ໂຄງການຈີເອັມເອສໃຊ້ທຶນ 4 ຮ້ອຍຕື້ກວ່າກີບ ພັດທະນາ 3 ເມືອງ

   ໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງໄດ້ໃຊ້ທຶນກູ້ຢືມແລະຊ່ວຍເຫຼືອລ້າຈາກເອດີບີທັງໝົດ 439,2 ຕື້ກີບ ເພື່ອດຳເດີນ 7 ວຽກໃຫຍ່ໃນ 3 ເມືອງຂອງ ແຂວງສະຫວັນນະເຂດນັບແຕ່ປີ 2013 ເປັນຕົ້ນມາຮອດປະຈຸບັນຫຼາຍໜ້າວຽກມີຜົນສຳເລັດຊຶ່ງປະກອບສ່ວນສຳຄັນເຮັດໃຫ້ຕົວເມືອງມີຄວາມສວຍງາມ ແລະອຳນວຍຄວາມສະດວກໃຫ້ແກ່ການຈະລາຈອນໄປມາຫາສູ່ພ້ອມທັງສົ່ງເສີມການທ່ອງທ່ຽວພາຍໃນແຂວງໃຫ້ສືບຕໍ່ມີບັນຍາກາດຄຶກຄື້ນ.

ວັນທີ 24 ທັນວາ 2020 ທີ່ແຂວງສະຫວັນນະເຂດໄດ້ຈັດກອງປະຊຸມຄະນະຊີ້ນຳໂຄງການ (PSC) ເພື່ອສະຫຼຸບລາຍງານການຈັດຕັ້ງປະຕິບັດປະຈຳປີ 2020 ແລະວາງແຜນການໃນປີ 2021 ສຳລັບໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກ ອະນຸພາກພື້ນແມ່ນໍ້າຂອງເງິນກູ້ຍືມເລກທີ 2931 ແລະເງິນຊ່ວຍເຫຼືອລ້າເລກທີ 0313/0314 (ໂຄງການ GMS1) ໂດຍການເປັນປະທານຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ທັງເປັນປະທານຄະນະຊີ້ນຳໂຄງການຂັ້ນແຂວງ, ພ້ອມນີ້ກໍ່ມີທ່ານ ນາງ ມະນີຈັນ ຊະນະນິຄົມ ຕາງໜ້າກົມເຄຫາຜັງເມືອງຈາກກະຊວງໂຍທາທິການ ແລະ ຂົນສົ່ງ, ບັນດາທ່ານຄະນະຊີ້ນຳໂຄງການ, ພະແນກ ຍທຂ ແຂວງ, ຫ້ອງການປະສານງານ, ຄະນະຄຸ້ມຄອງໂຄງການ, ທີ່ປຶກສາໂຄງການ, ການນຳເມືອງເຊໂປນ, ເມືອງພີນ, ນະຄອນໄກສອນ ພົມວິຫານ, ບັນດາບໍລິສັດຜູ້ຮັບເໝົາກໍ່ສ້າງຂອງໂຄງການ ແລະພາກສ່ວນກ່ຽວຂ້ອງເຂົ້າຮ່ວມ.

 ທ່ານ ທ່ອນແກ້ວ ພຸດທະໄກຍະລາດ ກ່າວວ່າ: ກອງປະຊຸມຄັ້ງນີ້ໄດ້ທົບທວນຄືນຜົນການຈັດຕັ້ງປະຕິບັດໂຄງການ GMS1 ແລະນຳບັນຫາທີ່ຍັງຄ້າງຄາມາປຶກສາຫາລືເພື່ອຫາຊ່ອງທາງແກ້ໄຂທັງນີ້ກໍ່ເພື່ອເຮັດໃຫ້ວຽກໂຄງການດຳເນີນໄປຕາມແຜນການ ແລະ ສຳເລັດຕາມຄາດໝາຍທີ່ວາງໄວ້ໂດຍໂຄງການດັ່ງກ່າວໄດ້ເລີ່ມລົງມືແຕ່ປີ 2013 ມາຮອດປະຈຸບັນນີ້ເຫັນວ່າ 7 ໂຄງການຍ່ອຍໄດ້ລົງມືກໍ່ສ້າງສຳເລັດ 100% ແລະຢູ່ໃນໄລຍະຄໍ້າປະກັນ 1 ປີ, ຊຶ່ງເມື່ອ 7 ໂຄງການຍ່ອຍນີ້ສໍາເລັດມັນໄດ້ເຮັດໃຫ້ຕົວເມືອງມີຄວາມສວຍງາມ ແລະອຳນວຍຄວາມສະດວກໃຫ້ແກ່ການຈະລາຈອນໄປມາຫາສູ່ ແລະສົ່ງເສີມທ່ອງທ່ຽວພາຍໃນແຂວງພວກເຮົາ.

ຂະນະທີ່ທ່ານ ພົມມາ ວົງພະຈິດ ຫົວໜ້າໂຄງການ GMS1 ລາຍງານວ່າ: ໂຄງການ GMS1 ເປັນໂຄງການເງິນກູ້ຢືມ ແລະຊ່ວຍເຫຼືອລ້າຈາກທະນາຄານພັດທະນາອາຊີ, ມີມູນຄ່າທັງໝົດ 47,74 ລ້ານໂດລາ ຫຼືປະມານ 439,2 ຕື້ກີບ, ໜ້າວຽກທີ່ປະຕິບັດລວມມີ 7 ໜ້າວຽກ,ກວມເອົາໃນ 3 ຕົວ ເມືອງຂອງແຂວງສະຫວັນນະເຂດຄື: ນະຄອນໄກສອນ ພົມວິຫານ,ເທສະບານເມືອງພີນ ແລະບ້ານແດນສະຫວັນ ເມືອງເຊໂປນ,ມາຮອດປະຈຸບັນການຈັດຕັ້ງປະຕິບັດແຜນຍຸດທະສາດການພັດທະ ນາເສດຖະກິດ-ສັງຄົມທ້ອງຖິ່ນ ສຳເລັດແລ້ວ 100%, ແຜນການພັດທະນາຂີດຄວາມສາມາດບຸກຄະລາກອນສຳເລັດ 91,14%,ການຈັດຕັ້ງປະຕິບັດໂຄງການຍ່ອຍສຳເລັດ 100%.

  ສ່ວນໜ້າວຽກທີ່ຍັງເຫຼືອປະກອບມີ: ວຽກປິດສະໜາມຂີ້ເຫຍື້ອເກົ່າ, ວຽກຝຶກອົບຮົມພະນັກງານ ແລະຜູ້ເກັບຂີ້ເຫຍື້ອ, ຝຶກອົບຮົມການນຳໃຊ້ກົນຈັກ ແລະອຸປະກອນຕ່າງໆ, ຜູ້ຄຸ້ມຄອງ ແລະບໍລິຫານສະໜາມຂີ້ເຫຍື້ອແມ່ນຍັງບໍ່ທັນໄດ້ຖືກແຕ່ງຕັ້ງເທື່ອ,ສຳລັບບັນຫາທີ່ນຳສະເໜີ ແລະປຶກສາຫາລືປະກອບມີ: ວຽກຄຸ້ມຄອງ ແລະ ບໍລິ ຫານສວນສາທາລະນະແຄມຂອງ-ສວນສາທາລະນະໄກສອນ ພົມວິຫານ, ວຽກຄຸ້ມຄອງ ແລະບໍລິຫານສະຖານີປໍ້າດູດນໍ້າຫ້ວຍລົງກົງ, ວຽກຄຸ້ມຄອງ ແລະ ບໍລິຫານໜອງບຳບັດນໍ້າເປື້ອນຫ້ວຍລົງກົງ ແລະການປ່ອຍນໍ້າເປື້ອນຂອງຮ້ານອາຫານ “ຮ້ານຊີ້ນດາດ” ຊຶ່ງເອກະຊົນໄດ້ສຳປະທານສາລາຊົມວິວແຄມຂອງ ແລະໄດ້ປ່ອຍນໍ້າໃຊ້-ນໍ້າເປື້ອນລົງພື້ນອາຄານຊຶ່ງອາດເຮັດໃຫ້ນຳໄປສູ່ການໄຫຼໜີຂອງຊັ້ນຊາຍທີ່ຖົມໄວ້ ແລະອາດເຮັດໃຫ້ພື້ນຂອງ ສວນສາທາລະນະ ແລະສະຫຼົບກັນເຈື່ອນອາດຍຸບຕົວ ແລະຖະຫຼົ່ມລົງໄດ້ໃນອະນາຄົດໂດຍທາງທີ່ປຶກສາແມ່ນໄດ້ເຮັດບົດລາຍງານຫາເຈົ້າຂອງໂຄງການແລ້ວເພື່ອຫາທາງແກ້ໄຂດ່ວນ.

แชร์