ບໍລິຄຳໄຊ ຕີລາຄາການຈັດຕັ້ງປະຕິບັດວຽກງານໂພຊະນາການ

  ກອງປະຊຸມວຽກງານໂພຊະນາການ ແຂວງບໍລິຄຳໄຊ ປະຈຳປີ 2020 ໄດ້ຈັດຂຶ້ນໃນວັນທີ 17 ທັນວາຜ່ານມາທີ່ແຂວງດັ່ງກ່າວໂດຍການເປັນປະທານຂອງ ທ່ານ ບຸນເສັງປະທຳມະວົງຮອງເຈົ້າ ແຂວງບໍລິຄຳໄຊ, ມີພະແນກການທີ່ກ່ຽວຂ້ອງ, ຮອງເຈົ້າເມືອງ 7 ຕົວ ເມືອງ ແລະພະນັກງານວິຊາການຈາກພາກສ່ວນຕ່າງໆເຂົ້າຮ່ວມ.

  ທ່ານ ບຸນເສັງ ປະທຳມະວົງ ໄດ້ຍົກຂຶ້ນມາວ່າ: ເຖິງແມ່ນວ່າເສດຖະກິດແຫ່ງຊາດມີການຈະເລີນເຕີບໂຕຢ່າງຕໍ່ເນື່ອງ ແລະວ່ອງໄວກໍ່ຕາມ, ແຕ່ບັນຫາການຂາດສານອາຫານໂດຍສະເພາະໃນກຸ່ມເດັກນ້ອຍອາຍຸຕໍ່າກວ່າ 5 ປີ ເປັນກຸ່ມ ສ່ຽງທີ່ສຸດ ແລະ ການບໍ່ຄໍ້າປະກັນສະບຽງອາຫານທີ່ຍັງສືບຕໍ່ເປັນສິ່ງທ້າທາຍຢ່າງໃຫຍ່ຫຼວງຕໍ່ການພັດທະນາຂອງປະເທດ,ຜົນສຳຫຼວດດ້ານສາທາລະນະສຸກ ປີ 2017 ຜ່ານມາເດັກນ້ອຍຂາດສານອາຫານ ແລະຄວາມສູງບໍ່ໄດ້ມາດຕະຖານແຫ່ງຊາດ 33%, ແຂວງບໍລິຄຳໄຊ 29,9% ປີ 2020 ຄາດໝາຍໃຫ້ຫຼຸດລົງຂັ້ນສູງກາງ 34% ແລະຂັ້ນແຂວງ 21,7%, ເພື່ອເປັນການແກ້ໄຂບັນຫາດ້ານໂພຊະນາການໂດຍສະເພາະຕົວຊີ້ບອກດ້ານສາທາລະນະສຸກທີ່ສະພາຮັບຮອງຄື: ເດັກກຸ່ມ 5 ປີ ລວງສູງບໍ່ໄດ້ ມາດຕະຖານ ແລະນໍ້າໜັກຕໍ່າກວ່າ ມາດຕະຖານໂດຍອີງຕາມຍຸດທະສາດແຫ່ງຊາດການໂພຊະນາການປີ 2016-2020 ໃຫ້ມີພັນທະ ແລະ ມີສ່ວນຮ່ວມຢ່າງຕັ້ງໜ້າຂອງຫຼາຍຂະແໜງການພາຍໃນປະເທດ, ຄູ່ຮ່ວມພັດທະນາ ແລະການສະໜັບສະໜູນຈາກສາກົນສະນັ້ນຈຸດປະສົງກອງປະຊຸມຄັ້ງນີ້ເພື່ອເປັນການສະຫຼຸບຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານດ້ານໂພຊະນາການປະຈຳປີ 2020 ຂອງແຂວງບໍລິຄຳໄຊ ໂດຍສະເພາະການຮ່ວມມື 4 ພະແນກການເຊັ່ນ: ພະແນກສາທາ, ພະແນກກະສິກຳ ແລະປ່າໄມ້, ພະແນກສຶກສາທິການ ແລະກີລາ ແລະພະແນກແຜນການ-ການລົງທຶນ ແລະຄະນະກຳມະການດ້ານໂພຊະນາການຂັ້ນແຂວງ, ຂັ້ນເມືອງອີງຕາມ 22 ມາດຕະການ, ຜົນສຳ ເລັດການປັບປຸງ, ເສີມສ້າງຄວາມເຂັ້ມແຂງໃຫ້ຄະນະກຳມະການກອງເລຂາດ້ານໂພຊະນາການຂັ້ນແຂວງ, ຂັ້ນເມືອງໃນການສະຫຼຸບລາຍງານວຽກໂພຊະນາການໂດຍການສະໜັບສະໜູນຈາກໂຄງການແຄລິຕັດ.

  ໃນກອງປະຊຸມທ່ານ ນາງ ບັງອອນ ໄພມະນີ ປະທານຄະນະກຳມະການດ້ານໂພຊະນາການຂັ້ນແຂວງພະແນກສາທາລະນະສຸກ ແຂວງໄດ້ລາຍງານໂດຍຫຍໍ້ໃນການເຄື່ອນໄຫວວຽກງານໂພຊະນາການປີ 2020 ແລະບັນດາພະແນກການທີ່ກ່ຽວຂ້ອງໄດ້ພັດປ່ຽນກັນລາຍງານໃນການປະຕິບັດວຽກງານດັ່ງກ່າວໃນປີ 2020 ພ້ອມວາງແຜນສ້າງກິດຈະກຳ ປີ 2021.

----------

ຂ່າວ: ຄຳຟອງ, ຮູບພາບ: ໜັງສືພິມເສດຖະກິດ-ສັງຄົມ

แชร์