ຫຼວງພະບາງກຽມພັດທະນາພື້ນທີ່ສາທາລະນະເປັນພື້ນທີ່ສີຂຽວ

  ພິທີເຊັນບົດບັນທຶກຄວາມເຂົ້າໃຈໂຄງການຮ່ວມມືປັບປຸງພື້ນທີ່ສາທາລະນະເປັນພື້ນທີ່ສີຂຽວລະຫວ່າງຫ້ອງວ່າການນະຄອນຫຼວງພະບາງ ແລະບໍລິສັດສວນດອກເຜິ້ງໄດ້ຈັດຂຶ້ນໃນວັນທີ 25 ທັນວາ 2020 ທີ່ຫ້ອງປະຊຸມນະຄອນຫຼວງພະບາງລະຫວ່າງທ່ານ ບຸນເພັດ ທະວີສັກ ຫົວໜ້າຫ້ອງວ່າການນະຄອນຫຼວງພະບາງກັບ ທ່ານ ອິນແຫຼງ ວົງສຸວັນ ອຳນວຍການບໍລິສັດ ສວນດອກເຜິ້ງ ໂດຍມີ ທ່ານ ຈັນສຸກ ພັນໂດລັກ ເຈົ້ານະຄອນຫຼວງພະບາງພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າ ຮ່ວມ.

  ທ່ານ ອິນແຫຼງ ວົງສຸວັນ ກ່າວວ່າ: ໂຄງການຮ່ວມມືປັບປຸງພື້ນທີ່ສາທາລະນະເປັນພື້ນທີ່ສີຂຽວລະຫວ່າງຫ້ອງວ່າການນະຄອນຫຼວງພະບາງ ແລະ ບໍລິສັດ ສວນດອກເຜິ້ງ ແມ່ນປະຕິບັດຕາມແຜນພັດທະນາເສດຖະກິດ-ສັງຄົມ ຂອງກອງປະຊຸມໃຫຍ່ອົງຄະນະພັກນະຄອນຫຼວງພະບາງ ຄັ້ງທີ VII ແລະແຜນແມ່ບົດໃນການວາງແນວທາງພັດທະນານະຄອນຫຼວງພະບາງໃຫ້ກາຍເປັນນະຄອນພື້ນທີ່ສີຂຽວ ແລະຮັກສາສິ່ງແວດລ້ອມອ້ອມທົ່ວເທສະບານໃຫ້ມີຄວາມສະອາດງາມຕາ, ສວຍງາມສົມກັບເປັນເມືອງມໍລະດົກໂລກ ແລະເປັນໃບໜ້າອັນໃໝ່ຂອງນະຄອນຫຼວງພະບາງກໍຄືແຂວງຫຼວງພະບາງ.

   ໂດຍບໍລິສັດສວນດອກເຜິ້ງເປັນຜູ້ລົງທຶນໃສ່ໂຄງການພຽງຜູ້ດຽວ, ເພື່ອພັດທະນາພື້ນທີ່ສາທາລະນາໃຫ້ມີຄວາມສວຍສົດງົດງາມ, ສະອາດງາມຕາໂດຍສະເພາະແມ່ນຈຸດທີ່ຍັງບໍ່ໄດ້ຮັບການພັດທະນາ ແລະເປັນພື້ນທີ່ເປົ່າວ່າງເພື່ອຫຼຸດຜ່ອນການແບກຫາບຂອງພາກລັດກໍຄືນະຄອນຫຼວງພະບາງໃນການໃຊ້ງົບປະມານຂອງລັດເຂົ້າໃນການພັດທະນາພື້ນທີ່ສາທາລະນະທົ່ວນະຄອນຫຼວງພະບາງ ແລະທຸກຝ່າຍໄດ້ຮັບຜົນປະໂຫຍດຮ່ວມກັນເຊັ່ນ: ລັດ, ບໍລິສັດແລະປະຊາຊົນທັງຮັບປະກັນການພັດທະນາພື້ນທີ່ສາທາລະນະໃຫ້ເປັນພື້ນທີ່ສີຂຽວຕາມແຜ່ນ ພັດທະນາເສດຖະກິດ-ສັງຄົມ ຂອງນະ ຄອນຫຼວງພະບາງ ໃຫ້ມີໃບໜ້າອັນໃໝ່ ສວຍສົດງົດງາມ, ສະອາດງາມຕາ ແລະ ອີກຢ່າງໜຶ່ງກໍ່ແນໃສ່ແຜ່ນພັດທະນາຂອງນະຄອນຫຼວງພະບາງໃຫ້ກາຍເປັນເມືອງທີ່ທັນສະໄໝໜ້າຢູ່ (Smart City) ໃນຂັ້ນຕໍ່ໄປ.

   ໂອກາດນີ້ ທ່ານ ຈັນສຸກ ພັນໂດລັກ ກໍໄດ້ມີຄຳເຫັນວ່າການເຊັ່ນບົດບັນທືກຄັ້ງນີ້ເປັນການສືບຕໍ່ປະຕິບັດຕາມການຕົກລົງຂອງຄະນະນຳຂັ້ນແຂວງ ແລະ ການເຫັນດີເປັນເອກະພາບຂອງນະຄອນ-ຫຼວງພະບາງ ຕົກລົງໃຫ້ບໍລິສັດສ່ວນດອກເຜິ້ງເປັນຜູ້ເຊົ່າສຳປະທານພື້ນທີ່ເປົ່າຫວ່າງແຄມທາງສົ້ນເດີ່ນສະໜາມບິນຫຼວງພະບາງ (ເບື້ອງໃຕ້) ໃຫ້ບູລະນະເປັນສວນສາທາລະນະແລະພັດທະນາເປັນພື້ນທີ່ສີຂຽວ, ເປັນບ່ອນຈຳໜ່າຍດອກໄມ້ປະດັບເພື່ອໃຫ້ມີຄວາມສວຍສົດງົດງາມເປັນເວລາ 15 ປີ ພ້ອມນີ້, ທ່ານຍັງໄດ້ເນັ້ນເຈົ້າຂອງໂຄງການ ແລະຜູ້ສຳປະທານຈົ່ງສືບຕໍ່ປະສານສົມທົບກັນຢ່າງກົມກ່ຽວໃນປັບປຸງພື້ນທີ່ດັ່ງກ່າວໃຫ້ກາຍເປັນພື້ນທີ່ສີຂຽວ ແລະຮັກສາໄດ້ສິ່ງແວດລ້ອມທີ່ຍືນຍົງ.

--------------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์