ປາກທາກຽມພັດທະນານໍ້າຕົກຕາດຫ້ວຍໄຄ້ເປັນແຫຼ່ງທ່ອງທ່ຽວ
ເມືອງປາກທາ ແຂວງບໍ່ແກ້ວ ມີສະຖານທີ່ທ່ອງທ່ຽວຫຼວງຫຼາຍທີ່ເຕັມໄປດ້ວຍຫຼາຍຮູບຫຼາຍສີເປັນຕົ້ນ: ນໍ້າຕົກຕາດຕ່າງໆ, ວັດຖຸບູຮານ ແລະສິ່ງລຶກລັບມະຫັດສະຈັນທີ່ເປັນການເລົ່າຂານກັນມາບໍ່ວ່າຈະເປັນແຫຼ່ງທ່ອງທ່ຽວທາງປະຫວັດສາດ, ທຳມະຊາດ ແລະວັດທະ ນະທຳອັນເກົ່າແກ່ແຕ່ລະຍຸກ, ແຕ່ລະສະໄໝທີ່ມີມາແຕ່ອະດີດຈົນເຖິງປະຈຸບັນ.
ໃນວັນທີ 24 ທັນວາ 2020“ຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ເມືອງປາກທາ ຊຶ່ງນຳໂດຍທ່ານ ບຸນປະສິດ ຈັນທອງໃສ ວ່າການຫົວ ໜ້າຫ້ອງການ ຖວທ ເມືອງປາກທາ ພ້ອມດ້ວຍຄະນະສົມທົບກັບອຳນາດການປົກຄອງບ້ານຫ້ວຍຊົວະລົງສຳຫຼວດຄວາມເປັນໄປໄດ້ແຫຼ່ງທ່ອງທ່ຽວນໍ້າຕົກຕາກຫ້ວຍໄຄ້ບ້ານຫ້ວຍຊົວະ.
ນໍ້າຕົກຕາກຫ້ວຍໄຄ້ບ້ານຫ້ວຍຊົວະແມ່ນມີຄວາມງົດງາມທາງດ້ານທຳມະຊາດທີ່ເກີດ ຂຶ້ນຕາມທຳມະຊາດ ແລະນີ້ອາດເປັນແຫຼ່ງທ່ອງທ່ຽວໃໝ່ໃນອະນາຄົດນີ້, ຊຶ່ງບັນຍາກາດຈະເປັນແນວໃດນັ້ນແມ່ນບໍ່ສາມາດອະທິບາຍໄດ້ເນື່ອງຈາກບັນດາທ່ານຈະໄດ້ສຳພັດກັບສະ ພາບແວດລ້ອມອ້ອມຂ້າງໂດຍສະເພາະແມ່ນທຳມະຊາດ, ພູຜາປ່າໄມ້, ສຽງນໍ້າຕົກຕາດ, ສຽງນໍ້າໄຫຼ ແລະປະກອບດ້ວຍສຽງສັດສາວາສິ່ງ ແລະນໍ້າໃສເຢັນດີໄຫຼຕະຫຼອດປີ.
ສຳລັບການເດີນສຳຫຼວດເບື້ອງຕົ້ນ: ຫ້ວຍໄຄ້ແມ່ນມີນໍ້າຕົກຕາດຢູ່ 2 ຈຸດ ແລະໄລຍະທາງຈາກເທສະບານ ເມືອງປາກທາ ຫາ ບ້ານຫ້ວຍຊົວະ 8 ກິໂລ ແລະຈາກບ້ານຫານໍ້າຕົກຕາດຈຸດທີ 1 ຍາງ ປະມານ 5 ນາທີ ຕາດມີຄວາມສູງປະມານ 15 ແມັດ ແລະຈາກຈຸດທີ 1 ຫາຕາດທີ 2 ແມ່ນປະມານ 15 ນາທີ ຊຶ່ງທາງໃນແມ່ນເປັນອຸໂມງສູງປະມານ 20 ແມັດ, ກວ້າງ 15 ແມັດ ແລະຄວາມສູງຂອງນໍ້າຕົກປະມານ 18 ແມັດ, ມີນໍ້າເລິກ ແລະນໍ້າໃສເຢັນຕະຫຼອດເວລາ.
