ອັດຕະປື ສົ່ງເສີມປະຊາຊົນຜະລິດເປັນສິນຄ້າດ້ວຍ 2 ຮູບການ

  ເພື່ອເປັນການຫຼຸດຜ່ອນການນໍາເຂົ້າສະບຽງອາຫານຈາກຕ່າງແຂວງ ແລະຕ່າງປະເທດປະຈຸບັນຄະນະພັກອໍານາດການປົກຄອງແຂວງອັດຕະປືໄດ້ສຸມໃສ່ຊຸກຍູ້ ແລະສົ່ງເສີມປະຊາຊົນຜະລິດເປັນສິນຄ້າດ້ວຍ 2 ຮູບແບບຄື: ແບບທົ່ວໄປ ແລະແບບມີຈຸດສຸມ, ຊຶ່ງທັງ 2 ຮູບແບບດັ່ງກ່າວເຮັດໃຫ້ການຜະລິດເປັນສິນຄ້າຂອງປະຊາຊົນໄດ້ຮັບຜົນສໍາເລັດ ແລະເພີ່ມຜົນຜະລິດໄດ້ຫຼາຍສົມຄວນ .

  ທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະປ່າໄມ້ແຂວງອັດຕະປືໄດ້ກ່າວລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງອັດຕະປື ຊຸດທີ 1 ເມື່ອບໍ່ດົນມານີ້ວ່າ: ປະຈຸບັນການຜະລິດເປັນສິນຄ້າພາຍໃນແຂວງອັດຕະປືພວມໄດ້ການຈັດຕັ້ງປະຕິບັດຢ່າງມີປະສິດທິຜົນຊຶ່ງອໍານາດການປົກຄອງແຂວງກໍ່ຄືພະແນກກະສິກໍາ ແລະປ່າໄມ້ແຂວງອັດຕະປືໄດ້ສຸມໃສ່ຊຸກຍູ້ສົ່ງເສີມປະຊາຊົນຊາວກະສິກອນໃນທົ່ວແຂວງສຸມໃສ່ການຜະລິດເປັນສິນຄ້າດ້ວຍ 2 ຮູບ ແບບຄື: ສົ່ງເສີມໃຫ້ປະຊາຊົນປູກພືດເປັນສິນຄ້າແບບທົ່ວໄປ: ຊຶ່ງມີທັງໝົດ 1.342 ເຮັກຕາ ຜົນຜະລິດໄດ້ 2.599 ໂຕນ ໃນນັ້ນປູກໝາກແໜ່ງເນື້ອທີ່ມີ 1.149 ເຮັກຕາ, ເນື້ອທີ່ໃຫ້ຜົນ 579 ເຮັກຕາ, ເນື້ອທີ່ອ່ອນ 520 ເຮັກຕາ ຜົນຜະລິດໄດ້ 392 ໂຕນ, ປູກໝາກກ້ວຍເນື້ອທີ່ 54 ເຮັກຕາ ຜົນຜະລິດໄດ້ 1.301 ເຮັກຕາ, ປູກໝາກນັດເນື້ອທີ່ 23 ເຮັກຕາ ຜົນຜະລິດໄດ້ 171 ໂຕນ, ປູກງາເນື້ອທີ່ 3 ເຮັກຕາ, ຜົນຜະລິດໄດ້ 3 ໂຕນ, ໝາກໂມ 78 ເຮັກຕາ,ຜົນຜະລິດ 645 ໂຕນ, ປະ ເພດຖົ່ວຂຽວ,ເຫຼືອງ,ດິນ 13 ເຮັກຕາ, ຜົນຜະລິດໄດ້ 34 ໂຕນ ແລະຢາສູບ 22 ເຮັກຕາ, ຜົນຜະລິດໄດ້ 54 ໂຕນ, ທຽບໃສ່ປີຜ່ານມາປະຕິບັດໄດ້ 98%, ສ່ວນຮູບແບບທີ 2ແມ່ນສົ່ງເສີມປະຊາຊົນປູດພືດເປັນສິນຄ້າແບບຈຸດສຸມ: ເນື້ອທີ່ມີທັງໝົດ 10.596ເຮັກຕາຜົນຜະລິດໄດ້216.569 ໂຕນໃນນັ້ນກາເຟເນື້ອທີ່ມີ 1.500 ເຮັກຕາ, ເນື້ອທີ່ໃຫ້ຜົນມີ 901 ເຮັກຕາ, ເນື້ອທີ່ ອ່ອນມີ 579 ເຮັກຕາ,ຜົນຜະລິດໄດ້ 1.102 ໂຕນ,ສາລີແຂງມີເນື້ອ ທີ່ 148 ເຮັກຕາຜົນຜະລິດໄດ້ 867 ໂຕນ, ມັນຕົ້ນເນື້ອທີ່ 7.213 ເຮັກຕາ ຜົນຜະລິດໄດ້ 210.230 ໂຕນ, ເຂົ້າ 1.735 ເຮັກຕາ, ຜົນຜະລິດ 4.369 ໂຕນທຽບໃສ່ປີຜ່ານມາລື່ນແຜນ 81%, ນອກນັ້ນຍັງໄດ້ສົ່ງເສີມປະຊາຊົນປູກພືດເປັນສິນຄ້າຮ່ວມກັບບໍລິສັດໃນຮູບແບບ 2 ບວກ 3 ຊຶ່ງພວມກໍາລັງໄດ້ຮັບຜົນດີ ແລະ ມີຫຼາຍຄອບຄົວກໍ່ໄດ້ເຂົ້າຮ່ວມທໍາການຜະລິດກັບບໍລິ ສັດ.

   ທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ແຂວງອັດຕະປືຍັງໄດ້ກ່າວຕື່ມວ່າ: ໃນປີ 2021 ໜ້ານີ້ທາງພະແນກກະສິກໍາ ແລະປ່າໄມ້ ແຂວງອັດຕະປືຈະຊຸກຍູ້ສົ່ງເສີມປະຊາ ຊົນປູກພືດເປັນສິນຄ້າແບບທົ່ວ ໄປໃຫ້ໄດ້ 1.339 ເຮັກຕາ, ຄາດຄະ ເນຜົນຜະລິດໃຫ້ໄດ້ປະມານ 1.377 ໂຕນ, ໂດຍຈະໃຫ້ປະຊາຊົນປູກໝາກຖົ່ວເຫຼືອງ,ຖົ່ວຂຽວ, ຖົ່ວດິນ, ໝາກນັດ,ໝາກໂມ, ຢາສູບ,ໄມ້ໃຫ້ໝາກ ແລະໝາກແໜ່ງ,ສ່ວນປູກພືດເປັນສີນຄ້າແບບມີຈຸດສຸມໃຫ້ໄດ້ 10.500 ເຮັກຕາ, ຄາດຄະເນຜົນຜະລິດໃຫ້ໄດ້ 149.238 ໂຕນ, ໂດຍຈະໃຫ້ປະຊາຊົນປູກກາເຟ, ປູກເຂົ້າ, ສາລີແຂງແລະມັນຕົ້ນ.

-----------------

ຂ່າວ: ວັດທະນາ ຂ.ອັດຕະປື, ຮູບພາບ: ໜັງສືພິມເສດຖະກິດ-ສັງຄົມ

แชร์