ຫາລືໃຊ້ເຕັກໂນໂລຊີຖານຂໍ້ມູນໃຫຍ່ເຂົ້າໃນການຄຸ້ມຄອງແຮງງານ

  ສະຖາບັນເຕັກໂນໂລຊີຄອມພິວເຕີ ແລະເອເລັກໂຕຣນິກ, ກະຊວງວິທະຍາສາດ ແລະເຕັກໂນໂລຊີ (ກວຕ) ໄດ້ຈັດກອງປະຊຸມປຶກສາຫາລືກ່ຽວກັບການນຳໃຊ້ເຕັກໂນໂລຊີຖານຂໍ້ມູນໃຫຍ່ (Big Data) ເຂົ້າຊ່ວຍໃນການຄຸ້ມຄອງແຮງງານໃນ ສປປ ລາວ ຂຶ້ນໃນວັນທີ 17 ທັນວາ 2020 ທີ່ນະຄອນຫຼວງວຽງຈັນເປັນປະທານໂດຍທ່ານ ວິລະສັກ ອິນທະປະຖາ ຫົວໜ້າສະຖາບັນເຕັກໂນໂລຊີຄອມພິວເຕີ ແລະເອເລັກໂຕຣນິກ, ມີຮອງຫົວໜ້າຫ້ອງການອົງການສົ່ງເສີມການຄ້າ ແລະການລົງທຶນ ສ. ເກົາຫຼີ ປະຈຳ ສປປ ລາວ, ຜູ້ຕາງໜ້າຈາກກົມພັດທະນາສີມືແຮງງານ ແລະຈັດຫາງານກະຊວງແຮງງານ ແລະສະຫວັດດີການສັງຄົມ (ຮສສ), ພະແນກ ຮສສ ນະ ຄອນຫຼວງວຽງຈັນ ແລະພະແນກວິທະຍາສາດ ແລະເຕັກໂນໂລຊີ ນະຄອນຫຼວງວຽງຈັນ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.

 ທ່ານ ພອນປະເສີດ ສຸລິນທອນ ຫົວໜ້າສູນບໍລິການວິຊາການສະຖາບັນເຕັກໂນໂລຊີຄອມພິວເຕີ ແລະເອເລັກໂຕຣນິກໄດ້ນຳສະເໜີກ່ຽວກັບຈຸດປະສົງຂອງໂຄງການດັ່ງກ່າວຄື: ເພື່ອດໍາເນີນການສຶກສາຄວາມເປັນໄປໄດ້ໃນການຄົ້ນຄວ້າ ແລະພັດທະນາການເຕັກໂນໂລຊີຖານຂໍ້ມູນໃຫຍ່ (Big Data) ເພື່ອສົ່ງເສີມ ແລະພັດທະນາການ ຄຸ້ມຄອງແຮງງານໃນ ສປປ ລາວ, ນໍາຂໍ້ສະເໜີຕ່າງໆຈາກຜົນຂອງການສຶກສາຄວາມເປັນໄປໄດ້ລາຍງານໃຫ້ແກ່ກະຊວງວິທະຍາສາດ ແລະເຕັກໂນໂລຊີເພື່ອສົ່ງເສີມການ ນຳໃຊ້ເຕັກໂນໂລຊີທີ່ເໝາະສົມເຂົ້າໃນການພັດທະນາເສດຖະກິດ-ສັງຄົມໃນ ສປປ ລາວ ແລະສືບຕໍ່ສ້າງລະບົບການຄຸ້ມຄອງ Big Data ເຂົ້າໃນການຄຸ້ມຄອງແຮງງານ ຢູ່ໃນ ສປປ ລາວ ແລະແຮງງານລາວທີ່ໄປເຮັດວຽກຢູ່ຕ່າງປະເທດ.

  ຜົນປະໂຫຍດຂອງລະບົບດັ່ງກ່າວທາງພາກລັດແມ່ນຈະຊ່ວຍໃນວຽກງານປ້ອງກັນຊາດປ້ອງກັນຄວາມສະຫງົບໃນການຕິດຕາມຄົນຕ່າງປະເທດ, ສົ່ງເສີມ ແລະຈັດຫາຕະຫຼາດແຮງງານ, ພາກລັດຈະໄດ້ມີຖານຂໍ້ມູນທີ່ຊັດເຈນເຊື່ອຖືໄດ້, ເປັນບ່ອນບໍລິການໃຫ້ແກ່ປະຊາຊົນໄດ້ເຂົ້າເຖິງ, ສ້າງຄວາມໂປ່ງໃສໃນການເກັບລາຍຮັບ, ຫັນການເກັບລາຍຮັບໃຫ້ການເປັນແບບທັນສະໄໝ, ຊ່ວຍໃນການບໍລິຫານງານຂອງໜ່ວຍງານລັດຖະບານໄດ້ເຮັດວຽກສະດວກສະບາຍ, ພະນັກງານການນຳຂອງຂະແໜງການສາມາດຮູ້ເກັບກຳສະຖິຕິຕ່າງໆໄດ້ຢ່າງມີວິທະຍາສາດ ແລະ ສໍາລັບປະຊາຊົນແມ່ນຈະສາມາດຊ່ວຍໃນການຮ້ອງຮຽນແບບວ່ອງໄວ, ເຂົ້າເຖິງຂໍ້ມູນຊຸມຊົນໄດ້ສະດວກສະ ບາຍ,ເຂົ້າເຖິງການບໍລິການພາກລັດໄດ້ສະດວກສະບາຍ,ເພີ່ມການປ້ອງກັນພາຍໃນຊຸມຊົນໃຫ້ເຂັ້ມແຂງຂຶ້ນ ແລະສາມາດເຫັນໄດ້ເຖິງຄວາມຕ້ອງການດ້ານຕະຫຼາດແຮງ ງານ.

แชร์