ປະທານ ສພຊ ເຄື່ອນໄຫວເຮັດວຽກຢູ່ນໍ້າບາກ

  (ສພຊ) ວັນທີ 15 ທັນວາຜ່ານມາ, ທີ່ສະໂມສອນເມືອງນໍ້າບາກ ແຂວງຫຼວງພະບາງ; ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດໄດ້ເຄື່ອນໄຫວຢ້ຽມຢາມ ແລະເຮັດວຽກຢູ່ເມືອງນໍ້າບາກ; ໂດຍການຕ້ອນຮັບຂອງທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງຫຼວງພະບາງ, ເຂົ້າຮ່ວມມີບັນດາທ່ານການນໍາຂອງເມືອງ, ຫ້ອງການອ້ອມຂ້າງເມືອງພ້ອມດ້ວຍພາກສ່ວນທີ່ກ່ຽວຂ້ອງ.

ໃນພິທີທ່ານ ສົມຫວັງ ພອນຄໍາວົງສາ ເຈົ້າເມືອງເມືອງນໍ້າບາກໄດ້ລາຍງານສະພາບການຈັດຕັ້ງປະຕິບັດວຽກງານຮອບດ້ານ ແລະກະກຽມການເລືອກຕັ້ງສະມາຊິກສະ ພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນແຂວງ (ສສຂ) ຊຸດທີ II ຊຶ່ງທ່ານໄດ້ໃຫ້ຮູ້ເຖິງສະພາບລວມໂດຍຫຍໍ້ຂອງເມືອງ,ທ່າແຮງ, ຂໍ້ສະດວກ ແລະຂໍ້ຫຍຸ້ງຍາກໃນຫຼາຍດ້ານ; ພ້ອມດຽວກັນນັ້ນ, ກໍໄດ້ໃຫ້ຮູ້ເຖິງການກະກຽມການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ເປັນຕົ້ນຈັດຕັ້ງການເຜີຍແຜ່, ເຊື່ອມຊຶມໃຫ້ພະນັກງານຫຼັກແຫຼ່ງພາຍໃນເມືອງໄດ້ຮັບຮູ້ ແລະ ເຂົ້າໃຈພ້ອມທັງໄດ້ແນະນຳວິທີການລົງເກັບກຳຂໍ້ມູນຜູ້ມີສິດປ່ອນບັດເລືອກຕັ້ງໃຫ້ແກ່ພະນັກງານທີ່ຈະຮັບຜິດຊອບແຕ່ລະໜ່ວຍປ່ອນບັດໄດ້ 2 ຊຸດ; ນອກຈາກນັ້ນ, ກໍໄດ້ສຳເລັດການອອກນິຕິກໍາຕ່າງໆຂອງຄະນະກໍາມະການເລືອກຕັ້ງຂັ້ນເມືອງຫຼາຍສະບັບ ແລະ ໄດ້ສຳ ເລັດວຽກງານດ້ານບຸກຄະລາກອນ, ອຸປະກອນຮັບໃຊ້ ແລະວຽກງານອື່ນໆ.

   ໂອກາດມີຄວາມໝາຍຄວາມສຳຄັນດັ່ງກ່າວທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມ ແລະໃຫ້ທິດຊີ້ນໍາ ແລະເນັ້ນໜັກບາງບັນຫາທີ່ຈະຕ້ອງໄດ້ເອົາໃນໃຈໃສ່ໃນຕໍ່ໜ້າໃນນັ້ນໄດ້ເນັ້ນໃຫ້ເອົາໃຈໃສ່ສ້າງບຸກຄະລາກອນສືບທອດປ່ຽນແທນ, ຫັນເປັນໜຸ່ມ, ໜັກແໜ້ນ, ມີຄວາມຮູ້ຄວາມສາມາດ ແລະຕ້ອງເລີ່ມສ້າງຈາກຮາກຖານທ້ອງ ຖິ່ນ; ພ້ອມນັ້ນ,ທ່ານຍັງໄດ້ໃຫ້ທິດຊີ້ນໍາໃຫ້ເພີ່ມທະວີການຜະລິດເພື່ອສ້າງລາຍຮັບໃຫ້ສາມາດກຸ້ມຕົນເອງຫຼາຍຂຶ້ນກວ່າເກົ່າເປັນຕົ້ນດ້ານກະສິກໍາປູກຝັງ ແລະລ້ຽງ ສັດ, ປັບປຸງພື້ນຖານແຫຼ່ງທ່ອງທ່ຽວເພື່ອດຶງດູດການລົງທຶນຈາກພາຍໃນ ແລະຕ່າງປະເທດ;ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ, ບໍ່ໃຫ້ຖືເບົາໃນການແກ້ໄຂ ແລະສະກັດກັ້ນຕ້ານພະຍາດໂຄວິດ-19.

   ພ້ອມດຽວກັນນັ້ນ, ທ່ານຍັງໄດ້ເນັ້ນຕື່ມອີກວ່າ: ໃນວຽກງານກະກຽມການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ສະເໜີໃຫ້ຄະນະກໍາມະການເລືອກຕັ້ງຂັ້ນເມືອງຮີບຮ້ອນຈັດຕັ້ງຜັນຂະຫຍາຍແຜນດຳເນີນງານຂອງຕົນເອງເປັນຕົ້ນເຜີຍແຜ່, ເຊື່ອມຊຶມມະຕິຂອງພັກກ່ຽວກັບການເພີ່ມທະວີການຊີ້ນໍາ-ນຳພາ ແລະບັນດາເອກະສານອື່ນໆທີ່ກ່ຽວຂ້ອງໃຫ້ບັນດາພະນັກງານລັດຖະກອນພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຢ່າງຈະແຈ້ງພ້ອມທັງການເກັບກໍາສະຖິຕິຜູ້ມີສິດປ່ອນບັດເລືອກຕັ້ງ  ແລະໜ່ວຍປ່ອນບັດເລືອກຕັ້ງ.

----------------

ຂ່າວ: ສົມນຶກ ແກ້ວໄຊຍະຈັກ

ຮູບພາບ: ໜັງສືພິມເສດຖະກິດ-ສັງຄົມ

แชร์