ພະນັກງານການເງິນຍົກລະດັບບັນຊີ ແຫ່ງລັດ ແລະບັນຊີວິສາຫະກິດ

  ຊຸດຝຶກອົບຮົມການບັນຊີແຫ່ງລັດ ແລະບັນຊີວິສາຫະກິດໄດ້ປິດລົງໃນວັນທີ 18 ທັນວາ ຜ່ານມາທີ່ສະໂມສອນພະແນກສຶກສາທິການ ແລະກີລາແຂວງໄຊສົມບູນ ພາຍ ຫຼັງທີ່ໄດ້ດໍາເດີນມາເປັນເວລາ 2 ວັນເຄິ່ງ ໂດຍການເຂົ້າຮ່ວມຂອງທ່ານ ນາງ ເກດແກ້ວ ຣາຊະພົນ ຫົວໜ້າພະແນກຄຸ້ມຄອງ-ກວດສອບອິດສະຫຼະ, ກົມບັນຊີ, ກະ ຊວງການເງິນ, ມີນັກວິທະຍາກອນຈາກກົມບັນຊີກະຊວງການເງິນ, ມີນັກສໍາມະນາກອນທີ່ຮັບຜິດຊອບວຽກງານການເງິນຈາກພະແນກການອ້ອມຂ້າງແຂວງ ແລະບັນດາເມືອງພ້ອມດ້ວຍພະນັກງານບັນຊີຂອງຫົວໜ່ວຍທຸລະກິດເຂົ້າຮ່ວມທັງໝົດ 45 ທ່ານ, ຍິງ 27 ທ່ານ.

ພາຍຫຼັງທີ່ໄດ້ດໍາເນີນມາເປັນເວລາ 2 ວັນເຄິ່ງສໍາມະນາກອນໄດ້ຮຽນຮູ້ກ່ຽວກັບບັນດາເອກະສານທີ່ສໍາຄັນຕ່າງໆຂອງວຽກງານການເງິນເປັນຕົ້ນ: ແມ່ນນິຕິກໍາກ່ຽວກັບການຈັດຕັ້ງປະຕິບັດວຽກງານບັນຊີວິສາຫະກິດ,ການສົມທຽບຜັງບັນຊີລະຫວ່າງປີ 2020 ກັບບັນຊີປີ 2009 ແລະ 1992, ຮູບແບບເອກະສານລາຍງານການເງິນ, ເຕັກນິກການບັນທຶກບັນຊີ, ຫຼັກການບັນຊີວິສາຫະກິດ, ການຊື້-ການຂາຍ, ການຊຳລະສະສາງ, ການກໍານົດຜັງບັນຊີດ້ານລາຍຈ່າຍ ແລະ ເອກະສານອື່ນໆກ່ຽວກັບວຽກງານການເງິນ. ທັງນີ້ກໍ່ເພື່ອເຮັດໃຫ້ພະນັກງານໃນຂະແໜງການເງິນ ແລະຫົວໜ່ວຍທຸລະກິດໂດຍສະເພາະພະນັກງານບັນຊີ-ການເງິນຂອງຫົວໜ່ວຍທຸລະກິດໃຫ້ມີຄວາມຮັບຮູ້ເຂົ້າໃຈກ່ຽວກັບຮູບເເບບເອກະສານລາຍງານການເງິນ, ຜັງບັນຊີ ແລະເຕັກນິກການບັນທຶກບັນຊີໃຫ້ຖືກຕ້ອງຕາມລະບຽບກົດໝາຍ ແລະມີຄວາມເປັນເອກະພາບກັນໃນຂອບເຂດທົ່ວປະເທດ.

  ທ່ານ ນາງ ເກດແກ້ວ ຣາຊະພົນ ກ່າວວ່າ: ບັ້ນຝຶກອົບຮົມການບັນຊີແຫ່ງລັດ ແລະບັນຊີວິສາຫະກິດຄັ້ງນີ້ແມ່ນມີຄວາມໝາຍຄວາມສໍາຄັນຫຼາຍ ແລະເປັນຄັ້ງທໍາອິດ ຊຶ່ງເປັນການຍົກສູງຄຸນນະພາບຂອງການລາຍງານການເງິນໃຫ້ດີຂຶ້ນ, ມີຄວາມໂປ່ງໃສ ແລະເປັນທີ່ເຊື່ອຖືໄດ້,ການກວດກາປະເມີນຜົນເພື່ອຕີລາຄາການປະຕິບັດລະບຽບກົດໝາຍກ່ຽວກັບການບັນຊີໃຫ້ໄດ້ຕາມມາດຕະຖານທີ່ກໍານົດໄວ້ເພື່ອໃຫ້ບັນລຸເປົ້າໝາຍຫັນໄປສູ່ການປະຕິບັດມາດຕະຖານສາກົນດ້ານການບັນຊີແຫ່ງລັດ ແລະບັນຊີວິສາຫະກິດຕາມພື້ນຖານການບັນຊີເອກະພາບໃນທົ່ວປະເທດ; ພ້ອມນີ້ທ່ານຍັງໄດ້ຮຽກຮ້ອງໃຫ້ນັກສໍາມະນາກອນທຸກທ່ານຈົ່ງນໍາເອົາບົດຮຽນໃນຄັ້ງນີ້ໄປໝູນໃຊ້ເຂົ້າໃນວຽກງານວິຊາສະເພາະທີ່ຕົນຮັບຜິດຊອບໃຫ້ເກີດປະໂຫຍດສູງສຸດ.

แชร์