ນວ ເຜີຍ 4 ສາເຫດພາເກີດອຸບັດເຫດຫຼາຍກວ່າໝູ່

  ປະຈຸບັນອຸບັດຕິເຫດເກີດຂຶ້ນຕາມທ້ອງຖະໜົນ ນະຄອນຫຼວງວຽງຈັນແມ່ນນັບມື້ນັບເພີ່ມຂຶ້ນຊຶ່ງສາເຫດຫຼັກທີ່ພາໃຫ້ເກີດຫຼາຍກວ່າໝູ່ຈະລາຈອນ ປກສ ນວ ລະບຸວ່າແມ່ນ 1. ເກີດຈາກການດື່ມສິ່ງມຶນເມົາແລ້ວຂັບຂີ່ລົດ 2. ປ່ຽນທິດທາງສັນຈອນບໍ່ຮັບປະກັນ 3. ຂັບຂີ່ໄວເກີນກໍານົດ 4. ການຊີງຂຶ້ນໜ້າບໍ່ຮັບປະກັນຄວາມປອດໄພ.

   ທ່ານ ພັທ ສັງຄົມ ພົມມະລາດ ຮອງຫົວໜ້າພະແນກຕໍາຫຼວດຈະລາຈອນຫ້ອງຕໍາຫຼວດ ປກສ ນວ ໃຫ້ສໍາພາດຕໍ່ ນັກຂ່າວປກສ ນວ ໃນວັນທີ 24 ທັນວາ 2020 ວ່າ: ໃນລະຫວ່າງວັນທີ 14-20 ທັນວາ 2020 ທົ່ວ ນວ ມີອຸບັດເຫດເກີດຂຶ້ນທັງໝົດ 28 ລາຍ, ມີພາຫານະເປ່ເພ 53 ຄັນ ມີຄົນໄດ້ຮັບບາດເຈັບ 23 ຄົນ ແລະມີຄົນເສຍຊີວິດ 9 ຄົນ. 

  ຕໍ່ກັບສະພາບການດັ່ງກ່າວພະແນກຕໍາຫຼວດຈະລາຈອນ ນວ ແລະກອງຕຳຫຼວດຈະລາຈອນ 9 ຕົວເມືອງ ໄດ້ຈັດວາງກໍາລັງລົງບັນດາໜ້າວຽກເພື່ອຫຼຸດຜ່ອນອຸບັດຕິ ເຫດທີ່ຈະເກີດຂຶ້ນໂດຍສຸມໃສ່ 2 ໜ້າວຽກຄື: 1. ລົງໂຄສະນາເຜີຍແຜ່ກົດລະບຽບຈະລາຈອນ, ຫຼັກການຂັບຂີ່ປອດໄພໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງກວ້າງ ຂວາງເພື່ອປະຕິບັດກົດລະບຽບຈະລາຈອນຢ່າງເຂັ້ມງວດ 2. ເຮັດວຽກງານບັງຄັບໃຊ້ກົດໝາຍໂດຍຈະເອົາໃຈໃສ່ຕັ້ງຈຸດກວດກາຄົງທີ່, ກວດກາເຄື່ອນທີ່, ຕິດຕາມສະ ພາບການປະຕິບັດກົດລະບຽບຈະລາຈອນຂອງນັກຂັບຂີ່ຢ່າງເຂັ້ມງວດໂດຍສະເພາະຕັ້ງຈຸດກວດຕາມສາຍທາງສຳຄັນຕ່າງໆເພື່ອກວດກາທາດເຫຼົ້າ ແລະສະພາບເຕັກ ນິກລົດແນໃສ່ສະກັດກັ້ນການເກີດອຸບັດເຫດຕາມທ້ອງຖະໜົນໃຫ້ຫຼຸດໜ້ອຍຖອຍລົງເປັນກ້າວໆ.

 ພ້ອມນີ້ທ່ານຍັງໄດ້ຮຽກຮ້ອງໃຫ້ຜູ້ ໃຊ້ລົດໃຊ້ຖະໜົນຈົ່ງເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ, ເມື່ອດື່ມສິ່ງເມົາແມ່ນຫ້າມຂັບຂີ່ລົດຢ່າງເດັດຂາດ, ຖ້າຫາກດື່ມແລ້ວບໍ່ສາມາດຂັບຂີ່ລົດໄດ້ແມ່ນໃຫ້ໂທລະສັບຫາຄົນໃນຄອບຄົວມາຮັບເອົາເມືອ ຫຼືພັກຜ່ອນຢູ່ກັບບ່ອນ, ການຂັບຂີ່ລົດບໍ່ຄວນໃຊ້ຄວາມໄວເກີນກໍານົດ, ກ່ອນຈະປ່ຽນທິດທາງການສັນຈອນ, ລ້ຽວຊ້າຍ-ລ້ຽວຂວາກ່ອນຮອດເປົ້າໝາຍຕ້ອງສົ່ງໄຟສັນຍານລ່ວງໜ້າເພື່ອເຕືອນຜູ້ຂັບຂີ່ມານໍາຫຼັງຮັບຮູ້ ແລະ ກ່ອນຈະຊີງລົດຄັນອື່ນຂຶ້ນໄປທາງໜ້າຕ້ອງຮັບປະກັນຄວາມປອດໄພສາກ່ອນ ແລະ ໃນຂະນະຂັບຂີ່ລົດຫ້າມເດັດຂາດບໍ່ໃຫ້ໃຊ້ໂທລະສັບເມື່ອຂັບຂີ່ລົດໃຫຍ່ຄວນໃສ່ສາຍຮັດນິລະໄພ ແລະ ຄວນໃສ່ໝວກກັນກະທົບເມື່ອເວລາຂັບຂີ່ລົດຈັກຈຶ່ງເຮັດໃຫ້ຜູ້ໃຊ້ລົດ-ໃຊ້ຖະໜົນສັນຈອນໄປຮອດຈຸດໝາຍໄດ້ຢ່າງປອດໄພ.

 -------------

ຂ່າວ: ປກສ ນວ. ຮູບພາບ: ປກສ ນວ

แชร์