ນາຍບ້ານທົ່ວວິລະບູລີຈະຮັບເງິນອຸດໜູນຜ່ານລະບົບທັນສະໄໝ
ເພື່ອເຮັດໃຫ້ການເບີກຈ່າຍເງິນອຸດໜູນໃຫ້ນາຍບ້ານ 73 ບ້ານ ໃນທົ່ວເມືອງວິລະບູລີ ແຂວງສະຫວັນນະເຂດໄດ້ມີຄວາມສະດວກ, ວ່ອງໄວທັນໃຈ ແລະປະຢັດເວລາໂດຍສະເພາະກໍ່ແມ່ນໃນເຂດຫ່າງໄກສອກຫຼີກອົງການປົກຄອງເມືອງໄດ້ຈັບມືກັບເອກະຊົນເພື່ອນຳໃຊ້ການເບີກຈ່າຍຜ່ານລະບົບທັນສະໄໝຂອງບໍລິສັດສະຕາໂທລະຄົມ.
ການຮ່ວມມືດັ່ງກ່າວໄດ້ມີພິທີເຊັນສັນຍາຂຶ້ນໃນວັນທີ 25 ທັນວາຜ່ານມາທີ່ເມືອງດັ່ງກ່າວໂດຍເຂົ້າຮ່ວມມີທ່ານ ບຸນເນືອງ ຈັນຫອມ ຮອງເຈົ້າເມືອງວິລະບູລີຜູ້ຊີ້ນໍາວຽກງານດ້ານ ເສດຖະກິດ, ທ່ານ ຫງຽນເຖຈຸງ ຜູ້ອໍານວຍການໃຫຍ່ບໍລິສັດສະຕາໂທລະຄົມສາຂາ ແຂວງສະຫວັນນະເຂດພ້ອມດ້ວຍບັນດາທ່ານນາຍບ້ານຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ຫງຽນເຖຈຸງ ກ່າວວ່າ : ການນໍາໃຊ້ເຕັກໂນໂລຊີຂໍ້ມູນຂ່າວສານເຂົ້າໃນທຸກໆດ້ານຂອງການດໍາລົງຊີວິດໃນສັງຄົມກໍາລັງກະຈາຍໄປໃນທົ່ວໂລກ, ການຊໍາລະສະສາງເງິນໂດຍບໍ່ນໍາໃຊ້ເງິນສົດກໍາລັງປາກົດຂຶ້ນຢ່າງກວ້າງຂວາງເມື່ອເປັນແນວນັ້ນທາງກະຊວງການເງິນໄດ້ອອກໃບອະນຸຍາດໃຫ້ບໍລິສັດສະຕາໂທລະຄົມຜັນຂະຫຍາຍບໍລິການຂອງ U-Money ແລະບໍລິສັດ Star Fintech ໄດ້ຮັບການສ້າງຕັ້ງເພື່ອສະໜອງບໍລິການ U-Money; ກະຊວງການເງິນ ແລະຄັງເງິນພັກລັດແມ່ນລູກຄ້າທໍາອິດທີ່ໄດ້ເຊັນສັນຍາເພື່ອເບີກຈ່າຍ ເງິນເດືອນໃຫ້ກັບພະນັກງານ-ລັດຖອນກອນ ໃນ 10 ເມືອງຫ່າງໄກສອກຫຼີກບໍ່ມີທະນາ ຄານໂດຍເປັນເງິນຫຼາຍກວ່າ 10 ຕື້ກີບ.
U-Money ແມ່ນທະຄານເທິງມືຖືທີ່ໃຊ້ງ່າຍ, ສະດວກ, ວ່ອງໄວທັນໃຈ, ປະຢັດເວລາ,ມີຄວາມປອດໄພສູງໂດຍນໍາໃຊ້ຜ່ານສັນຍານໂທລະສັບມືຖືຂອງຢູ່ນິເທວໝາຍເລກ 020, 030 ແລະແອັບຂອງ U-Money ມີບໍລິການຫຼາຍຢ່າງເຊັ່ນ: ການໂອນເງິນ, ຖອນເງິນ, ຊໍາລະຄ່າບໍລິການຕ່າງໆ ແລະອື່ນໆອີກຫຼາຍຢ່າງຊຶ່ງວ່າການເຮັດທຸລະກໍາໃນ ແຕ່ລະຄັ້ງທາງສູນຈະສົ່ງຂໍ້ຄວາມໃຫ້ທຸກຄັ້ງເພື່ອຮັບປະກັນຄວາມປອດໄພໂດຍມາຮອດປະຈຸບັນມີຜູ້ຊົມໃຊ້ບໍລິການຂອງ U-Money ຫຼາຍກວ່າ 3,2 ແສນລູກຄ້າ, ມີ 10 ພັນກວ່າຮ້ານເປັນຕົວແທນໃນທົ່ວປະເທດ.
