ຂສສຂ ໃຫ້ເງຶ່ອນໄຂພິເສດແກ່ນັກລົງທຶນ

  ຫວ່າງບໍ່ດົນມານີ້, ທ່ານ ທອງໃສ ໄຊຍະວົງຄຳດີ ຫົວໜ້າເຂດເສດຖະກິດພິເສດສະຫວັນນະເຂດ (ຂສສຂ) ຫຼື SEZA ໄດ້ລາຍງານສະພາບການເຄື່ອນໄຫວວຽກ ງານຕໍ່ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ທີ່ເຄື່ອນໄຫວເຮັດວຽກຢູ່ເຂດດັ່ງກ່າວໂດຍທ່ານຫົວໜ້າເຂດໄດ້ໃຫ້ຮູ້ວ່າ: ຂສສຂ ມີພາລະບົດ ບາດສຳຄັນໃນຂົງເຂດເສດຖະກິດແຫ່ງຊາດແລະຮັບການສ້າງຂຶ້ນໃນປີ 2002 ຕາມແລ້ວເສດຖະກິດຕາເວັນອອກ-ຕາເວັນຕົກຂອງລັດຖະບານໂດຍເຂດດັ່ງກ່າວມີ 5 ຈຸດຄື: ຈຸດA ເຂດການບໍລິການ-ການຄ້າ, ຈຸດB ແລະB1 ເປັນເຂດອຸດສາຫະກຳການຜະລິດ, ຈຸດC ເປັນເຂດອຸດສະຫາກຳ ແລະການຂົນສົ່ງ logistics, ຈຸດD ເປັນເຂດທີ່ພັກອາໄສ ແລະຈຸດຊາຍແດນແດນສະຫວັນເປັນເຂດການຄ້າຊາຍແດນຊຶ່ງປະຈຸບັນໄດ້ໂຮມໂຕເຂົ້າເປັນເຂດເສດຖະກິດພິເສດສະຫວັນ-ເຊໂນ ແລະໄດ້ເອີ້ນຊື່ວ່າ: ເຂດ ເສດຖະກິດພິເສດສະຫວັນນະເຂດ.

   ທ່ານຫົວໜ້າ ຂສສຂ ໄດ້ສະເໜີບັນດານະໂຍບາຍສົ່ງເສີມການລົງທຶນໂດຍມີໄລຍະຍົກເວັ້ນອາກອນລາຍໄດ້ຊຶ່ງຍົກເວັ້ນອາກອນກໍາໄລແຕ່ 2-10 ປີນັບແຕ່ປີມີກຳໄລເປັນຕົ້ນໄປ; ສຳລັບອັດຕາອາກອນກຳໄລເກັບໃນອັດຕາ 8-10% ພາຍຫຼັງສິ້ນສຸດໄລຍະການຍົກເວັ້ນ, ອາກອນລາຍໄດ້ສ່ວນບຸກຄົນເກັບໃນອັດຕາດຽວກັນ 5% ທັງຄົນລາວ-ຄົນ ຕ່າງປະເທດ ແລະອາກອນເງິນປັນຜົນເກັບໃນອັດຕາ 5% ສໍາລັບບໍລິສັດທີ່ມີ 2 ຂາຮຸ້ນຂຶ້ນໄປ, ສະເພາະກ່ຽວກັບນະໂຍບາຍດ້ານທີ່ດິນຜູ້ລົງທຶນສາມາດເຊົ່າດິນຢູ່ໃນ ຂສສຊ ໄດ້ເຖິງ 75 ປີ ແລະສາມາດຕໍ່ອາຍຸການເຊົ່າໄດ້ນອກນີ້ຜູ້ເຊົ່າຍັງສາມາດໂອນທີ່ດິນໃຫ້ແກ່ບຸກຄົນທີ 3 ໄດ້.

 ສຳລັບການປະຕິບັດໜ້າວຽກ: ໜ່ວຍງານບໍລິການປະຕູດຽວຂອງ ຂສສຊ ໂດຍເຈົ້າໜ້າທີ່ເຂດດັ່ງກ່າວສາມາດອະນຸມັດເອກະສານການລົງທຶນພາຍໃນ 5 ມື້ລັດຖະການເຊັ່ນ: ໃບອະນຸຍາດການລົງທຶນ, ໃບທະບຽນວິສາຫະກິດ, ເອກະສານທາງອາກອນ, ກາປະທັບບໍລິສັດ; ນອກນີ້,ຍັງອຳນວຍຄວາມສະດວກເປັນຕົ້ນການອອກອະນຸຍາດນໍາເຂົ້າ-ສົ່ງອອກ, ໃບຢັ້ງຢືນແຫຼ່ງກຳເນີດສິນຄ້າ, ໂກຕ້າແຮງງານ, ໃບອະນຸຍາດພັກເຊົາ, ບັດປະຈໍາຕົວນັກລົງທຶນ,ວິຊ່າເຂົ້າ-ອອກ ແລະໃຫ້ຄໍາປຶກສາທາງດ້ານນິຕິກຳ.

   ທ່ານ ທອງໃສ ໄຊຍະວົງຄຳດີ ຍັງຢືນຢັນເຖິງຄວາມຄືບໜ້າທາງດ້ານການພັດທະນາຊຶ່ງມາຮອດປະຈຸບັນມີບໍລິສັດທີ່ເຂົ້າມາຈົດທະບຽນການລົງທຶນທັງໝົດມີ 148 ບໍລິສັດ ຈາກ 15 ປະເທດ, ແບ່ງອອກເປັນ 3 ຂະແໜງການຄື: ອຸດສະຫາກຳ 69 ບໍລິສັດ, ການຄ້າ 19 ບໍລິສັດ, ການບໍລິການ 60 ບໍລິສັດ ແລະມີມູນຄ່າການລົງ ທຶນ 544 ລ້ານໂດລາ ແລະທຶນຈົດທະບຽນ 234 ລ້ານໂດລາ. ສະເພາະດ້ານການນໍາເຂົ້າ-ສົ່ງອອກແມ່ນມີມູນຄ່າການນໍາເຂົ້າສະເລ່ຍຕໍ່ປີ 290 ລ້ານໂດລາແລະມູນຄ່າການສົ່ງອອກສະເລ່ຍຕໍ່ປີ 375 ລ້ານໂດລາ, ໃນດ້ານແຮງງານມີຈໍານວນແຮງງານທັງໝົດ 4.362 ຄົນ ໃນນີ້ມີຄົນລາວມີ 4.199 ຄົນ ແລະ ຄົນຕ່າງປະເທດ 163 ຄົນ.

   ໃນໂອກາດດັ່ງກ່າວ, ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ຕີລາຄາສູງຕໍ່ຄວາມພະຍາຍາມຂອງຄະນະນຳ, ພະນັກງານ, ເຈົ້າໜ້າທີ່ລວມທັງນັກລົງທຶນ-ຜູ້ປະກອບການກໍ່ຄືພະນັກງານ-ກຳມະກອນທີ່ປະ ຕິບັດໜ້າທີ່ໃນ ຂສສຊ ທີ່ມີຄວາມພະຍາຍາມສູງໃນການເຮັດໜ້າທີ່ ແລະຄ່ຽນສົ່ງສິນຄ້າ; ຜະ ລິດ ແລະຈຳໜ່າຍພາຍໃນ-ສົ່ງອອກຕ່າງປະເທດຢ່າງຕໍ່ເນື່ອງໃນທ່າມກາງທີ່ມີການລະບາດຂອງພະຍາດໂຄວິດ-19, ເຊື່ອໝັ້ນວ່າ: ທຸກຄວາມພະຍາຍາມຂອງທຸກພາກ ສ່ວນຈະບັນລຸໝາກຜົນຕາມແຜນທີ່ວາງໄວ້; ພ້ອມນັ້ນ, ຍັງຮຽກຮ້ອງໃຫ້ຄະນະ ຂສສຊ ຈົ່ງສືບຕໍ່ຄຸ້ມຄອງ, ອຳນວຍຄວາມສະດວກໃນທຸກດ້ານຕາມນະໂຍບາຍການລົງ ທຶນຂອງລັດຖະບານກໍ່ຄືບັນຫາທີ່ຕິດພັນກັບຂະແໜງເສດຖະກິດ, ການເງິນ-ເງິນຕາທັງນີ້ກໍ່ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດກໍ່ຄືຂອງແຂວງສະຫວັນນະເຂດ.

--------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์