ເຕັກນິກການປູກມັນດ້າງ

ມັນດ້າງ ເປັນພືດຊະນິດໜຶ່ງທີ່ມີລັກຊະນະເປັນເຄືອທີ່ປູກເພື່ອຮັບປະທານສ່ວນຫົວ ແລະໃບ,ສາມາດປູກໄດ້ຕະຫຼອດທັງປີສ່ວນພັນຂອງມັນດ້າງຈະມີຫຼາຍເປັນຕົ້ນແມ່ນພັນທີ່ມີເນື້ອສີຂາວ, ເຫຼືອງ, ມ້ວງທີ່ມີລົດຊາດຫອມຫວານ ແລະຍັງເປັນທີ່ຕ້ອງການຂອງຕະຫຼາດອີກດ້ວຍ.

   ອີງຕາມຂໍ້ມູນຈາກປຶ້ມຄູ່ມືການປູກພືດຜັກສວນຄົວໃຫ້ຮູ້ວ່າ: ມັນດ້າງເປັນພືດທີ່ສາມາດປູກໄດ້ຕະຫຼອດທັງປີ, ສາມາດຈະເລີນເຕີບໂຕໄດ້ດີເຂດທີ່ມີອາກາດຂ້ອນຂ້າງຮ້ອນ ແລະເປັນພືດທີ່ທົນທານຕໍ່ຄວາມແຫ້ງແລ້ງໄດ້ດີ, ການປູກໃນລະດູແລ້ງຈະໃຫ້ຜົນຜະລິດສູງກວ່າການປູກໃນລະດູຝົນ ແລະອາຍຸການເກັບກ່ຽວກໍຈະສັ້ນກວ່າລະດູຝົນ 1 ເດືອນ ການເລືອກພື້ນທີ່ ແລະກະກຽມດິນເພື່ອປູກຖ້າເປັນເນື້ອທີ່ນາຄວນເລືອກບ່ອນສູງ ແລະລະບາຍນໍ້າໄດ້ດີ, ຖ້າເປັນໄປໄດ້ບໍ່ຄວນປູກມັນດ້າງກ່ອນຫາກມີຄວາມຈໍາເປັນຕ້ອງປູກຊໍ້າທີ່ເກົ່າຕ້ອງກໍາຈັດແມງໄນດິນກ່ອນ; ສໍາລັບບ່ອນຮາບພຽງທົ່ວໆໄປນັ້ນສ່ວນຫຼາຍຈະປູກໄດ້ສະເພາະລະດູຝົນບ່ອນທີ່ມີເຂດຊົນລະປະທານຈະສາມາດປູກມັນດ້າງໄດ້ຕະຫຼອດປີ.

  ກ່ອນຈະປູກຄວນໄຖດິນໃຫ້ເລິກປະມານ 25-30 ຊັງຕີແມັດ ເລິກປະມານ 25-30 ຊັງຕີແມັດ ຕາກດິນໄວ້ 7-10 ວັນ ແລະພວນດິນ 1-2 ຄັ້ງ ເພື່ອກໍາຈັດວັດສະພືດ, ປັບລະດັບເນື້ອທີ່ປູກໃຫ້ລຽບສະໝໍ່າສະເໝີກັນ, ໃສ່ຝຸ່ນຄອກ ຫຼືຝຸ່ນ ໝັກປະສົມດິນໃຫ້ເຂົ້າກັນ, ເມື່ອກຽມດິນແລ້ວກໍ່ຍົກເປັນຮ່ອງໄລຍະຫ່າງກັນ 75-100 ຊັງຕີແມັດ, ຍົກເປັນຮ່ອງໃຫ້ເປັນຮູບສາມລ່ຽມ ແລ້ວປູກຢູ່ເທິງສັນຮ່ອງນັ້ນເລີຍສ່ວນພັນປູກເຮົາສາມາດໃຊ້ລໍາຕົ້ນ ຫຼື ເຄືອປູກ, ຫາກຈະໃຊ້ລໍາຕົ້ນຄວນເລືອກເອົາລຳທີ່ແກ່,ຖ້າເອົາເຄືອຄວນຕັດໃຫ້ຍາວປະມານ 25-30 ຊັງຕີແມັດ ຫຼືມີຂໍ້ປະມານ 6-8 ຂໍ້ສຳລັບການໃຊ້ເຄືອປູກນີ້ນິຍົມໃຊ້ສ່ວນຍອດຫຼາຍກວ່າສວ່ນອື່ນໆເພາະຈະເລີນເຕີບ ໂຕ ແລະອອກຮາກໄວ.

  ການປູກ: ນຳເອົາລຳຕົ້ນ ຫຼືເຄືອທີ່ເຮົາກະກຽມໄວ້ມາຝັງໂດຍເຮັດເປັນມູມງ່ຽງດ້ວຍການໃຊ້ສຽມສັບເທິງສັນຮ່ອງແລ້ວຈຶ່ງວາງເຄືອມັນຕາມເທິງຮອຍສັບ, ໂດຍໃຫ້ໄດ້ມູມປະມານ 45 ອົງສາ ແລະໃຫ້ສ່ວນປາຍພົ້ນຈາກດິນປະມານ 3-4 ໃບ. ການໃຫ້ນໍ້າ: ຖ້າຫາກປູກໃນລະດູແລ້ງການໃຫ້ນໍ້າເປັນສິ່ງທີ່ຈໍາເປັນໄລຍະທໍາອິດ 10-15 ວັນຕໍ່ຄັ້ງ ແລະໄລຍະຫຼັງ 20-30 ວັນຕໍ່ຄັ້ງໂດຍປ່ອຍໃຫ້ນໍ້າໄຫຼເຂົ້າຕາມຮ່ອງໃນແປງປູກໃຫ້ລະດັບນໍ້າສູງ 2/3 ຂອງຮ່ອງ, ປ່ອຍນໍ້າປະໄວ້ໃນຮ່ອງ 1 ຄືນ ແລ້ວໃນຕອນ ເຊົ້າໃຫ້ຮີບປ່ອຍນໍ້າອອກ.

   ການໃສ່ຝຸ່ນ: ຖ້າມີຝຸ່ນຄອກ ຫຼືຝຸ່ນໝັກຄວນໃສ່ຫຼັງຈາກໄຖຕາກດິນໄວ້, ສ່ວນການໃສ່ຝຸ່ນສູດ 13: 13:13, ອັດຕາໃສ່ 50-80 ກິໂລກຣາມຕໍ່ໄລ່, ໂດຍແບ່ງໃສ່ 2 ຄັ້ງຄື: ໃສ່ຮອງກົ້ນຂຸມ ແລະໃສ່ຫຼັງຈາກປູກໄດ້ 45 ວັນ, ການໃສ່ຄວນເຈາະຮູເປັນຂຸມລະຫວ່າງໄລຍະຫ່າງປູກມັນດ້າງແລ້ວກໍ່ຢອດຝຸ່ນລົງການຕັດແຕ່ງເຄືອມັນດ້າງເມື່ອມັນດ້າງຈະເລີນເຕີບໂຕ (ອາຍຸ2-3 ເດືອນຫຼັງປູກ) ມັນຈະຖອດຍອດອອກໄປນອກແປງເຮັດໃຫ້ຂໍ້ຕິດກັບດິນເກີດຮາກຢັ່ງລົງດິນ ແລະເກີດຫົວໄດ້ຊຶ່ງຈະເຮັດໃຫ້ສ່ວນຫົວທີ່ເກີດຈາກສ່ວນທີ່ຝັງດິນຢູ່ກ່ອນແລ້ວຈະເລີນເຕີບໂຕບໍ່ເຕັມທີ່ດັ່ງນັ້ນຄວນຕອນຫຼືຕັດອອກ.

ສ່ວນການເກັບກ່ຽວແມ່ນຂຶ້ນກັບແນວພັນຂອງມັນດ້າງແຕ່ໂດຍທົ່ວໄປຈະເກັບກ່ຽວໄດ້ເມື່ອອາຍຸ 90-150 ວັນຫຼັງປູກຖ້າບໍ່ຮູ້ອາຍຸການເກັບກ່ຽວທີ່ແນ່ນອນຂອງມັນດ້າງໃຫ້ສັງເກດເບິ່ງໜ້າດິນບໍລິເວນເງົ້າຕົ້ນຖ້າຮອຍດິນແຕກແຍກ ແລະເບິ່ງເຫັນຫົວມັນດ້າງສະແດງວ່າມັນດ້າງເລີ່ມແກ່ສາມາດເກັບກ່ຽວໄດ້.

แชร์