸວົງ ເຂົ້າຮ່ວມຂະບວນການຢ່າງຫຼວງຫຼາຍ.

 ທ່ານ ຄຳໄພ ສົມຊະນະ ກ່າວວ່າ: ສຳລັບການຂຶ້ນພິຊິດຍອດພູເບ້ຍຂອງຄະນະທີ່ມາຈາກສຳນັກງານນາຍົກລັດຖະມົນຕີຄັ້ງນີ້ຜູ້ເຂົ້າຮ່ວມຂະບວນການໄດ້ທ່ຽວຊົມທິວທັດທຳມະຊາດອັນງົດງາມ ແລະອະລັງການຂອງພູເບ້ຍທີ່ໄດ້ກຳນົດໄວ້ຕາມຈຸດຕ່າງໆດ້ວຍຄວາມປະທັບໃຈທີ່ສຳຄັນຂະບວນການໄດ້ຂຶ້ນພິຊິດເຖິງເປົ້າໝາຍສູງສຸດກໍຄືຍອດພູເບ້ຍຢ່າງສະຫງ່າຜ່າເຜີຍຊຶ່ງເປັນຍອດພູທີ່ມີຄວາມສູງອັນດັບໜຶ່ງຂອງ ສປປ ລາວ ໂດຍມີຄວາມສູງຈາກລະດັບໜ້ານໍ້າທະເລ 2.820 ແມັດ ຊຶ່ງໄດ້ຮັບຂະໜານນາມວ່າ: ຫຼັງຄາຂອງປະເທດລາວ.

   ພ້ອມນີ້ພູເບ້ຍຍັງຖືກອ້ອມຮອບໄປດ້ວຍຕົ້ນໄມ້ທີ່ຖືກຫຸ້ມຫໍ່ດ້ວຍຂົນທີ່ມີຄວາມສວຍງາມເປັນພິເສດ ແລະໜ້າອັດສະຈັນເມື່ອໄດ້ເຫັນ, ນອກນີ້ຈຸດເດັ່ນທີ່ສຳຄັນອີກຢ່າງໜຶ່ງຂອງພູເບ້ຍກໍຄືຫີນສີລານໍແຮດລ້ານປີທີ່ພົ້ນໂກໂລ່ສູງເດັ່ນເທິງຍອດພູເບ້ຍ ແລະທີ່ຫາຊົມໄດ້ຍາກມີແຫ່ງດຽວໃນລາວຄື: ຕົ້ນດອກກຸຫຼາບລ້ານປີ ແລະຈຳປາລ້ານປີທີ່ເກີດຂຶ້ນຕາມທຳມະຊາດເທິງຍອດພູຢ່າງສວຍງາມຕະການຕາໂດຍມີມ່ານໝອກປົກຄຸມຕະຫຼອດເວລາເຮັດໃຫ້ບັນຍາກາດອ້ອມຮອບມີຄວາມສົດຊື່ນ ແລະ ໜາວເຢັນຕະ ຫຼອດປີ.  

ຄຽງຄູ່ກັນນີ້ການຂຶ້ນພິຊິດຍອດພູເບ້ຍຍັງເປັນການສົ່ງເສີມລາວທ່ຽວລາວໂດຍສະເພາະວຽກງານດ້ານການທ່ອງທ່ຽວຂອງແຂວງໄຊສົມບູນໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງເພື່ອປະກອບສ່ວນທີ່ສຳຄັນເຂົ້າໃນການພັດທະນາເສດຖະກິດ-ສັງຄົມຂອງແຂວງຕາມ 5 ທ່າແຮງ ທີ່ວາງໄວ້ໃຫ້ປາກົດຜົນເປັນຈິງທັງສະແດງໃຫ້ເຫັນເຖິງໄຊ ຊະນະຢ່າງຍິ່ງໃຫຍ່ ແລະສະຖຽນລະພາບທາງດ້ານການເມືອງທີ່ໜັກແໜ້ນ ແລະຄວາມເອົາໃຈໃສ່ຕໍ່ການພັດທະນາຂອງພັກ-ລັດຖະບານໂດຍສະເພາະກໍຄືຄະນະພັກ-ຄະນະນຳແຂວງໄຊສົມບູນຊຶ່ງຍາມໃດກໍມີຄວາມພະຍາຍາມຢ່າງສຸດຂີດໃນການພັດທະນາເສດຖະກິດ-ສັງຄົມ ຂອງແຂວງໂດຍຖືເອົາວຽກງານການທ່ອງທ່ຽວເປັນບັນຫາສຳຄັນໃນຈຳນວນ 5 ທ່າແຮງ ເປັນຕົວກະຕຸ້ນເສດຖະກິດຈົນສາມາດນຳພາແຕ່ລະຂະບວນການຂຶ້ນພິຊິດຍອດພູເບ້ຍໄດ້ຢ່າງມີໄຊ ແລະຮັບປະກັນຄວາມສະຫງົບປອດໄພ 100% ທ່ານ ຄຳໄພ ສົມຊະນະ ກ່າວ.

 ການຂຶ້ນພິຊິດຈອມພູເບ້ຍຢູ່ແຂວງໄຊສົມບູນ ເທື່ອນີ້ເຕັມໄປດ້ວຍບັນຍາກາດເບີກບານມ່ວນຊື່ນ ແລະຄວາມປະທັບໃຈຈາກຜູ້ທີ່ໄດ້ມາສຳຜັດຕົວຈິງເມື່ອກັບຄືນແລ້ວກໍຢາກກັບມາທ່ຽວຊົມພູເບ້ຍແຫ່ງນີ້ອີກເທື່ອໃໝ່ໂດຍຂະບວນຄາຣາວານແມ່ນໄດ້ເລີ່ມມາແຕ່ວັນທີ 20 ພະຈິກ 2020 ເປັນຕົ້ນມາໂດຍມີຫຼາຍຂະບວນຈາກທ່ອງທ່ຽວເຖິງຂັ້ນການນຳຂັ້ນສູງກາງ.

-------------

ຂ່າວ: ຈິນລະວອນ ວໍລະສົມບູນ

แชร์