ລ້ອງແຈ້ງມອບອາວຸດຜິດກົດໝາຍໃຫ້ ປກສ ແຂວງໄຊສົມບູນ

ອາທິດຜ່ານມາກອງບັນຊາການ ປກສ ເມືອງລ້ອງແຈ້ງ ມອບອາວຸດເສິກ, ອາວຸດລ່າເນື້ອໃຫ້ກັບຫ້ອງຄຸ້ມຄອງສຳມະໂນຄົວ ແລະກໍ່ສ້າງຮາກຖານ ປກສ ແຂວງໄຊສົມບູນ ພາຍໃຕ້ການເປັນປະທານຂອງທ່ານ ອິນຕອງ ໂຄດປັນຍາ ເຈົ້າເມືອງໆລ້ອງແຈ້ງ, ເຂົ້າຮ່ວມຂອງທ່ານ ພັທ ອິນປັນ ຍາດຕິວົງ ຮອງກອງບັນຊາການ, ຫົວໜ້າຫ້ອງຄຸ້ມ ຄອງສຳມະໂນຄົວ ແລະກໍ່ສ້າງຮາກຖານ ປກສ ແຂວງໄຊສົມບູນ,ມີທ່ານ ພັທ ຄຳໝັ້ນ ພິມມະວົງສາ ຫົວໜ້າກອງບັນຊາການ ປກສ ເມືອງລ້ອງແຈ້ງ, ກອງບັນຊາການທະຫານເມືອງ ແລະພາກສ່ວນທີ່ກ່ຽວຂ້ອງເມືອງຕະຫຼອດຮອດນາຍ ແລະພົນຕຳຫຼວດທົ່ວກອງບັນຊາການ ປກສ ເມືອງເຂົ້າຮ່ວມ.

  ທ່ານ ພັທ ຄຳໝັ້ນ ພິມມະວົງສາ ຂຶ້ນລາຍງານການຈັດຕັ້ງປະຕິບັດໜ້າທີ່ວຽກງານໂດຍອີງໃສ່ຄຳສັ່ງເພີ່ມເຕີມຂອງຄະນະກຳມະການປກຊ-ປກສ ແຂວງໄຊສົມບູນສະ ບັບເລກທີ 348/ປຊ,ປສ.ຊບ ລົງວັນທີ 28 ຕຸລາ 2020 ແລະແຈ້ງການຂອງກອງບັນຊາການ ປກສ ແຂວງໄຊສົມບູນ ສະບັບເລກທີ 1250/ປກສ.ຊບ, ລົງວັນທີ 17 ພຶດສະພາ 2018 ກ່ຽວກັບການເກັບກຳສະຖິຕິ ແລະເກັບກູ້ອາວຸດເສິກ, ອາວຸດລ່າເນື້ອ, ທາດແຕກ, ທາດລະເບີດ ແລະການເຄື່ອນໄຫວອື່ນໆ ທີ່ນຳໃຊ້ບໍ່ຖືກຕ້ອງຕາມລະບຽບກົດໝາຍຢູ່ແຂວງໄຊ ສົມບູນ, ຈາກການລົງເກັບກູ້ອາວຸດເສິກ, ອາວຸດລ່າເນື້ອຕົວຈິງໃນທົ່ວເມືອງ ລ້ອງແຈ້ງໄດ້ທັງໝົດດັ່ງນີ້: ປືນແກ໋ບ 296 ກະບອກ, ເລົາປືນ 48 ເລົາ, ເສດປືນສົງຄາມບາໂສກາຈຳນວນ 1 ກະບອກ ພ້ອມດ້ວຍລູກກະສູນ 1 ລູກ ແລະລູກປືນ M 79 ຈໍານວນ 19 ລູກ.

 ໃນໂອກາດການເຂົ້າຮ່ວມພິທີມອບ-ຮັບທ່ານ ອິນຕອງ ໂຄດປັນຍາ ມີຄຳເຫັນໂອ້ລົມຕໍ່ກັບນາຍ ແລະພົນຕໍາຫຼວດກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ເຮັດໄດ້ຜ່ານມາພ້ອມທັງເອົາໃຈໃສ່ຕິດຕາມ, ກວດກາຜູ້ທີ່ລະເມີດຕໍ່ລະບຽບກົດໝາຍ, ເອົາໃຈໃສ່ປະຕິບັດໜ້າທີ່ທີໄດ້ມອບໝາຍດ້ວຍຄວາມຮັບຜິດຊອບສູງເພື່ອເຮັດໃຫ້ແຂວງໄຊສົມບູນເວົ້າສະເພາະກໍຄືເມືອງລ້ອງແຈ້ງໃນການເລີກຮື້ສິ່ງທີຜິດກົດໝາຍໂດຍກະເພາະແມ່ນເກັບກູ້ອາວຸດເສິກ, ອາວຸດລ່າເນື້ອ, ທາດແຕກ, ທາດລະ ເບີດໃຫ້ໄດ້ຢ່າງສີ່ນເຊີງ.

  ຈາກນັ້ນທັງສອງພາກສ່ວນລະຫວ່າງກອງບັນຊາການ ປກສ ເມືອງລ້ອງ ແຈ້ງກັບຫ້ອງຄຸ້ມຄອງສຳມະໂນຄົວ ແລະກໍ່ສ້າງຮາກຖານ ປກສ ແຂວງກໍໄດ້ລົງນາມເຊັນບົດບັນທຶກມອບ-ຮັບ ຢ່າງເປັນທາງການປືນທີໄດ້ມາຄັ້ງນີ້ແມ່ນນໍາມາເກັບຮັກສາໄວ້ຢູ່ສາງປືນຂອງກອງບັນຊາການ ປກສ ແຂວງເພື່ອລໍຖ້າການທຳລາຍສ່ວນເສດປືນສົງຄາມບາໂສກາພ້ອມດ້ວຍກະສູນ ແລະລູກ M 79 ມອບໃຫ້ກັບກອງບັນຊາການທະຫານເມືອງເປັນຜູ້ຄຸ້ມຄອງຮັກສາ.

------------

ຂ່າວ: ປກສ ແຂວງໄຊສົມບູນ

ຮູບພາບ: ໜັງສືພິມເສດຖະກິດ-ສັງຄົມ

แชร์