2020 ເສດຖະກິດແຂວງອັດຕະປື ຂະຫຍາຍຕົວໃນລະດັບ 4,6%

  ທ່ານ ເລັດ ໄຊຍະພອນ ເຈົ້າແຂວງອັດຕະປືໄດ້ກ່າວລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງຊຸດທີ I ໃນວັນທີ 22 ທັນວາ ວ່າ: ປີ 2020 ນີ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງອັດຕະປືແມ່ນປະສົບກັບບັນຫາການລະບາດຂອງພະຍາດໂຄວິດ-19 ລວມທັງບັນຫາ ໄພເງິນເຟີ້, ເງິນບາດ, ເງິນໂດລາແຂງຄ່າ, ລາຄາສິນຄ້າມີການເໜັງຕີງ ແລະບັນຫາອື່ນໆອັນໄດ້ເຮັດໃຫ້ເສດຖະກິດຂອງແຂວງຂະຫຍາຍຕົວໄດ້ພຽງແຕ່ 4,6% ເທົ່າ ນັ້ນ, ຈາກເມື່ອກ່ອນໄດ້ວາງຄາດໝາຍການຂະຫຍາຍຕົວຂອງເສດຖະກິດໄວ້ຢູ່ທີ່ 8% ໃນນັ້ນລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນໄດ້ 18,6 ລ້ານກີບ ຫຼື ເທົ່າກັບ 2.011 ໂດລາສະຫະລັດ.

  ທ່ານ ເລັດ ໄຊຍະພອນ ເຈົ້າແຂວງອັດຕະປື ຍັງໄດ້ກ່າວຕື່ມວ່າ: ເຖິງວ່າເສດຖະກິດຂອງແຂວງຈະໄດ້ຮັບຜົນກະທົບໃນຫຼາຍໆດ້ານກໍ່ຕາມແຕ່ດ້ວຍຄວາມຮັບຜິດຊອບ ສູງຂອງບັນດາສະຫາຍໃນຄະນະພັກ-ອົງການປົກຄອງແຂວງ, ບວກກັບຄວາມຕື່ນຕົວຂອງປະຊາຊົນປະກອບສ່ວນອັນສໍາຄັນເຂົ້າໃນການສ້າງສາພັດທະນາໄດ້ພ້ອມກັນເອົາໃຈໃສ່ບຸກບືນຜ່ານຜ່າອຸປະສັກຄວາມຫຍຸ້ງຍາກນາໆ ປະການເຮັດໃຫ້ການຂະຫຍາຍຕົວຂອງເສດຖະກິດໃນຂະແໜງການສໍາຄັນມີການຂະຫຍາຍຕົວໄດ້ດີສົມຄວນເປັນຕົ້ນຂະແໜງກະສິກໍາຂະຫຍາຍຕົວໃນລະດັບ 2,4%, ຂະແໜງອຸດສາຫະກໍາຂະຫຍາຍຕົວໃນລະດັບ 9,9% ແລະ ຂະແໜງບໍລິການຂະຫຍາຍຕົວໃນລະດັບ 7%, ມູນຄ່າການລົງທຶນລວມປະຕິບັດໄດ້ 924 ຕື້ກວ່າກີບ ເທົ່າກັບ 65%,(ແຜນການ1.432 ຕື້ກີບ).

    ດ້ານການສົ່ງອອກປະຕິບັດໄດ້ 120,98 ລ້ານໂດລາ, ລື່ນແຜນດັດແກ້ 12%, ປະເພດສິນຄ້າສົ່ງອອກຕົ້ນຕໍມີກະແສໄຟຟ້າ63,38 ລ້ານໂດລາ, ນໍ້າຕານຊາຍ 17,18 ລ້ານໂດລາ ໂດຍສະເພາະນໍ້າຕານອໍການິກໄດ້ສົ່ງໄປຈໍາໜ່າຍຢູ່ຕະຫຼາດ ເອີຣົບ ຫຼາຍກວ່າ 10 ປະເທດ, ຢາງພາລາ 7,18 ລ້ານໂດລາ ແລະສິນຄ້າກະສິກໍາສົ່ງອອກໄດ້ 30,55 ລ້ານໂດລາ, ຊຶ່ງມີປະເພດ: ໝາກກ້ວຍ, ໝາກມັງກອນ, ມັນຕົ້ນແຫ້ງ, ຄວາຍ, ງົວ, ໝູ ແລະເຄື່ອງປ່າຂອງດົງ.

--------------

ຂ່າວ: ວັດທະນາ

ຮູບພາບ: ໜັງສືພິມເສດຖະກິດ-ສັງຄົມ

แชร์