ເຜີຍແຜ່ຂໍ້ມູນຄຸ້ມຄອງລາຍຮັບສ່ວຍສາອາກອນໃຫ້ຫົວໜ່ວຍທຸລະກິດ

   ໃນວັນທີ 17 ທັນວາ 20 20 ທີ່ສະໂມສອນຫຼັງໃໝ່ ເມືອງອຸທຸມພອນ, ທາງສ່ວຍສາອາກອນ ແຂວງສະຫວັນນະເຂດ ໄດ້ລົງເຜີຍແຜ່ຂໍ້ມູຂ່າວສານຄຸ້ມຄອງລາຍຮັບ ສ່ວຍສາອາກອນໃຫ້ພະນັກງານ- ລັດຖະກອນ ແລະຫົວໜ່ວຍທຸລະກິດພາຍໃນເມືອງໄດ້ຮັບຮູ້, ໂດຍເຂົ້າຮ່ວມຂອງ ທ່ານ ໂພຄໍາ ແວວມະນີ ຮອງເຈົ້າເມືອງ, ທ່ານ ບົວສອນ ສີສຸລາດ ຮອງຫົວໜ້າສ່ວຍສາອາກອນແຂວງສະຫວັນນະເຂດ, ພ້ອມດ້ວຍພະນັກງານ, ນັກທຸລະກິດ ແລະພາກສ່ວນກ່ຽວຂ້ອງເຂົ້້າຮ່ວມ.

 ທ່ານ ບົວສອນ ສີສຸລາດ ຮອງຫົວໜ້າສ່ວຍສາອາກອນແຂວງກ່າວວ່າ: ການຈັດຕັ້ງຜັນຂະຫຍາຍໂຄງການພັດທະນາລະບົບຂໍ້ມູນຂ່າວສານຄຸ້ມຄອງເກັບລາຍຮັບສ່ວຍສາອາກອນ ຫຼືແທັກລິສ ( TaxRis ) ມາຮອດປະຈຸບັນແມ່ນມີການນໍາໃຊ້ລະບົບດັ່ງກ່າວແລ້ວ, ສະເພາະແຂວງສະຫວັນນະເຂດແມ່ນມີ 5 ເມືອງເປົ້າໝາຍ ຄື: ເມືອງອຸທຸມພອນ, ອາດສະພັງທອງ, ເຊໂປນ, ຈໍາພອນ ແລະເມືອງສອງຄອນຊຶ່ງມາຮອດປະຈຸບັນແມ່ນໄດ້ສໍາເລັດໃນຕິດຕັ້ງ ແລະເຊື່ອມຕໍ່ລະບົບດັ່ງກ່າວ.

 ທ່ານ ແກ້ວໄກຍະສິດ ວໍຣະວົງສີ ວິຊາການຂະແໜງແຜນການ ແລະບໍລິການລາຍຮັບກ່າວວ່າ: ຍ້ອນສະພາບແວດລ້ອມໃນການແຂ່ງຂັນທາງດ້ານທຸລະກິດຄວາມຕ້ອງ ການຄວາມສະດວກສະບາຍຈາກພາກລັດ, ການສະຫຼຸບລາຍງານ, ຄວາມໂປ່ງໃສ, ຍຸຕິທໍາເຊື່ອມໂຍງກັບພາກພື້ນ ແລະສາກົນ ແລະການປະຕິບັດໃຫ້ເປັນເອກະພາບໃນຂອບເຂດທົ່ວປະເທດຈຶ່ງໄດ້ດໍາເນີນການພັດທະນາລະບົບຂໍ້ມູນຂ່າວສານຄຸ້ມຄອງເກັບລາຍຮັບສ່ວຍສາອາກອນ ຫຼື ແທັກລິສ (TaxRis) ທີ່ເຊື່ອມຕໍ່ກັບລະບົບຈີເອັບໄອເອັສແລະລະບົບອີຊີແທັກເຊື່ອມກັບລະບົບທະນາຄານຊຶ່ງລັກສະນະເດັ່ນຂອງລະບົບໃໝ່ແມ່ນວິສາຫະກິດສາມາດແຈ້ງມອບອາກອນດ້ວຍຕົນເອງຜ່ານລະບົບອອນລາຍ ໂດຍບໍ່ຈໍາເປັນຕ້ອງເຂົ້າມາຫ້ອງການສ່ວຍສາອາກອນ, ຄັງເງິນ ແລະທະນາຄານ.

แชร์