ປະທານປະເທດເປັນກຽດເຂົ້າຮ່ວມເປີດໃຊ້ທາງດ່ວນເສັ້ນທາງທຳອິດແຕ່ວຽງຈັນ-ວັງວຽງ

  ຕອນເຊົ້າວັນທີ 20 ທັນວາ 2020 ໄດ້ມີພິທີເປີດນຳໃຊ້ເສັ້ນທາງດ່ວນນະຄອນຫຼວງວຽງຈັນ-ວັງວຽງ ຂຶ້ນທີ່ດ່ານເກັບເງິນສີເກີດເມືອງນາຊາຍທອງ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລັດຖະມົນຕີກະຊວງແຜນການ ແລະການລົງທຶນ, ທ່ານ ຈ້າຍຕົງ ເອກອັກ ຄະລັດຖະທູດວິສາມັນຜູ້ມີອຳນາດເຕັມແຫ່ງສປຈີນປະຈຳ ສປປ ລາວ ພ້ອມດ້ວຍແຂກຮັບເຊີນຈາກຝ່າຍລາວ ແລະຈີນເຂົ້າຮ່ວມ.

   ໂຄງການກໍ່ສ້າງທາງດ່ວນດັ່ງກ່າວໄດ້ເຊັນສັນຍາສຳປະທານໃນຕົ້ນເດືອນ ເມສາ 2018 ຫຼັງຈາກນັ້ນແມ່ນໄດ້ເລີ່ມກໍ່ສ້າງແລະມາຮອດປະຈຸບັນໄດ້ກໍ່ສ້າງສຳເລັດຊຶ່ງໂຄງການໄດ້ກໍ່ສ້າງສຳເລັດກ່ອນສັນຍາ 5 ເດືອນ ລວມມີຄວາມຍາວທັງໝົດ 109,10 ກິໂລແມັດ, ຕັດຜ່ານ 4 ເມືອງຄື: ເມືອງນາຊາຍທອງ ນະຄອນຫຼວງວຽງຈັນ, ເມືອງໂພນໂຮງ, ເມືອງຫີນເຫີບ ແລະເມືອງວັງວຽງ ແຂວງວຽງຈັນ ສ່ວນຄວາມກວ້າງຂອງທາງ 23 ແມັດ ອອກແບບໂດຍມາດຕະຖານເຕັກນິກທາງດ່ວນ ສປ ຈີນ

ແລະມາດຕະຖານເຕັກນິກຂອງອາຊຽນເປັນພື້ນຖານມີອຸໂມງ 1 ແຫ່ງ, ຂົວ 45 ແຫ່ງ ຍາວທັງໝົດ 2.408 ແມັດ, ຄວາມໄວອອກແບບ 100 ກິໂລແມັດຕໍ່ຊົ່ວໂມງ ຕອນທາງດັ່ງກ່າວປະກອບມີຈຸດເຊື່ອມຕໍ່ທັງໝົດ 7 ແຫ່ງ ແລະສະຖານີເກັບເງິນ 8 ແຫ່ງ (ນະຄອນຫຼວງວຽງຈັນ, ບ້ານນາຊອນ, ບ້ານບົວ, ບ້ານສະກ້າ ໂພນໂຮງ, ຫີນເຫີບ, ນໍ້າງື່ມ ແລະວັງວຽງ) ຈຸດພັກລົດມີ 2 ຈຸດ, ສູນຄວບຄຸມ 2 ບ່ອນ ແລະສູນສ້ອມແປງ 2 ບ່ອນລົງທຶນທັງໝົດ 1.293 ລ້ານໂດລາ.

  ສຳລັບການເກັບຄ່າຜ່ານທາງນັ້ນລົດທົ່ວໄປແມ່ນເກັບໃນລາຄາ  0,06 ໂດລາ ຕໍ່ກິໂລແມັດ, ສ່ວນປະເພດລົດບັນທຸກແມ່ນຈະມີເຄື່ອງຕິດຊັງນໍ້າໜັກເກັບຕາມການຄິດໄລ່ຂອງນໍ້າໜັກ ແລະປະເພດພາຫະນະທີ່ມີແຮງຈັກຕໍ່າກ່ວາ 350 ຊີຊີແມ່ນບໍ່ສາມາດຂຶ້ນໄປນຳໃຊ້ໃນເສັ້ນທາງດັ່ງກ່າວນີ້ໄດ້.

แชร์