ທ່ອງທ່ຽວເມືອງໄຊຍະສ້າງລາຍຮັບ ໄດ້ 22,66 ຕື້ກີບ

  ວັນທີ 24 ທັນວາ 2020 ເມືອງໄຊຍະບູລີ ໄດ້ຈັດກອງປະຊຸມການສ້າງຕັ້ງທຸລະກິດເຮືອນພັກ, ຮ້ານອາຫານ, ຮ້ານກິນດື່ມ, ຮ້ານບັນເທີງ ແລະຮ້ານຄາລະໂອເກະທີ່ຫ້ອງປະຊຸມຫ້ອງວ່າການເມືອງໂດຍການເປັນປະທານຂອງທ່ານ ນາງ ພິລາວັນ ອົງແກ້ວ ຮອງເຈົ້າ ເມືອງໄຊຍະບູລີ ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມຂັ້ນເມືອງ,ມີກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ຄະນະກຳມະການຄຸ້ມຄອງທຸລະກິດການທ່ອງທ່ຽວຂັ້ນເມືອງ, ນັກທຸລະກິດ, ຜູ້ປະກອບການ ແລະນາຍບ້ານ 24 ບ້ານເທສະບານເຂົ້າຮ່ວມ.

 ທ່ານ ພອນພິລຸນ ປິ່ນທິບ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງໄດ້ຂຶ້ນຜ່ານບົດລາຍງານການຈັດຕັ້ງປະຕິບັດວຽກງານການທ່ອງທ່ຽວໃຫ້ຮູ້ວ່າ: ເມືອງໄຊຍະບູລີ ເປັນເມືອງໃຈກາງເທສະບານຂອງແຂວງປະກອບມີ 78 ບ້ານ ປະກອບ ມີ 8 ເຜົ່າຄື: ເຜົ່າລາວ, ເຜົ່າມົ້ງ, ເຜົ່າກຶ່ມມຸ, ເຜົ່າໄທດຳ, ເຜົ່າອີວ ມຽນ, ເຜົ່າໄປຣ່,ເຜົ່າຍວນ ແລະເຜົ່າລື້,ດ້ານວຽກງານທ່ອງທ່ຽວທົ່ວເມືອງມີແຫຼ່ງທ່ອງທ່ຽວທັງໝົດ ມີ 27 ແຫ່ງ ໃນນີ້ແຫຼ່ງທ່ອງທ່ຽວດ້ານວັດທະນະທໍາມີ 6 ແຫ່ງ, ແຫຼ່ງທ່ອງທ່ຽວທໍາມະຊາດມີ 21 ແຫ່ງ ໄດ້ຮັບການພັດທະນາແລ້ວ ມີ9 ແຫ່ງ, ແຫຼ່ງທ່ອງທ່ຽວທີ່ສາມາດດຶງດູດນັກທ່ອງທ່ຽວເຂົ້າມາທ່ຽວຊົມຫຼາຍກວ່າໝູ່ແມ່ນຖໍ້າລອດນອກຈາກນັ້ນຍັງມີກິດຈະກຳຂີ່ເຮືອຊົມວິວທຳມະຊາດສອງຝັ່ງໜ້າເຂື່ອນນໍ້າຂອງໄຊຍະບູລີ,ໃນໜຶ່ງປີຜ່ານມາມີນັກທ່ອງທ່ຽວເຂົ້າມາທັງໝົດ 52.273 ຄົນ, ສ້າງລາຍຮັບທັງໜົດ 22,66 ຕື້ກີບ ຫຼື ປະມານ 2,43 ລ້ານໂດລາ ທຽບໃສຊຸມປີກ່ອນ ເຫັນວ່າຫຼຸດລົງ (ສາເຫດຍ້ອນໄດ້ຮັບຜົນກະທົບຈາກການແຜ່ລະບາດຂອງພະຍາດ Covid-19), ມີເຮືອນພັກ 72 ແຫ່ງ,ແຂວງຄຸ້ມຄອງ 3 ແຫ່ງ, ທຽບໃສ່ປີຜ່ານມາເພີ່ມຂຶ້ນ 2 ແຫ່ງລວມມີ 499 ຫ້ອງ, 912 ຕຽງ, ສາມາດຮັບຮອງແຂກໄດ້ 1.990 ຄົນ, ສວນອາຫານ: ມີ 10 ແຫ່ງ, ຮ້ານຊີ້ນດາດມີ 5 ແຫ່ງ, ຮ້ານບັນເທີງ: ມີ 2 ແຫ່ງ, ຮ້ານກິນດື່ມ 5 ແຫ່ງ, ຄາລາໂອເກະ 3 ແຫ່ງ.

 ພ້ອມນີ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບລົງຕິດຕາມກວດກາບັນດາຫ້າງຮ້ານບໍລິການ, ຮ້ານກິນດື່ມ ແລະຮ້ານບັນເທີງຕ່າງໆໃນເທສະບານເມືອງຜ່ານຂໍ້ຕົກລົງວ່າດ້ວຍການຄຸ້ມຄອງວຽກງານວັດທະນະທໍາ ແລະທຸລະກິດການການທ່ອງທ່ຽວ ເລກທີ 756/ຈຂ.ຊຍ, ລົງວັນທີ 24 ກໍລະກົດ 2018 ຜ່ານດໍາລັດວ່າດ້ວຍການບັນເທີງເລກທີ 315/ລບ,ລົງວັນທີ 2 ຕຸລາ 2017; ຜ່ານຂໍ້ຕົກລົງວ່າດ້ວຍການຄຸ້ມຄອງທຸລະກິດພັດຕະຄານ, ຮ້ານອາຫານ, ສວນອາຫານ ແລະຮ້ານກິນດື່ມສະບັບເລທີ 059/ອທຊ, ລົງວັນທີ 26 ກຸມພາ 2007.

  ຈາກນັ້ນທ່ານ ບຸດສະດີ ໄຊອຸດົມ ຮອງຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງວ່າດ້ວຍການແຕ່ງຕັ້ງກຸ່ມເຮືອນພັກ,ຮ້ານອາຫານ,ຮ້ານກິນດຶ່ມ, ຮ້ານບັນເທີງ ແລະຄາລະໂອເກະເມືອງໄຊຍະບູລີປະກອບມີທັງໝົດ 11 ກຸ່ມ ພ້ອມທັງໃຫ້ແຕ່ລະກຸ່ມຈັບມືແຂ່ງຂັນກັນຕອນທ້າຍກອງປະຊຸມທ່ານ ນາງ ພິລາວັນ ອົງແກ້ວ ຮອງເຈົ້າເມືອງໄຊຍະບູລີຜູ້ຊີ້ນຳວຽກງານຂົງເຂດວັດທະນະທຳ-ສັງຄົມຂັ້ນເມືອງກໍ່ໄດ້ໃຫ້ກຽດໂອ້ລົມຕື່ມອີກ.

------------

ຂ່າວ: ສົມພົງສີສະຫວັດ

ຮູບພາບ: ໜັງສືພິມເສດຖະກິດ-ສັງຄົມ

แชร์