ເດືອນພະຈິກ ລາວນຳເຂົ້າ ແລະສົ່ງອອກສິນຄ້າມູນຄ່າ 8 ພັນຕື້ກວ່າກີບ

  ໃນເດືອນພະຈິກ ສປປ ລາວມີ ມູນຄ່າການສົ່ງອອກປະມານ 436 ລ້ານໂດລາ ເທົ່າກັບ 4,1 ພັນຕື້ກີບ ສ່ວນມູນຄ່າການນໍາເຂົ້າມີປະມານ 434 ລ້ານໂດລາ ເທົ່າກັບ 3,9 ພັນຕື້ກີບ ແລະເກີນດູນການຄ້າປະມານ 2 ລ້ານໂດລາ ສິນຄ້າສົ່ງອອກຫຼັກປະກອບມີ: ແຮ່ທອງ, ໝາກກ້ວຍ, ເຍື່ອໄມ້ ແລະເສດເຈ້ຍ, ໂຄງຮ່າງ, ຄຳປະສົມ, ຄຳແທ່ງ, ເຄື່ອງນຸ່ງຫົ່ມ, ກາເຟ, ຢາງພາລາ, ຢາສູບ ແລະສາລີ, ສ່ວນໝວດສີນຄ້ານໍາເຂົ້າຫຼັກປະກອບມີ: ພາຫະນະທາງບົກ, ເຄື່ອງໄຟຟ້າ ແລະອຸປະກອນໄຟຟ້າ, ນໍ້າ ມັນກາຊວນ, ອຸປະກອນກົນຈັກ, ເຫຼັກ ແລະເຄື່ອງທີ່ເຮັດດ້ວຍເຫຼັກ, ເຫຼັກກ້າ, ຊິ້ນສ່ວນອາໄຫຼ່ລົດ, ແວ່ນ, ນໍ້າມັນແອັດຊັງ, ແອັດຊັງພິເສດ, ເຫຼັກເສັ້ນ ແລະເຫຼັກຮູບ ປະພັນຕ່າງໆ, ເຄື່ອງໃຊ້ທີ່ເຮັດດ້ວຍພາລາສະຕິກ ແລະກາກ ແລະສິ່ງເສດເຫຼືອຈາກອຸດສາຫະກຳຜະລິດອາຫານໂດຍລວມມູນຄ້າທັງໝົດ 869 ໂດລາ ເທົ່າກັບ 8 ພັນຕື້ກວ່າກີບ.

   ສິນຄ້າສົ່ງອອກຫຼັກສະເລ່ຍທັງໝົດແມ່ນເປັນເງິນປະມານ 436 ລ້ານໂດລາ ໃນນັ້ນສິນຄ້າທີ່ມີມູນຄ່າສູງສຸດເຊັ່ນ: ແຮ່ທອງມູນຄ່າປະມານ 40 ລ້ານໂດລາ ໝາກກ້ວຍມູນຄ່າປະມານ 18 ລ້ານໂດລາ ເຍື່ອໄມ້ ແລະເສດເຈ້ຍມູນຄ່າປະມານ 12 ລ້ານໂດລາ ໂຄງຮ່າງ (ຊິ້ນສ່ວນກ້ອງບັນທຶກພາບ) ມູນຄ່າປະມານ 16 ລ້ານໂດລາ ຄຳປະສົມ (ຄຳແທ່ງ) ມູນຄ່າປະມານ 59 ລ້ານໂດລາ ເຄື່ອງນຸ່ງຫົ່ມມູນຄ່າປະມານ 14 ລ້ານໂດລາ ກາເຟ (ບໍ່ທັນໄດ້ປຸງແຕ່ງ) ມີມູນຄ່າປະມານ 5 ລ້ານໂດລາ, ຢາງພາລາມູນ ຄ່າປະມານ 32 ລ້ານໂດລາ,ຢາສູບມູນຄ່າປະມານ 7 ລ້ານໂດລາ ແລະສາລີມູນຄ່າປະມານ 10 ລ້ານໂດລາ, ບັນດາປະເທດທີ່ສົ່ງອອກຫຼັກແມ່ນຈີນ 161 ລ້ານ ໂດລາ,ຫວຽດນາມ 70 ລ້ານໂດລາ, ໄທ 108 ລ້ານໂດລາ, ອິນເດຍ 25 ລ້ານໂດລາແລະຍີ່ປຸ່ນ 8 ລ້ານໂດລາສ່ວນສິນຄ້ານໍາເຂົ້າຫຼັກມີ 5 ປະເທດຄື: ໄທ 209 ລ້ານໂດລາ,ຈີນ 100 ລ້ານ ໂດລາ,ຫວຽດນາມ 46 ລ້ານໂດລາ, ຢີ່ປຸ່ນ 10 ລ້ານໂດລາ ແລະອາເມລິກາ 5 ລ້ານໂດລາ ມູນຄ່າການນໍາເຂົ້າ ແລະສົ່ງອອກຂອງ ສປປ ລາວ ປະຈໍາເດືອນພະຈິກ ປີ 2020 ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.

แชร์