ລາວເລີ່ມສຶກສາໂຄງການປະກັນໄພນັກທ່ອງທ່ຽວ

  ວັນທີ 17 ທັນວາ ຜ່ານມາທີ່ນະຄອນຫຼວງວຽງຈັນ ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ຖວທ ແລະບໍລິສັດ ທ່ອງທ່ຽວອາ ເມັດຊິ້ງລາວ ຈໍາກັດຜູ້ດຽວໄດ້ຈັດພິທີເຊັນບົດບັນທຶກຄວາມເຂົ້າໃຈເພື່ອສຶກສາຄວາມເປັນໄປໄດ້ໂຄງການປະກັນໄພສຳລັບນັກທ່ອງທ່ຽວຢູ່ ສປປ ລາວ ລະຫວ່າງທ່ານ ບົວໄລ ພານຸວົງ ວ່າການ ຫົວໜ້າຫ້ອງການກະຊວງ ຖວທ ແລະ ທ່ານ ເສົາວັນນາ ອໍ ຜູ້ອຳນວຍການບໍລິສັດ ຟໍເຕໂຕໂກ ຈຳກັດ ໂດຍມີທ່ານ ກິແກ້ວ ໄຂຄຳພິທູນລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ມີເອກອັກຄະຣາຊະທູດກຳປູເຈຍປະຈຳລາວພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ເສົາວັນນາ ອໍ ກ່າວວ່າ: ການເຊັນບົດບັນທຶກຄັ້ງນີ້ເພື່ອຊອກຫາແຫຼ່ງທຶນທີ່ຈະມາພັດທະນາອຸດສາຫະກຳການທ່ອງທ່ຽວຂອງ ສປປ ລາວ, ເຕັກນິກປະສົບການໆບໍລິຫານຄຸ້ມຄອງອຸດສາຫະກໍາການທ່ອງທ່ຽວຈາກຕ່າງປະເທດ, ຫົວໜ່ວຍທຸລະກິດການທ່ອງທ່ຽວທັງພາຍໃນ ແລະ ຕ່າງປະເທດທີ່ມີປະສົບການເຂົ້າມາລົງທຶນໃນຂະແໜງການທ່ອງທ່ຽວໃນລາວ, ເຜີຍແຜ່ເອກະລັກການທ່ອງທ່ຽວທາງທໍາມະຊາດ, ວັດທະນະທໍາ, ປະຫວັດສາດຂອງລາວ, ສາມາດສ້າງສິ່ງພິມ, ສ້າງຮູບເງົາ, ວິດີໂອ,ຮູບພາບພ້ອມທັງເປັນການໂຄສະນາແຫຼ່ງທ່ອງທ່ຽວໃຫ້ຕ່າງປະເທດຮັບຮູ້, ໃຫ້ນັກທ່ອງທ່ຽວຈາກຕ່າງປະເທດມາທ່ຽວລາວໃຫ້ຫຼາຍຂຶ້ນ ແລະ ໃຫ້ຜູ້ລົງທຶນຕ່າງປະ ເທດມາລົງທຶນໃຫ້ຫຼາຍຂຶ້ນໃນຂະແໜງການທ່ອງທ່ຽວຢູ່ລາວ.

   ໂຄງການປະກັນໄພນັກທ່ອງທ່ຽວເປັນສ່ວນໜຶ່ງທີ່ສຳຄັນໃນການຊ່ວຍເຫຼືອອຸດສາຫະກຳການທ່ອງທ່ຽວໃຫ້ມີສະຖຽນລະພາບໂດຍຈະຊ່ວຍໃຫ້ນັກທ່ອງທ່ຽວມີຄວາມສະບາຍໃຈໝົດຄວາມກັງວົນ ແລະຢູ່ໃນການປົກປ້ອງຢູ່ສະເໝີແລະຈະເປັນສ່ວນໜຶ່ງເພື່ອປະກອບສ່ວນເຮັດໃຫ້ລັດຖະບານມີລາຍຮັບເພີ່ມຂຶ້ນເພື່ອນຳໄປພັດທະນາແຫຼ່ງທ່ອງທ່ຽວແລະອື່ນໆ.

• 21/12/2020