ແຕ່ນີ້ຫາ 2025 ນະຄອນຫຼວງວຽງຈັນຈະສຸມພັດທະນາ 8 ແຜນງານ ແລະ 30 ໂຄງການລະດັບຊາດ

   ນະຄອນຫຼວງວຽງຈັນ ເມືອງເອກ ຂອງ ສປປ ລາວ ທີ່ມີພົນລະເມືອງອາໄສຢູ່ຢ່າງໜ້າແໜ້ນ, ພື້ນຖານໂຄງລ່າງທີ່ທັນສະໄໝກໍພວມເກີດຂຶ້ນຢູ່ລະດັບແຖວໜ້າຂອງປະເທດໂດຍສະເພາະແມ່ນທາງລົດໄຟ ແລະ ທາງດ່ວນແຕ່ສິ່ງທີ່ສັງຄົມເລັ່ງທວງໃໝ່ແມ່ນຕ້ອງການຫັນປ່ຽນໃນການພັດທະນາໃຫ້ສົມກັບເມືອງຫຼວງຂອງປະເທດເຮັດໃຫ້ເທສະບານຫຼຸດພົ້ນຈາກຄວາມດ້ອຍພັດທະນາທາງດ້ານພື້ນຖານໂຄງລ່າງໂຍທາທິການ, ຍົກຖານະການເງິນໃຫ້ເຂັ້ມແຂງສາມາດແກ້ໄຂໜີ້ສາທາລະນະ ແລະ ຕ້ອງມຸ້ງໜ້າສູ່ການພັດທະນາໃນວົງຈອນຄວາມທັນສະໄໝ, ສ້າງຊັບພະຍາກອນມະນຸດ ແລະຍົກສູງຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນຕົ້ນຄອບຄົວທຸກ ຍາກໃຫ້ມີວຽກເຮັດງານທຳ, ມີລາຍໄດ້ ແລະ ຫ້ອງເຮືອນຢູ່ອາໄສແນວໃດກໍດີເພື່ອແນໃສ່ໃຫ້ບັນລຸເປົ້າໝາຍຂອງການພັດທະນາຄືດັ່ງກ່າວແຕ່ປີ 2021-2025 ນະ ຄອນຫຼວງວຽງຈັນຈະໄດ້ສຸມໃສ່ 8 ແຜນງານ ແລະ 30 ໂຄງການໃຫຍ່ລະດັບຊາດ.

   ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ທີ່ຈັດຂຶ້ນລະຫວ່າງວັນທີ 28-30 ທັນວາ 2020 ນີ້ຮູ້ວ່າ:ເພື່ອແນໃສ່ບັນລຸເປົ້າໝາຍຂອງການພັດທະນາແຕ່ປີ 2021-2025 ນະຄອນຫຼວງວຽງຈັນຈະໄດ້ສຸມໃສ່ 8

   ແຜນງານຄື: ແຜນງານພັດທະນາຊັບພະຍາກອນມະມຸດ 2020-2030, ສືບຕໍ່ໂຄງການຜະລິດສິນຄ້າປາຍແຫຼມ 10 ໂຄງການ, ສືບຕໍ່ແຜນງານປ້ອງກັນ ແລະ ແກ້ໄຂລົດຕິດຕາມທ້ອງຖະໜົນ (Traffic Jams), ໂຄງການສ້າງຕົວເມືອງອັດສະລິຍະ, ແຜນງານ ແລະໂຄງການແກ້ໄຂຄວາມດ້ວຍພັດທະນາດ້ານພື້ນຖານໂຄງລ່າງໃນຕົວເມືອງ ແລະຊານເມືອງ, ແຜນງານແກ້ໄຂປາກົດການຫຍໍ້ທໍ້ໃນສັງຄົມ (ອຸບັດເຫດ,ຢາເສບຕິດໄພສັງຄົມອື່ນໆ) ແລະແຜນງານປ້ອງກັນໄພພິບັດທາງທຳມະ ຊາດ ແລະແຜນງານຈັດສັນເຂດນຳໃຊ້ທີ່ດິນ 8 ປະເພດທາງພາກສະໜາມ.

   ສ່ວນໂຄງການໃຫຍ່ລະດັບຊາດແມ່ນມີ 30 ໂຄງການຄື: ໂຄງການພັດທະນາຄອງນໍ້າວຽງຈັນ (PPP), ໂຄງການສ້າງນິຄົມກະເສດໃໝ່ລຸ່ມອ່າງຊົນລະປະທານນໍ້າຊວງ-ນໍ້າຫຸມ (ເມືອງນາຊາຍທອງ), ນໍ້າມັງ-ນໍ້າງື່ມ ເມືອງໄຊທານີ (PPP), ໂຄງການທົ່ງຮາບທ່າງ່ອນ, ໂຄງການໂຄກສາ-ນາບົງ ແລະໂຄງການອື່ນໆ ເພື່ອຜະລິດເຂົ້າເປັນສິນຄ້າເນື້ອທີ່ປະມານ 20 ພັນເຮັກຕາ, ໂຄງການກໍ່ສ້າງທາງລົດໄຟ, ສະຖານທີ່ລົດໄຟແຫ່ງຊາດ ແລະໂຄງການຍ່ອຍເຊື່ອມຕໍ່ໄລຍະນະຄອນຫຼວງໂຄງການກໍ່ ສ້າງໂລຈິສຕິກເຊື່ອມໂຍງ-ເຊື່ອມຈອດກັບທາງລົດໄຟ ແລະທາງດ່ວນ, ໂຄງການທາງດ່ວນວຽງຈັນ-ທ່າແຂກ, ໂຄງການກໍ່ສ້າງເສັ້ນທາງວຽງຈັນໝາຍເລກ 1 (BTO) (ສືບຕໍ່) ແລະໂຄງການທາງດ່ວນວຽງຈັນໝາຍເລກ 2 ດອນໜູນ-ບ້ານຄູນນ້ອຍ, ໂຄງການທາງດ່ວນວຽງຈັນ ຕາມເສັ້ນທາງເລກ 10 ໂຄງ ການກໍ່ສ້າງຂົວຂ້າມນໍ້າງື່ມແຫ່ງໃໝ່, ໂຄງການຍົກລະດັບເສັ້ນທາງເກົ່າເສັ້ນທາງແຕ່ 3 ແຍກສີໄຄ-ເມືອງໂພໂຮງ ແລະເສັ້ນທາງບ້ານຫ້ອມ-ບ້ານທ່າແຂກ, ໂຄງການສ້າງເຂື່ອນໄຟຟ້ານໍ້າງື່ມ ຕອນລຸ່ມບ້ານພ້າວເມືອງປາກງື່ມ, ໂຄງການປ້ອງກັນຕະຝັງເຈື່ອນ ແລະພັດທະນາແຄທຂອງໄລຍະ II ຄວາມຍາວ 12 ກິໂລແມັດ, ໂຄງການສຳຫຼວດອອກແບບ ແລະປ້ອງກັນນໍ້າຖ້ວມ, ພັດທະນາຕາມລຽບແຄມນໍ້າງື່ມ, ໂຄງການສ້າງຜັງເມືອງວຽງຈັນສະບັບທີ IV ແລະ ຕຶກຜັງເມືອງນະຄອນຫຼວງວຽງຈັນ, ໂຄງການສ້າງເຂດການຄ້າສະເພາະ ແລະສະໜອງວັດສະດຸທີ່ພວມຄົ້ນຄວ້າພື້ນທີ່ດິນ, ໂຄງການສ້າງເຂດກະສິກຳສົ່ງອອກພວມຈັດພື້ນທີ່ດິນເມືອງປາກງື່ມ,ໂຄງການພັດທະນາແຫຼ່ງທ່ອງທ່ຽວດອນກາງຂອງ-ປາກຕອນ, ນໍ້າສັງ, ໜອງອໍ້, ໜອງບົວໄໝ້, ໜອງຄຳແສນ,ໜອງແປນ ແລະໜອງອື່ນໆ,ໂຄງການ SMART CITY 6 ໂຄງການຍ່ອຍ, ໂຄງການພັດທະນາອະສັງຫາລິມະຊັບເຂດໃຈກາງເມືອງ ແລະໂຄງການວຽງຈັນສີຂຽວ ແລະສະອາດ.

แชร์