ຄືບໜ້າທາງລົດໄຟລາວ-ຈີນ ວາງລາງກາຍເຄິ່ງຮອດເມືອງມໍລະດົກໂລກແລ້ວ

 ຈະເປີດໃຊ້ຢ່າງເປັນທາງການໃນທ້າຍປີ 2021 ຢ່າງແນ່ນອນສຳລັບທາງລົດໄຟລາວ-ຈີນ ນະຄອນຫຼວງວຽງຈັນ-ຫຼວງນໍ້າທາ ຊຶ່ງພາຍຫຼັງເລີ່ມລົງມືກໍ່ສ້າງບໍລິສັດຜູ້ຮັບຜິດຊອບກໍໄດ້ເລັ່ງປະຕິບັດບັນດາໜ້າວຽກໃຫ້ເປັນໄປຕາມແຜນການທີ່ວາງເອົາໄວ້ໂດຍສະເພາະວຽກວາງລາງແມ່ນໄດ້ສຳເລັດກາຍເຄີ່ງ ຫຼືຮອດເມືອງມໍລະດົກໂລກຫຼວງພະບາງແລ້ວ.

ວັນທີ 29 ທັນວາ 2020 ບໍລິສັດ ວິສະວະກຳທາງລົດໄຟເລກ 2 ສປ ຈີນ ໄດ້ຈັດພິທີສະເຫຼີມສະຫຼອງ ແລະຊົມເຊີຍຜົນສຳເລັດໃນການວາງລາງລົດໄຟເສັ້ນທາງລົດໄຟ ລາວ-ຈີນ ແຕ່ນະຄອນຫຼວງວຽງຈັນຫາແຂວງຫຼວງພະບາງຊຶ່ງມີຄວາມຍາວ 240 ກິໂລແມັດ ໃຫ້ກຽດເຂົ້າຮ່ວມຂອງທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງທ່ານ ຫຼີຈືກົງຫົວໜ້າກົງສູນໃຫຍ່ ສປ ຈີນ ປະຈຳພາກເໜືອພ້ອມດ້ວຍພະນັກງານກຳມະກອນ ແລະປະຊາຊົນອ້ອມຂ້າງເຂົ້າຮ່ວມ.

ທ່ານ ຫຼີ ຈືກົງ ກ່າວວ່າ: ພາຍໃຕ້ການສະໜັບສະໜູນຂອງສອງປະເທດຈີນ-ລາວ ເຮັດໃຫ້ເສັ້ນທາງລົດໄຟລາວ-ຈີນ ທີ່ທົ່ວໂລກໃຫ້ຄວາມສົນໃຈນັ້ນໄດ້ຮັບການວາງລາງຈາກນະຄອນຫຼວງວຽງຈັນຫາເມືອງມໍລະດົກໂລກແຂວງຫຼວງພະບາງຊຶ່ງມີຄວາມໝາຍສຳຄັນທີ່ບົ່ງບອກວ່າທາງລົດໄຟລາວ-ຈີນ ຊ່ວງປະເທດລາວໄດ້ຮັບການວາງລາງສຳເລັດກາຍເຄິ່ງທາງແລ້ວ ແລະເປັນບາດກ້າວກະໂດດຂັ້ນໃຫຍ່ຂອງຄວາມຄືບໜ້າການກໍ່ສ້າງເສັ້ນທາງລົດໄຟ ລາວ-ຈີນ ໃຫ້ສຳເລັດຕາມເປົ້າໝາຍ ແລະ ເປີດນຳໃຊ້ໃນທ້າຍປີ 2021 ຢ່າງແນ່ນອນ.

ແນວໃດກໍຕາມປີນີ້ເປັນປີທີ່ເສດຖະກິດໂລກໄດ້ຮັບຜົນກະທົບຢ່າງໜັກໜ່ວງຈາກການລະບາດຂອງພະຍາດໂຄວິດ-19 ແຕ່ກໍເປັນປີທີ່ສອງປະເທດຈີນ-ລາວ ໄດ້ຮັບໝາກຜົນອັນພົ້ນເດັ່ນໃນການສ້າງຄູ່ຮ່ວມຊະຕາກຳເຮັດໃຫ້ການຮ່ວມມືຈີນ-ລາວໄດ້ຮັບການພັດທະນາຂຶ້ນອີກບາດກ້າວໃໝ່.

 ນອກນີ້ຍັງມີຫຼາຍໂຄງການຮ່ວມມືທີ່ມີຄວາມຄືບໜ້າຢ່າງຊັດເຈນເຊັ່ນ: ທາງດ່ວນວຽງຈັນ-ວັງວຽງ ໄດ້ເປີດນຳໃຊ້ຕາມເວລາທີ່ກຳນົດ, ໂຮງກັ່ນນໍ້າມັນແຫ່ງທຳອິດຂອງລາວໄດ້ເລີ່ມເປີດການຜະລິດໃນໄລຍະທຳອິດ, ໂຄງການກໍ່ສ້າງເຂື່ອນໄຟຟ້ານໍ້າອູໃກ້ຈະສຳເລັດສົມບູນ, ການຮ່ວມມໜຶ່ງແລວໜຶ່ງເສັ້ນທາງໄດ້ຮັບການພັດທະນາຢ່າງໄວວາ, ການດຳເນີນແຜນແມ່ບົດວ່າດ້ວຍການສ້າງຄູ່ຮ່ວມຊະຕາກຳ ຈີນ-ລາວ ກໍໄດ້ຮັບການຈັດຕັ້ງຜັນຂະຫຍາຍຕາມລຳດັບ.

   ໂອກາດດຽວກັນ, ທ່ານ ສຸກັນ ບຸນຍົງ ກໍໄດ້ສະແດງຄວາມຊົມເຊີຍຕໍ່ບໍລິສັດກໍ່ສ້າງທາງລົດໄຟ ສປ ຈີນ ທີ່ຕັ້ງໜ້າເຮັດບົດບາດຂອງຕົນໃນການວາງລາງລົດໄຟສຳເລັດແລ້ວ 240 ກິໂລແມັດ ຊຶ່ງຖືວ່າເປັນຫົວໜ່ວຍການຜະລິດທີ່ສຳຄັນ ແລະທັນສະໄໝພັກ-ລັດຖະບານລາວໄດ້ມີຄວາມເປັນຫ່ວງເປັນໄຍ ແລະເອົາໃຈໃສ່ຊີ້ນຳໂຄງການນີ້  ຕະຫຼອດມາເນື່ອງຈາກເປັນໂຄງການສຳຄັນເພື່ອປະກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນບັນດາເຜົ່າຢູ່ແຂວງຫຼວງພະບາງກໍຄືການພັດທະນາເສດຖະກິດຂອງຊາດໃຫ້ບັນລຸຜົນສຳເລັດຕາມຄາດໝາຍ.

ເສັ້ນທາງລົດໄຟ ລາວ-ຈີນ ມີຄວາມຍາວທັງໝົດ 422,4 ກິໂລແມັດ ນັບຈາກນະຄອນຫຼວງວຽງຈັນຫາບໍ່ເຕ່ນແຂວງຫຼວງນໍ້າທາໂດຍແມ່ນໂຄງການຮ່ວມມືຍຸດທະສາດທີ່ຜູ້ນຳສູງສຸດຂອງສອງພັກ, ສອງລັດໄດ້ຕັດສິນໃຈຊຸກຍູ້ສົ່ງເສີມທັງເປັນສ່ວນໜຶ່ງທີ່ສຳຄັນຂອງຕາໜ່າງລົດໄຟອາຊີການຮ່ວມມືພັດທະນາເສັ້ນທາງລົດໄຟ ລາວ-ຈີນ ແມ່ນມີຄວາມໝາຍອັນເລິກເຊິ່ງທັງເປັນການເພີ່ມທະວີສາຍພົວພັນມິດຕະພາບຂອງປະຊາຊົນສອງຊາດທີ່ມີມາແຕ່ຍາວນານ ແລະຍັງສະແດງໃຫ້ເຫັນຕົວຈິງເຖິງຄູ່ ຮ່ວມຊະຕາກຳ ຈີນ-ລາວ ອີກດ້ວຍ.

แชร์