ສຳມະນາ ແລະເຜີຍແຜ່ເອກະສານວັນສາກົນຢຸດໃຊ້ຄວາມຮຸນແຮງຕໍ່ແມ່ຍິງ

   ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ແລະແມ່-ເດັກກະຊວງການຕ່າງປະເທດໄດ້ຈັດກອງປະຊຸມສໍາມະນາ ແລະເຜີຍແຜ່ເອກະສານລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ 25 ພະຈິກ ຂຶ້ນໃນວັນທີ 15 ທັນວາ ຜ່ານມາທີ່ເມືອງວຽງຄໍາ, ແຂວງວຽງຈັນ, ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ, ປະທານຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ແລະແມ່-ເດັກກະຊວງການຕ່າງປະເທດ, ໂດຍມີບັນດາທ່ານຄະນະກົມ, ຄະນະພະແນກ ແລະ ວິຊາການຂອງກະຊວງການຕ່າງປະເທດ ແລະ ຜູ້ຕາງໜ້າຈາກພະແນກການຕ່າງປະເທດ, ສະຫະພັນແມ່ຍິງແຂວງ ແລະ ເມືອງວຽງຄໍາ, ແຂວງວຽງຈັນ, ໄດ້ເຂົ້າຮ່ວມ.

  ຈຸດປະສົງກອງປະຊຸມເພື່ອລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງທັງເປັນການໂຄສະນາເຜີຍແຜ່ເອກະສານກົດໝາຍວ່າດ້ວຍການຕ້ານ ແລະສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ, ກົດໝາຍວ່າດ້ວຍຄວາມສະເໝີພາບຍິງ-ຊາຍ, ປະມວນກົດໝາຍແພ່ງ,ປະມວນກົດໝາຍອາຍາທີ່ມີຕໍ່ແມ່ຍິງ, ບັນດາສົນທິສັນຍາທີ່ກໍານົດຄວາມສະເໝີພາບຍິງ-ຊາຍ ແລະການຕ້ານການຈໍາແນກທຸກຮູບແບບຕໍ່ແມ່ຍິງ,ການຊ່ວຍເຫຼືອ, ການປົກປ້ອງສິດຜົນປະໂຫຍດ ແລະການດໍາເນີນສົ່ງຜູ້ຖືກເຄາະຮ້າຍ (ແມ່ຍິງລາວ) ກັບຄືນ ສປປ ລາວ ໃຫ້ພະນັກງານກະຊວງການຕ່າງປະເທດ ແລະຜູ້ຕາງໜ້າຈາກສະຫະພັນແມ່ຍິງແຂວງວຽງຈັນໄດ້ຮັບຟັງ ແລະເຂົ້າໃຈ.

   ກອງປະຊູມຄັ້ງນີ້ມີນັກວິທະຍາກອນຈາກກະຊວງຍຸຕິທຳ, ຫ້ອງການກອງເລຂາຄະນະກໍາມະທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ, ກະ ຊວງການຕ່າງປະເທດກໍໄດ້ຂຶ້ນອະທິບາຍບັນດາເນື້ອໃນເອກະສານ ແລະບົດຮຽນຕົວຈິງໃນການຊ່ວຍເຫຼືອຜູ້ຖືກເຄາະຮ້າຍທັງຢູ່ພາຍໃນ ແລະຕ່າງປະເທດໃຫ້ຜູ້ເຂົ້າຮ່ວມກອງປະຊຸມໄດ້ເຂົ້າໃຈ ແລະເຫັນຄວາມສຳຄັນຕໍ່ວຽກງານດັ່ງກ່າວ.

  ນອກນັ້ນ, ກອງປະຊຸມທີ່ຈັດຂຶ້ນໃນຄັ້ງນີ້ບໍ່ພຽງແຕ່ເປັນການເຜີຍແຜ່ເນື້ອໃນເອກະສານ, ບົດຮຽນຕົວຈິງເທົ່ານັ້ນແຕ່ຍັງໄດ້ເປັນການປຸກລະດົມປູກຈິດສໍານຶກໃຫ້ແກ່ພະ ນັກງານ-ລັດຖະກອນ ກໍ່ຄືສັງຄົມໃຫ້ດັດປັບທັດສະນະຄະຕິ ແລະຢຸດຕິການກະທຳທີ່ມີລັກສະນະໃຊ້ຄວາມຮຸນແຮງທຸກຮູບແບບຕໍ່ແມ່ຍິງ ແລະເດັກນ້ອຍ.

--------------

ຂ່າວ: ກະຊວງຕ່າງປະເທດ

ຮູບພາບ: ໜັງສືພິມເສດຖະກິດ-ສັງຄົມ

• 22/12/2020