ລາຍຮັບອາກອນບໍລິຄຳໄຊ 11 ເດືອນເກັບໄດ້ 109,8 ຕື້ກີບ

   2020 ນັບເປັນອີກປີໜຶ່ງທີ່ຍັງຄົງປະເຊີນກັບຄວາມຫຍຸ້ງຍາກດ້ານການເງິນພາຍໃນປະເທດທີ່ສືບຕໍ່ມາແຕ່ຊຸມປີຜ່ານມາປະກອບກັບບັນຫາການແຜ່ລະບາດຂອງພະຍາດໂຄວິດ-19 ໄດ້ ສົ່ງຜົນເຮັດໃຫ້ຫຼາຍຂະແໜງການຕ້ອງຢຸດສະງັກກາຍເປັນອຳມະພາດຢ່າງໃດກໍຕາມເພື່ອເຮັດໃຫ້ການຈັດຕັ້ງປະຕິບັດວຽກງານເປັນໄປຕາມແຜນ ການທີ່ວາງໄວ້ອາກອນແຂວງບໍລິຄຳໄຊໜຶ່ງໃນຂະແໜງການໄດ້ສຸມທຸກກຳລັງເພື່ອຈັດເກັບລາຍຮັບຕາມການມອບໝາຍໂດຍໃນ 11 ເດືອນປີ 2020 ສາມາດເກັບໄດ້ແລ້ວ 109,8 ຕື້ກີບ ຂະນະທີ່ 1 ເດືອນທີ່ເຫຼືອຄືເດືອນທັນວານີ້ທາງຂະແໜງດັ່ງກ່າວຈະສູ້ຊົນເກັບໃຫ້ໄດ້ຕື່ມອີກ 30,3 ຕື້ກີບ ຊຶ່ງນັບວ່າເປັນຕົວເລກທີ່ທ້າທາຍພໍສົມຄວນ.

  ເມື່ອບໍ່ດົນຜ່ານມານີ້ທ່ານ ແສງຈັນ ຄຳປະເສີດ ຮອງຫົວໜ້າສ່ວຍສາອາກອນປະຈຳແຂວງບໍລິຄຳໄຊເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມ ພວກເຮົາວ່າ: ປີ 2020 ນັບແຕ່ເດືອນມັງກອນຫາເດືອນພະຈິກ ອາກອນແຂວງສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 109,8 ຕື້ກີບ ໃນນັ້ນສ່ວນຫຼາຍແມ່ນໄດ້ຈາກກຸ່ມລາຍຮັບຫຼັກເປັນຕົ້ນແມ່ນກຸ່ມກໍ່ສ້າງເຂື່ອນ 26,9 ຕື້ກີບ,ກຸ່ມໂທລະຄົມມະນາຄົມ 11,02 ຕື້ກີບ,ກຸ່ມໄຟຟ້າສາຍສົ່ງພາກກາງ 12,6 ຕື້ກີບ,ກຸ່ມນໍ້າມັນເຊື້ອໄຟ 10,8 ຕື້ກີບ, ກຸ່ມຊັບພະຍາກອນໄມ້ເຄື່ອງປ່າຂອງດົງ 2,5 ຕື້ກີບ ແລະກຸ່ມແຮ່ທາດ 1,9 ຕື້ກີບ.

  ສຳລັບໝົດປີນີ້ທາງອາກອນແຂວງບໍລິຄຳໄຊຈະສູ້ຊົນການຈັດເກັບລາຍຮັບໃຫ້ບັນລຸໄດ້ທັງໝົດ 140,1 ຕື້ກີບເທົ່າກັບ 93,3% ຂອງແຜນການປີທີ່ກະຊວງການເງິນໄດ້ດັດແກ້ມີທັງໝົດ 150,1 ຕື້ກີບ ໂດຍໃນທັນວາເດືອນດຽວນີ້ຈະສູ້ຊົນເກັບລາຍຮັບໃຫ້ໄດ້ຕື່ມອີກ 30,3 ຕື້ກີບ ຊຶ່ງຈະມີຈາກລາຍຮັບປົກກະຕິອື່ນໆ 12,9 ຕື້ກີບ,ໜີ້ 3 ແຈ 4,3 ຕື້ກີບ, ກໍ່ສ້າງຮ່ວງປົກກະຕິ 1,8 ຕື້ກີບ, ເງິນເດືອນນໍ້າເທີນ 1 ຈຳນວນ  5,6 ຕື້ກີບ, ກຸ່ມໂທລະຄົມ 50% ມອບສູນກາງ 5,6 ຕື້ກີບ.

  ຢ່າງໃດກໍ່ຕາມທ່ານຮອງຫົວໜ້າສ່ວຍສາອາກອນປະຈຳແຂວງບໍລິຄຳໄຊໄດ້ເປີດເຜີຍຕື່ມວ່າ: ສາເຫດທີ່ພາໃຫ້ບໍ່ສາມາດປະຕິບັດບັນລຸແຜນປີໄດ້ຈຳນວນ 10 ຕື້ກວ່າກີບ ເນື່ອງຈາກໂຄງການກໍ່ສ້າງຮ່ວງປົກກະຕິຂອງແຂວງໄດ້ເລື່ອນໄປຊຳລະປີ 2021 ເປັນເງິນອາກອນ 2,6 ຕື້ກີບ, ການຮັບຊ່ວຍໜີ້ 3 ແຈ 3 ໂຄງການ, 2 ບໍລິສັດຈຳ ນວນ 4,3 ຕື້ກີບ ແລະກຸ່ມລາຍຮັບໃໝ່ໂຄງການກໍ່ສ້າງຂົວນໍ້າຂອງ, ຄາວີໂກແກ້ວນາງຝານ 1,1 ຕື້ກີບ ແລະສາຍສົ່ງພາກກາງ 2 ຕື້ກີບ.

แชร์