ຈັດງານມະໂຫລານສຽງແຄນເຊື້ອຊາດລາວມໍລະດົກໂລກ

   ເມື່ອວັນທີ 18 ທັນວາ ຜ່ານມານີ້ທີ່ຫໍວັດທະນະທຳແຫ່ງຊາດສະມາຄົມສິລະປະແຄນລາວຮ່ວມກັບກົມສິລະປະການສະແດງກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວ (ຖວທ) ໄດ້ຈັດງານມະໂຫລານສຽງແຄນເຊື້ອຊາດລາວມໍລະດົກໂລກພາຍໃຕ້ການເປັນປະທານຂອງ ທ່ານ ກິແກ້ວ ໄຂຄຳພິທູນ ເລຂາທິການສູນກາງພັກ,ລັດຖະມົນ ຕີກະຊວງ ຖວທ ໂດຍໃຫ້ກຽດເຂົ້າຮ່ວມຂອງທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ຜູ້ນຳພັກ-ລັດ, ແຂກຖືກເຊີນ ແລະມວນຊົນເຂົ້າຮ່ວມ.

   ທ່ານ ກິແກ້ວ ໄຂຄຳພິທູນ ກ່າວຄຳເຫັນເປີດງານວ່າ: ການຈັດງານສຽງແຄນເຊື້ອຊາດລາວມໍລະດົກຄັ້ງນີ້ແມ່ນມີເນື້ອໃນ ແລະຄວາມໝາຍສຳຄັນຫຼາຍເພື່ອເປັນການສະເຫຼີມສະຫຼອງວັນຊາດ 2 ທັນວາ ຄົບຮອບ 45 ປີ ແລະວັນເກີດ ປະທານໄກສອນ ພົມວິຫານ ຄົບຮອບ 100 ປີ, ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ, ເພື່ອສ້າງຈິດສຳນຶກໃຫ້ທົ່ວປວງຊົນລາວທັງຊາດຮູ້ບຸນຄຸນ, ຄຸນງາມຄວາມດີ ແລະຄວາມປີຊາສາມາດຂອງພັກປະຊາຊົນປະຕິວັດລາວຜູ້ຈັດຕັ້ງ ແລະພ້ອມດຽວກັນັ້ນກໍເພື່ອເປັນການປຸກລະດົມກຳລັງໃຈຂອງຂະບວນການສິໝໍແຄນ, ໝໍລຳ,ຊ່າງເຮັດແຄນເພື່ອພ້ອມກັນອະນຸລັກຮັກສາ ແລະເສີມຂະຫຍາຍມູນເຊື້ອຂອງແຄນ ແລະສຽງແຄນເຊື້ອຊາດລາວມໍລະດົກໂລກໃຫ້ຍືນຍົງຢູ່ຄູ່ຄົນລາວ, ຊາດລາວ ແລະຊາວໂລກຕະຫຼອດໄປ.

   ທ່ານກ່າວຕື່ມວ່າ: ການໄດ້ມາສຽງແຄນເຊື້ອຊາດລາວມໍລະດົກໂລກບວກກັບມໍລະດົກໂລກຫຼວງພະບາງ, ວັດພູຈຳປາສັກແລະທົ່ງໄຫຫີນຊຽງຂວາງໄດ້ນຳເອົາຊື່ສຽງ, ກຽດສັກສີອັນໃຫຍ່ຫຼວງໃຫ້ແກ່ຊາດລາວເຮົາກໍຄືມວນມະນຸດໂລກສະນັ້ນຈຶ່ງຮຽກຮ້ອງໃຫ້ປະຊາຊົນລາວທຸກຄົນຈົ່ງພ້ອມກັນປົກປັກຮັກສາ, ເສີມຂະຫຍາຍມໍລະດົກໂລກດັ່ງກ່າວໃຫ້ຄົງຢູ່ກັບຄົນລາວ ແລະປະເທດລາວຕະຫຼອດໄປ.

  ງານດັ່ງກ່າວມີຫຼາກຫຼາຍລາຍການສະແດງຄື: ດ່ຽວແຄນແລະປະດິດລາຍແຄນໂດຍແຄນອັນດັບໜຶ່ງຂອງ ສປປ ລາວ, ລຳຄອນສະຫວັນສັນລະເສີນປະທານໄກສອນພົມວິຫານ, ຂັບຊຳເໜືອລາວ ແລະຂັບໄຕແດງ, ລຳຜູ້ໄທປະກອບບົດຟ້ອນ, ເປົ່າແຄນມົ້ງປະກອບບົດຟ້ອນໝູ່ຍິງ-ຊາຍ, ຮ້ອງເພັງແກ້ວຫຼັກ, ລຳຕັ່ງຫວາຍປະກອບບົດຟ້ອນ, ດ່ຽວແຄນ, ເປົ່າແຄນວົງຍິງ-ຊາຍ, ຟ້ອນປະກອບເພັງສຽງແຄນລາວແລະອື່ນໆ, ທຸກໆລາຍການສະແດງແມ່ນໄດ້ສ້າງຄວາມເບີກບວນມວນຊື່ນໃຫ້ແກ່ກັບຜູ້ເຂົ້າ ຮ່ວມຊົມ ໄດ້ເປັນຢ່າງດີ.

  ໃນພິທີຍັງໄດ້ປະກາດຜົນ ແລະມອບລາງວັນການແຂ່ງຂັນສືມືຊ່າງແຄນດີເດັ່ນທົ່ວປະເທດປະຈຳປີ 2020 ຊຶ່ງຜູ້ຊະນະເລີດໄດ້ແກ່ທ່ານ ບົວວັນ ອຸດົມສຸກ ເມືອງພູກູດ ແຂວງຊຽງຂວາງໄດ້ຮັບເງິນ 4 ລ້ານກີບ, ໂລ້ລາງວັນ, ໃບກຽດຕິຄຸນ, ຮອງຊະນະເລີດໄດ້ແກ່ທ່ານ ຈັນສີ ອຸດົມສຸກ ໄດ້ຮັບເງິນ 3,2 ລ້ານກີບ, ໂລ້ລາງວັນ, ໃບກຽດຕິຄຸນ, ລາງວັນທີສາມໄດ້ແກ່ທ່ານ ແກ່ນ ອຸດົມສຸກ ໄດ້ຮັບເງິນ 2,5 ລ້ານກີບ, ໂລ້ລາງວັນໃບກຽດຕິຄຸນ ແລະລາງວັນຊົມເຊີຍໄດ້ແກ່ທ່ານສາຍທອງສາຍນະສິນໄດ້ຮັບເງິນ 2 ລ້ານກີບ, ໃບກຽດຕິຄຸນ.

แชร์