ສະຫວັນຖືກປະກາດເປັນແຂວງຈົບຊັ້ນມັດທະຍົມສຶກສາຕອນຕົ້ນບໍາລຸງ

  ພິທີດັ່ງກ່າວໄດ້ຈັດຂຶ້ນຢ່າງເປັນທາງການໃນວັນທີ 29 ທັນວາ 2020 ທີ່ຫໍວັດທະນະທຳໄກສອນ ພົມວິຫານ ໂດຍເຂົ້າຮ່ວມໃນພິທີຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີຄະນະການນຳຂັ້ນຕ່າງໆຂອງແຂວງ,ສະຖາບັນການສຶກສາພາກລັດ-ເອກະຊົນ, ແຂກຖືກເຊີນ, ຄູ-ອາຈານ, ຜູ້ບໍລິຫານການສຶກສາຂັ້ນຕ່າງໆ ແລະໂຮງຮຽນມັດທະຍົມສຶກສາຕອນຕົ້ນທົ່ວແຂວງເຂົ້າຮ່ວມຢ່າງພ້ອມພຽງ.

  ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດທັງເປັນຫົວໜ້າພະແນກສຶກສາທິການ ແລະກີລາແຂວງໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນຊັ້ນມັດທະຍົມສຶກສາຕອນຕົ້ນບຳລຸງທົ່ວແຂວງ ແລະແຜນພັດທະນາການສຶກສາໃນຕໍ່ໜ້າໂດຍສັງເຂບວ່າ: ເພື່ອບັນລຸແຜນພັດທະນາເສດຖະກິດ-ສັງຄົມຂອງແຂວງໃນໄລຍະ 5 ປີ (2016-2020) ຕ້ອງເຮັດໃຫ້ປະຊາຊົນໃນເກນອາຍຸ 15-35 ປີ ໃນທົ່ວແຂວງມີລະດັບການສຶກສາຈົບຊັ້ນມັດທະຍົມສຶກສາຕອນຕົ້ນປະຊາຊົນຢ່າງໜ້ອຍ 90% ຂຶ້ນໄປໂດຍການຖອດຖອນບົດຮຽນຈາກການຈັດຕັ້ງປະຕິບັດວຽກງານບຳລຸງຊັ້ນປະຖົມສຶກສາຜ່ານມາແຂວງພວກເຮົາສາມາດຈັດຕັ້ງ ການບຳລຸງຍົກລະດັບການສຶກສາຊັ້ນມັດທະຍົມຕອນຕົ້ນໃຫ້ແກ່ປະຊາຊົນຕາມ 5 ຂັ້ນຕອນ.

ຜ່ານການຈັດຕັ້ງປະຕິບັດຈຶ່ງເຮັດໃຫ້ບັນດາເມືອງຕ່າງໆ ມີຜົນສຳເລັດເປັນແຕ່ລະໄລຍະມາຮອດປະຈຸບັນ, ທົ່ວແຂວງສະຫວັນນະເຂດມີປະຊາກອນ 15-35 ປີທັງໝົດ 3,4 ແສນຄົນ, ຍິງ 1,6 ແສນ ຄົນ, ຮຽນຈົບຊັ້ນມັດທະຍົມຕອນຕົ້ນ ສາຍສາມັນ 3,05 ແສນຄົນ, ມີກຸ່ມເປົ້າ ໝາຍເຂົ້າຮຽນມັດທະຍົມຕອນຕົ້ນບຳລຸງ 26,7 ພັນຄົນ, ຍິງ 12,9 ພັນຄົນ ສາມາດຮຽນຈົບຊັ້ນມັດທະຍົມຕອນຕົ້ນບໍາລຸງໄດ້ 25,4 ພັນຄົນ, ຍິງ 12,2 ພັນຄົນ, ສະເລ່ຍຜູ້ຈົບຊັ້ນມັດທະຍົມຕອນຕົ້ນບຳລຸງທົ່ວແຂວງໄດ້ 95,41%, ບໍ່ຈົບມັດທະຍົມຕອນຕົ້ນບໍາລຸງ 1,2 ພັນ ຄົນ, ຍິງ 637 ຄົນ, ເທົ່າກັບ 4,59%.

 ໄປຄຽງຄູ່ກັນນັ້ນ, ແຂວງກໍ່ໄດ້ເອົາໃຈໃສ່ບຳລຸງຍົກລະດັບການສຶກສາຊັ້ນມັດທະຍົມສຶກສາຕອນປາຍໃຫ້ແກ່ທະຫານ, ພະນັກງານ, ປະຊາຊົນ ແລະກຸ່ມຄົນທີ່ສົນໃຈຢູ່ໃນສູນການສຶກສານອກໂຮງຮຽນຂອງແຂວງ ຊຶ່ງໃນສົກຮຽນ 2016-2020 ມີຜູ້ເຂົ້າຮຽນບຳລຸງຍົກລະດັບທັງໝົດ 2.104 ຄົນ, ຍິງ 722 ຄົນ ໃນນັ້ນໂຮງຮຽນບຳລຸງ ມ 7 ມີ 1,4 ພັນຄົນ, ສອບເສັງຈົບຊັ້ນ ມ7 ໄດ້ 1,3 ພັນຄົນ ພ້ອມນີ້,ກໍ່ຍັງໄດ້ຊຸກຍູ້ສົ່ງເສີມໃຫ້ສູນການສຶກສານອກໂຮງຮຽນແຫ່ງຕ່າງໆ ຈັດຕັ້ງການຝຶກອົບຮົມວິຊາ ຊີບຂັ້ນພື້ນຖານໃຫ້ແກ່ຊຸມຊົນຜູ້ທີ່ມີຄວາມສົນໃຈຢາກມີວິຊາຊີບເສີມໃນສົກປີ 2016-2020 ໄດ້ຈຳນວນທັງໝົດ 628 ຄົນ.

 ຈາກນັ້ນ, ໃນພິທີກໍ່ໄດ້ມີການມອບ-ຮັບໃບຢັ້ງຢືນຈົບຊັ້ນມັດທະຍົມສຶກສາຕອນຕົ້ນບຳລຸງທົ່ວແຂວງສະຫວັນນະເຂດຢ່າງເປັນທາງການຊຶ່ງໃຫ້ກຽດມອບໂດຍທ່ານລັດຖະ ມົນຕີກະຊວງສຶກສາທິການ ແລະກີລາ ແລະໃຫ້ກຽດຕາງໜ້າແຂວງຮັບໃບຢັ້ງຢືນໃນຄັ້ງຂອງທ່ານເຈົ້າແຂວງສະຫວັນນະເຂດ.

  ໂອກາດຽວກັນນີ້,ໃນພິທີຍັງໄດ້ມີການປະດັບຫຼຽນ ແລະໃບຍ້ອງຍໍຂັ້ນຕ່າງໆ ໃຫ້ບຸກຄົນ ແລະກົມກອງທີ່ມີຜົນງານດີເດັ່ນປະກອບສ່ວນທາງດ້ານເຫື່ອແຮງ,ສະຕິປັນຍາໃນການຊີ້ນຳໆພາ ແລະເຄື່ອນໄຫວວຽກງານຂະບວນການຮຽນ-ການສອນໃນບັ້ນປະກາດຈົບຊັ້ນມັດທະຍົມຕອນຕົ້ນບຳລຸງສາຍປະຊາຊົນທົ່ວແຂວງສະຫວັນນະເຂດ.

แชร์