ມອບ-ຮັບໜ້າທີ່ຫົວໜ້າພະແນກ ຮສສ ແຂວງສາລະວັນ

   ໃນວັນທີ 23 ທັນວາ 2020 ຢູ່ທີ່ຫ້ອງປະຊຸມພະແນກແຮງງານ ແລະສະຫວັດດີການສັງຄົມ (ຮສສ) ແຂວງສາລະວັນໄດ້ມີພິທີມອບ-ຮັບໜ້າທີ່ຫົວໜ້າພະແນກລະຫວ່າງຜູ້ເກົ່າ ແລະຜູ້ໃໝ່ໂດຍໃຫ້ກຽດເຂົ້າຮ່ວມຂອງທ່ານ ສົມໃຈ ອຸ່ນຈິດ ຄະນະປະຈຳພັກແຂວງຮອງເຈົ້າແຂວງໆສາລະວັນຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ, ມີຜູ້ຕາງໜ້າພະແນກການຕ່າງໆອ້ອມຂ້າງແຂວງ, ຫົວໜ້າຫ້ອງການ ຮສສ 8 ເມືອງ ແລະພະນັກງານພາຍໃນພະແນກເຂົ້າຮ່ວມ.

  ທ່ານ ເພັດສະໜອນ ພາສີ ຮອງຫົວໜ້າຄະນະຈັດຕັ້ງແຂວງສາລະວັນກໍ່ໄດ້ໃຫ້ກຽດຂຶ້ນຜ່ານຂໍ້ຕົກລົງເລກທີ 757ຈຂ.ສວ ແລະເລກທີ760/ຈຂ.ສວ ລົງວັນທີ 22 ທັນວາ 2020 ວ່າດ້ວຍການຍົກຍ້າຍຫົວໜ້າພະແນກແຮງງານ ແລະ ສະຫວັດດີການສັງຄົມແຂວງໄປປະຈຳການ-ຮັບ ໜ້າທີ່ຢູ່ບ່ອນໃໝ່ ແລະ ແຕ່ງຕັ້ງຫົວໜ້າພະ ແນກແຮງງານ ແລະສະຫວັດດີການສັງຄົມແຂວງໂດຍອີງຕາມກົດໝາຍວ່າດ້ວຍການປົກຄອງທ້ອງຖິ່ນ (ສະບັບປັບປຸງໃໝ່) ເລກທີ 68/ສພຊ ລົງວັນ ທີ 14 ທັນວາ 2015 ໝວດທີ IV ມາດຕາທີ 20 ຂໍ້ທີ 11 ສິດຂອງເຈົ້າແຂວງໃນການຍົກຍ້າຍ,ແຕ່ງຕັ້ງຫົວໜ້າພະແນກ ແລະຫົວໜ້າອົງການທຽບເທົ່າພະແນກຂັ້ນແຂວງ ແລະມະຕິຕົກລົງຂອງຄະນະປະຈຳພັກແຂວງສະບັບເລກທີ 951/ຄຈພຂ.ສວ ລົງວັນທີ 15 ທັນວາ 2020 ວ່າດ້ວຍການແບ່ງງານຄະນະບໍລິຫານງານພັກແຂວງສາລະວັນ ສະໄໝ ທີIX,ໂດຍຫັນດີຕົກລົງຍົກຍ້າຍທ່ານ ຄຳຕາ ໂຮ່ຊົງເລືອງ ຫົວໜ້າພະແນກແຮງງານ ແລະສະຫວັດດີການສັງຄົມ ແຂວງຜູ້ເກົ່າໄປຮັບໜ້າທີ່ໃໝ່ຢູ່ອົງການແນວລາວສ້າງຊາດແຂວງ ແລະເຫັນດີແຕ່ງຕັ້ງທ່ານ ບົວໄລ ແສນແກ້ວມີກໍ ກຳມະການພັກແຂວງເປັນຫົວໜ້າພະແນກແຮງງານແລະສະຫວັດດີການສັງຄົມແຂວງສາລະວັນຜູ້ໃໝ່.

   ຈາກນັ້ນໃນພິທີກໍ່ໄດ້ຮັບຟັງການຜ່ານບົດສະຫຼຸບລາຍງານການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາທີ່ທ່ານຫົວໜ້າພະ ແນກ ຮສສ ແຂວງຜູ້ເກົ່າໄດ້ຊີ້ນຳໆພາຜ່ານມາເພື່ອເຮັດໃຫ້ຜູ້ທີ່ມາປະຈຳການໃໝ່ໄດ້ສືບຕໍ່ຈັດຕັ້ງປະຕິບັດໃນຕໍ່ໜ້າ,ໂອກາດດຽວກັນນັ້ນທ່ານຫົວໜ້າພະແນກແຮງງານ ແລະສະຫວັດດີການສັງຄົມແຂວງຜູ້ເກົ່າ-ຜູ້ໃໝ່ ກໍໄດ້ມີການເຊັນບົດບັນທຶກມອບ-ຮັບໜ້າທີ່ຢ່າງເປັນທາງການໂດຍຊ້ອງໜ້າ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ແລະແຂກເຂົ້າຮ່ວມເປັນສັກຂີພິຍານ.

   ໂອກາດດຽວກັນນັ້ນ, ທ່ານ ສົມໃຈ ອຸ່ນຈິດ ກໍ່ໄດ້ໂອ້ລົມ ແລະເນັ້ນໜັກໃຫ້ເອົາໃຈໃສ່ການຄຸ້ມຄອງແຮງງານ, ການຈັດຫາວຽກເຮັດງານທຳ, ບັນຫາການສ້າງຄັງແຮ່ ເພື່ອຊ່ວຍເຫຼືອຜູ້ທີ່ໄດ້ຮັບຜົນກະທົບໃຫ້ທ່ວງທັນກັບເຫດການທີ່ເກີດຂຶ້ນ, ບັນຫາການປະຕິບັດນະໂຍບາຍ, ການສ້າງພະນັກງານຮຸ່ນສືບທອດປ່ຽນແທນ ແລະຮັດແໜ້ນຄວາມສາມັກຄີພາຍໃນເຮັດວຽກເປັນໜູ່ຄະນະ ແລະແບ່ງວຽກໃຫ້ບຸກຄົນຮັບຜິດຊອບຢ່າງລະອຽດເພື່ອເຮັດໃຫ້ການຈັດຕັ້ງປະຕິບັດວຽກງານມີປະສິດທິຜົນ.

---------------

ຂ່າວ: ສິດຕາ ເພັດວົງສາ

ຮູບພາບ: ໜັງສືພິມເສດຖະກິດ-ສັງຄົມ

แชร์