ຫາລືການພັດທະນາການສືກສາຊັ້ນສູງ

 ວັນທີ 24 ທັນວາ ຜ່ານມາທີ່ຫ້ອງປະຊຸມຫ້ອງວ່າການປົກຄອງເມືອງທ່າປາງທອງ ມະຫາວິທະຍາໄລສະຫວັນນະເຂດ (ມຂ) ຮ່ວມກັບພະແນກສຶກສາທິການ ແລະກີລາແຂວງສະຫວັນນະເຂດໄດ້ຈັດກອງປະຊຸມພາຍໃຕ້ຫົວຂໍ້: ການພັດທະນາການສືກສາຊັ້ນສູງພາຍໃຕ້ການເປັນປະທານຂອງ ທ່ານ ບຸນຍົງ ຍົດສີຟອງ ຮອງເຈົ້າເມືອງທ່າປາງທອງ,ທ່ານ ສຸກສົມ ພອນອະໂນໄທ ຮອງຄະນະບໍດີສືກສາສາດ ມຂ, ບັນດາທ່ານໃນຄະນະປະຈໍາພັກເມືອງກໍາມະການພັກເມືອງ,ຫົວໜ້າ-ຮອງຫ້ອງການອ້ອມຂ້າງທົ່ວເມືອງ, ຜູ້ອຳນວຍການໂຮງຮຽນເຂົ້າຮ່ວມ.

  ທ່ານ ບຸນຍົງ ຍົດສີຟອງ ຮອງເຈົ້າເມືອງທ່າປາງທອງກ່າວວ່າ: ພາຍໃນເມືອງທ່າປາງທອງມີນັກສືກສາຈົບຊັ້ນມປາຍໃນສົກປີ 2019-2020 ປະມານ 192 ຄົນ, ແຕ່ສີ່ງທີ່ກອງປະຊຸມຄວນພິຈາລະນາຄື: ສະຖິຕິເຂົ້າຮຽນຕໍ່ລະດັບມະຫາວິທະຍາໄລ ໂດຍສະເພາະຢູ່ ມຂ ໃນໄລຍະຜ່ານມາມີພຽງແຕ່ 41 ຄົນ (ນີ້ເປັນຂໍ້ມູນຈາກບົດສະຫຼຸບ 10 ຂອງມຂ) ແລະ ໃນສົກສືກສາ 2020-2021 ມີພຽງ 4 ຄົນ ທີ່ເສັງເຂົ້າ ມຂ ກວມເອົາພຽງແຕ່ 3%, ສະນັ້ນການຈັດກອງປະຊຸມການເຜີຍແຜ່ວຽກ ງານສຶກສາຊັ້ນສູງໃນຄັ້ງນີ້ຈະຊ່ວຍຊີ້ໃຫ້ເຫັນເຖິງບັນຫາສາເຫດ ແລະແນວທາງໃນການພັດທະນາສຶກສາພາຍໃນເມືອງທ່າປາງທອງໃນຕໍ່ໜ້າທັງນີ້ກໍ່ເພື່ອເຮັດໃຫ້ຜູ້ເຂົ້າ ຮ່ວມໄດ້ຮັບຮູ້ແລະເຂົ້າໃຈກ່ຽວກັບວຽກງານການພັດທະນາການສຶກສາຊັ້ນສູງເພື່ອໃຫ້ຊ່ວຍວາງແຜນ ແລະຊອກຫາວິທີແກ້ໄຂໃຫ້ນັກຮຽນໄດ້ເຂົ້າເຖິງການສຶກສາຊັ້ນສູງ.

  ໂອກາດນີ ທ່ານ ສຸກສົມພອນ ອະໂນໄທ ຮອງຄະນະບໍດີສືກສາສາດ ມຂ ກ່າວວ່າ: ການສຶກສາຊັ້ນສູງນັ້ນແມ່ນການສຶກສາຖັດຈາກຊັ້ນມັດທະຍົມຕອນປາຍ ຫຼືວິຊາຊີບຊັ້ນກາງໂດຍເລີ່ມແຕ່ລະດັບອະນຸປະລິນຍາຈົນເຖິງປະລິນຍາເອກສຳລັບມະວິທະຍາໄລສະຫວັນນະເຂດກໍ່ແມ່ນ 1 ໃນ 4ຂອງມະຫາວິທະຍາໄລຂອງປະເທດທີ່ຂຶ້ນກັບກະ ຊວງສຶກສາທິການ ແລະກີລາ ໂດຍມີຍຸດທະສາດເພື່ອສ້າງພື້ນຖານໃຫ້ເປັນມະຫາວິທະຍາໄລທີ່ ທັນສະໄໝເຊື່ອມໂຍງກັບພາກພື້ນ ສາກົນ, ລົງເລິກສ້າງຄວາມເປັນເລີດດ້ານການບໍລິການ,ດ້ານການຂົນສົ່ງປະຈຸບັນມະຫາວິທະຍາໄລສະຫວັນນະເຂດມີ 8 ຄະນະວິຊາຄືຄະນະກະເສດສາດ ແລະສິ່ງແວດລ້ອມ,ພາສາສາດ ແລະມະນຸດສາດ, ບໍລິຫານທຸລະກິດ, ເຕັກໂນໂລຊີຂໍ້ມູນຂ່າວສານ, ວິທະຍາສາດອາຫານ, ວິທະຍາສາດທຳມະສາດ, ສຶກສາສາດ ແລະຄະນະວິສາວະກຳສາດ.

  ກອງປະຊຸມໃນຄັ້ງນີ້ ໄດ້ຊີ້ ໃຫ້ເຫັນສະພາບການສຶກສາຊັ້ນສູງໃນລະດັບເມືອງພາຍໃນແຂວງສະຫວັນນະເຂດ, ລະດັບປະເທດພາກພື້ນ ແລະສາກົນພ້ອມນີ້ກໍ່ໄດ້ມີການສົນທະນາປຶກສາຫາລືເນັ້ນໜັກການແລກປ່ຽນບົດຮຽນໃນ 3 ບັນຫາທີ່ສໍາຄັນຄື: ບັນຫາການພັດທະນາຊັບພະຍາກອນມະນຸດພາຍໃນເມືອງ ແລະບົດຮຽນຕ່າງໆ, ບັນ ຫາ ແລະອຸປະສັກໃນການເຂົ້າເຖິງການສຶກສາຊັ້ນສູງ ແລະແນວທາງໃນການແກ້ໄຂບັນຫາໃນຕໍ່ໜ້າບົນພື້ນຖານທ່າແຮງບົ່ມຊ້ອມຂອງທ້ອງຖິ່ນການລົງເຜີຍແຜ່ຂອງມະ ຫາວິທະຍາໄລສະຫວັນນະເຂດໃນຄັ້ງນີ້ກໍ່ເພື່ອໃຫ້ຜູ້ເຂົ້າຮ່ວມຮັບຮູ້ ແລະ ເຂົ້າໃຈກ່ຽວກັບວຽກງານການພັດທະນາສຶກສາຊັ້ນສູງຂອງນັກຮຽນທີ່ຈົບມປາຍທີ່ນັບມື້ນັບເພີ່ມ ຂຶ້ນ.

แชร์