ນິຍົມລາວ ເບິ່ງວຽກບໍລິການເປັນທ່າແຮງສ້າງລາຍໄດ້ ຂະນະທີ່ຄົນສ່ວນຫຼາຍເບິ່ງເປັນວຽກໜ້າອາຍ

   ຕ້ອງຍອມຮັບເລີຍວ່າໃນເມື່ອກ່ອນວຽກບໍລິການເປັນວຽກໜຶ່ງທີ່ຄົນສ່ວນຫຼາຍມັກເບິ່ງໄປໃນທາງລົບ ແລະຄິດວ່າເປັນວຽກທີ່ຕ່ຳ, ໜ້າອັບອາຍຈຶ່ງເຮັດໃຫ້ນັກຮຽນນັກສຶກສາບໍ່ຄ່ອຍເລືອກຮຽນສາຍນີ້, ພໍຈົບມາກໍບໍ່ເລືອກທີ່ຈະເຮັດ, ຂະນະທີ່ຜູ້ອຳນວຍການບໍລິສັດທ່ອງທ່ຽວນິຍົມລາວພັດຄິດຕ່າງ ແລະເລືອກຮຽນເພາະເຊື່ອວ່າຈະເປັນວຽກທີ່ສ້າງເງິນໃນອະນາຄົດຈາກຈຸດນັ້ນ ແລະເຮັດທຸລະກິດພາຍໃຕ້ທ່ອງທ່ຽວນິຍົມລາວມາເກືອບ 20 ປີດ້ວຍການບໍລິການຈາກໃຈເຮັດໃຫ້ສັງຄົມຮູ້ຈັກ ແລະ ເຊື່ອໝັ້ນໃນການບໍລິການເຫັນໄດ້ຈາກຕົວເລກຂອງລູກຄ້າທີ່ມາໃຊ້ບໍລິການໃນແຕ່ລະປີ ແລະການບໍລິການທີ່ຫຼາກຫຼາຍໃນປະຈຸບັນ.

  ທ່ານ ນາງ ສົມຈັນ ດວງບຸດດີ ອຳນວຍການບໍລິສັດທ່ອງທ່ຽວ ນິຍົມລາວ ຈຳກັດ ໄດ້ເລົ່າສູ່ທີມຂ່າວ ໜັງສືພິມເສດຖະກິດ-ສັງຄົມຟັງ ວ່າ: ເມື່ອຍ້ອນໄປໃນສະໄໝທີ່ເພີ່ນ ເປັນນັກຮຽນ ແລະໄດ້ຕັດສິນໃຈ ເລືອກຮຽນສາຍບໍລິການ, ຊຶ່ງເປັນ ຂະແໜງທີ່ຄົນສ່ວນຫຼາຍບໍ່ເລືອກ ເພາະວ່າເປັນວຽກທີ່ຕ່ຳ ແລະອັບອາຍທີ່ຕ້ອງໄປບໍລິການຄົນອື່ນ, ແຕ່ສຳລັບເພີ່ນແລ້ວຈະເຫັນຕ່າງ ເນື່ອງຈາກວຽກບໍລິການ ເປັນວຽກໜຶ່ງທີ່ມີກຽດ, ທຸກໆປະເທດກໍມີການບໍລິການ ແລະປະເທດເຮົາກໍ ຍັງຖືວ່າເປັນສິ່ງໃໝ່ຢູ່, ດັ່ງນັ້ນຈຶ່ງ ເຫັນວ່າເປັນທ່າແຮງທີ່ດີໃນອະນາ ຄົດ ທີ່ຈະພັດທະນາວຽກການບໍ ລິການໃຫ້ເທົ່າທຽມກັບຕ່າງປະເທດ, ຊຶ່ງພາຍຫຼັງທີ່ຮຽນຈົບມາຈາກປະເທດຫວຽດນາມກໍໄດ້ມາປະກອບສ່ວນເຮັດວຽກນຳພັກ- ລັດໃນໄລຍະໜຶ່ງ ແລະຕໍ່ມາຈຶ່ງມາເຮັດທຸລະກິດເປັນຂອງຕົນເອງ,ໃນປີ 2001 ມາຮອດປະຈຸບັນເກືອບວ່າຄົບ 20 ປີແລ້ວ ທີ່ດຳເນີນທຸລະກິດກ່ຽວກັບການໃຫ້ບໍລິການ ນຳທ່ຽວທັງພາຍໃນ ແລະຕ່າງປະເທດທົ່ວໂລກ, ບໍລິການແລກປ່ຽນເງິນຕາ, ຂາຍປີ້ຍົນ, ຈອງໂຮງແຮມ, ເຊົ່າລົດ, ໂດຍສັງຄົມຕ່າງກໍໃຫ້ຄວາມເຊື່ອໝັ້ນໃນການບໍລິການ ແລະພາກລັດເອັງກໍໃຫ້ການສະໜັບສະໜູນດ້ວຍດີມາຕະຫຼອດ, ຈຶ່ງເຮັດໃຫ້ການດຳເນີນທຸລະກິດຂອງບໍລິສັດນັບມື້ມີການພັດທະນາຂຶ້ນ.

  ປະຈຸບັນການບໍລິການຂອງບໍລິ ສັດທ່ອງທ່ຽວນິຍົມລາວປະກອບມີຫຼາກຫຼາຍການບໍລິການເປັນຕົ້ນບໍລິການນຳທ່ຽວທັງພາຍໃນ ແລະ ຕ່າງປະເທດທົ່ວໂລກ, ບໍລິການ ແລກປ່ຽນເງິນຕາ, ຂາຍປີ້ຍົນ, ຈອງໂຮງແຮມ, ເຊົ່າລົດ ທັງໝົດ 4 ຄັນ, ມີພະນັກງານ 20 ກວ່າຄົນ ໄວ້ບໍລິການ ແລະໃຫ້ຄຳປຶກສາແກ່ລູກຄ້າໃນການຈະໃຊ້ບໍລິການນຳບໍລິສັດ.

  ທ່ານ ນາງ ສົມຈັນ ດວງບຸດດີ ໃຫ້ຮູ້ຕື່ມວ່າ: ເກືອບ 20 ປີຂອງການດຳເນີນທຸລະກິດເຫັນວ່າສັງຄົມໃຫ້ການຍອມຮັບໃນການບໍລິການທີ່ເປັນມິດ, ບໍລິການດ້ວຍໃຈ ແລະການຄັດສັນສິ່ງດີໆໃຫ້ກັບລູກຄ້າໃນໄລຍະຜ່ານມາ,ຈຶ່ງເຮັດໃຫ້ລູກຄ້າເຊື່ອຖື ແລະເລືອກໃຫ້ນິຍົມລາວເປັນບໍລິສັດທີ່ໃຫ້ບໍລິການນຳທ່ຽວ, ພ້ອມ ກັນນັ້ນ ສ່ວນໜຶ່ງກໍແມ່ນການປະກອບສ່ວນໃຫ້ການ  ສະໜັບສະໜູນຂອງພາກລັດ ໂດຍ   ສະເພາະການອຳນວຍຄວາມສະ ດວກທາງດ້ານເອກະສານຕ່າງໆ ເພື່ອເຮັດໃຫ້ບໍລິສັດໄດ້ອອກທົວ ຕາມກຳນົດເວລາ, ແຕ່ເຖິງຢ່າງ ໃດກໍຕາມ ຄຽງຄູ່ກັບການອຳນວຍ ຄວາມສະດວກດັ່ງກ່າວ, ການດຳ ເນີນທຸລະກິດດ້ານນີ້ ໂດຍສະເພາະ ການຈັດການນຳທ່ຽວພາຍໃນ ເຫັນໄດ້ວ່າ ຍັງມີຫຼາຍດ້ານທີ່ຍັງ ເປັນສິ່ງຄົງຄ້າງ ແລະຮີບດ່ວນໃນ ການແກ້ໄຂ ຕົ້ນຕໍແມ່ນວຽກການ ບໍລິການ ໂດຍເລີ່ມຈາກການຄົມມະ ນາຄົມ ແລະຂົນສົ່ງ, ການບໍລິການ ຕາມດ່ານຕ່າງໆ, ສະຖານທີ່ທ່ອງ ທ່ຽວຕ່າງໆ, ໂຮງແຮມ, ເຮືອນພັກ, ຮ້ານອາຫານ ແລະອື່ນໆ, ທັງນີ້ກໍ ເພື່ອເຮັດໃຫ້ການບໍລິການນຳທ່ຽວ ພາຍໃນມີບັນຍາກາດຟົດຟື້ນ ແລະ ໃຫ້ສົມກັບຄຳຂວັນທີ່ວ່າ “ຄົນລາວ ເປັນຄົນທີ່ມີນ້ຳໃຈ ຍີ້ມແຍ້ມແຈ່ມໃສ ຕ້ອນຮັບແຂກດ້ວຍໄມຕິຈິດ”, ຊຶ່ງ ຜ່ານມາ ຍັງເຫັນວ່າ ສະຖານທີ່ທ່ອງ ທ່ຽວ, ໂຮງແຮມ ແລະຮ້ານອາຫານ ພາຍໃນຂອງພວກເຮົາ ຍັງມີການ ພັດທະນາທີ່ຊ້າກວ່າເມື່ອທຽບກັບ ປະເທດອ້ອມຂ້າງ ແລະການບໍລິ ການຍັງບໍ່ເປັນມືອາຊີບເທົ່າທີ່ ຄວນ.

  ບໍລິສັດທ່ອງທ່ຽວນິຍົມລາວ ຈຳກັດ ໃຫ້ບໍລິການນຳທ່ຽວທັງພາຍໃນ ແລະຕ່າງປະເທດ, ຊຶ່ງມີສຳນັກງານໃຫຍ່ຕັ້ງຢູ່ ບ້ານໂພນຕ້ອງ ເມືອງຈັນທະບູລີ ນະ ຄອນຫຼວງວຽງຈັນ, ຫາກລູກຄ້າສົນໃຈຢາກພາຄອບຄົວ, ໝູ່ເພື່ອນ ຫຼື ຄົນຮັກໄປທ່ຽວກໍສາມາດຕິດຕໍ່ຫາບໍລິສັດໄດ້ທີ່ເບີ 021 560839.

ໂດຍ: ປັອກ

แชร์