ຮອງລັດຖະມົນຕີ ຖວທ ລົງຕິດຕາມ ໂຄງການປະຕິສັງຂອນພະທາດຖິ່ນຊ້ອຍ

 ເມື່ອວັນທີ 16 ທັນວາ 2020 ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວພ້ອມດ້ວຍຄະນະໄດ້ລົງຕິດຕາມໂຄງການປະຕິສັງຂອນພະທາດຖິ່ນຊ້ອຍຢູ່ບ້ານປາກງື່ມເມືອງປາກງື່ມນະຄອນຫຼວງວຽງຈັນໃຫ້ການຕ້ອນຮັບໂດຍ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວວັດທະນະທຳ ແລະທ່ອງທ່ຽວນະຄອນຫຼວງວຽງຈັນ ທ່ານ ຄໍາໝູນ ຕຽງທະລາດ ເຈົ້າເມືອງປາກງື່ມພ້ອມດ້ວຍອົງການປົກຄອງ ແລະ ພະນັກງານວິຊາການເຂົ້າ ຮ່ວມ.
  ໂຄງການປະຕິສັງຂອນພະທາດຖິ່ນຊ້ອຍມາຮອດປະຈຸບັນໄດ້ສໍາເລັດການລົງສຳຫຼວດເກັບກຳຂໍ້ມູນອອກແບບແຜນຝັງພື້ນທີ່ວັດ ແລະແຕ້ມແບບພະທາດຄືນໃໝ່ສ່ວນສີມແມ່ນຢູ່ໃນຂັ້ນຕອນຂອງການບູລະນະສ້ອມແປງຄືນໃໝ່ໃນນັ້ນແມ່ນໄດ້ຮັບທຶນໃນການບູລະນະ ແລະ ສ້ອມແປງຈາກທ່ານຮອງລັດຖະມົນຕີກະຊວງຖະແຫຼງຂ່າວວັດທະນະທຳ ແລະທ່ອງທ່ຽວພ້ອມດ້ວຍຄອບຄົວ ແລະກົມວິຈິດສິນເພື່ອທາສີທາງໃນສິມ, ແລ່ນໄຟ, ແຕ້ມກົກໂພຄຳ ແລະຍົກລະດັບແທ່ນພະໃນສິມເພື່ອໃຫ້ມີຄວາມສວຍງາມສະເພາະວຽກທີ່ຈະສືບຕໍ່ລົງມືປະຕິບັດແມ່ນໃສ່ຕາໜ່າງກັນຂະໂມຍປະຕູປ່ອງຢ້ຽມ ແລະປະຕູທາງເຂົ້າພາຍໃນສິມ, ທາສີຮອບນອກສີມ, ແຕ້ມຮູບພຸດທະປະຫວັດຂອງພະພຸດທະເຈົ້າຢູ່ພາຍໃນສີມ ແລະປ່ຽນກະເບື້ອງຫຼັງຄາໃຫ້ເປັນດິນຂໍພາຍຫຼັງສໍາເລັດໜ້າວຽກດັ່ງກ່າວຈະໄດ້ສືບຕໍ່ວຽກປະຕູໂຂງກໍາແພງອ້ອມຮອບວັດແລ້ວຈຶ່ງກ້າວໄປສູ່ການປະຕິສັງຂອນພະທາດຖິ່ນຊ້ອຍ.

  ການປະຕິສັງຂອນພະທາດຖິ່ນຊ້ອຍໜ້າວຽກສໍາຄັນທີ່ຈະຕ້ອງບູລະນະປະກອບມີຄື: ສ້ອມແປງຄືນອົງພະທາດເພື່ອໃຫ້ມີສະພາບທີ່ສົມບູນ ແລະຮັກສາຮູບຊົງເດີມໃຫ້ໃກ້ຄຽງທີ່ສຸດເທົ່າທີ່ຈະເຮັດໄດ້ສ້າງຜາສາດຫີນເພື່ອເປັນອຸບໂມງກວມເອົາພະທາດເກົ່າເພື່ອຮັກສາອົງພະທາດໃຫ້ມີຄວາມທົນທານຊຶ່ງພາຍຫຼັງສໍາເລັດໂຄງການປະຕິສັງ ຂອນພະທາດຖິ່ນຊ້ອຍຈະເປັນການປະກອບສ່ວນອັນສໍາຄັນເຂົ້າໃນວຽກງານສົ່ງເສີມການບໍລິການ, ການທ່ອງທ່ຽວຂອງເມືອງປາກງື່ມທີ່ຕິດພັນກັບທໍາມະຊາດແຄມນໍ້າງື່ມ-ນໍ້າຂອງ ແລະ ເທສະການບັ້ງໄຟພະຍານາກທັງເປັນບ່ອນສຶກສາຮຽນຮູ້ທາງປະຫວັດສາດວັດທະນະທໍາໃຫ້ກັບຄົນຮຸ່ນຫຼັງ ແລະ ເປັນການອະນຸຮັກປົກປັກຮັກສາຄຸນຄ່າມໍລະດົກທາງດ້ານວັດທະນະທຳຂອງຊາດໃຫ້ຄູ່ກັບຄົນລາວຕະຫຼອດໄປ.

• 22/12/2020