ຮ້ານແລກປ່ຽນ-ໂອນເງິນດ່ວນ ເຊື່ອມຊຶມວຽກຕ້ານຟອກເງິນ

  ສຳນັກງານຂໍ້ມູນຕ້ານການຟອກເງິນ (ສຕຟງ) ຈັດຕັ້ງການເຜີຍແຜ່ວຽກງານຕ້ານການຟອກເງິນ ແລະການສະໜອງທຶນໃຫ້ເເກ່ການກໍ່ການຮ້າຍ (AML /CFT) ແລະບັນດານິຕິກໍາທີ່ຕິດພັນໃຫ້ແກ່ບັນດາຮ້ານແລກປ່ຽນເງິນຕາ ແລະບໍລິສັດໂອນເງິນດ່ວນໃນວັນທີ 17 ທັນວາ2020 ທີ່ຫ້ອງປະຊຸມສະຖາບັນການທະນາຄານໂດຍການເຂົ້າຮ່ວມຂອງທ່ານ ນາງ ຂັນທະລີ ວົງໄຊຍະລາດ ຮອງຫົວໜ້າ ສຕຟງ, ພ້ອມນີ້ກໍ່ມີການເຂົ້າຮ່ວມບັນດາຜູ້ປະກອບການເຈົ້າຂອງທຸລະກຳການເງິນຂອງ 2 ພາກ ສ່ວນ ແລະມີນັກວິທະຍາກອນຈາກ ສຕຟງ.

  ການເຜີຍແຜ່ໃນຄັ້ງນີ້ກໍເພື່ອເຮັດໃຫ້ບັນດາຜູ້ປະກອບການ-ເຈົ້າຂອງທຸລະກຳການເງິນຢູ່ຮ້ານແລກປ່ຽນເງິນຕາ ແລະບໍລິສັດໂອນເງິນດ່ວນມີຄວາມຮັບຮູ້, ເຂົ້າໃຈກ່ຽວ ກັບການຈັດຕັ້ງປະຕິບັດວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ; ການປະເມີນຄວາມສ່ຽງຕາມຫຼັກການບໍລິຫານຄວາມສ່ຽງ (RBA) ດ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ ແລະກົນໄກການປະສານງານລະຫວ່າງເຈົ້າໜ້າທີ່ກັບຮ້ານແລກປ່ຽນເງິນຕາ ແລະບໍລິສັດໂອນເງິນດ່ວນ, ອີກຈຸດປະສົງໜຶ່ງທີ່ຮີບດ່ວນແມ່ນສະເໜີໃຫ້ຮ້ານແລກປ່ຽນເງິນຕາ ແລະບໍລິສັດໂອນເງິນດ່ວນສະໜອງຂໍ້ມູນເພື່ອນໍາໄປເຮັດການປະເມີນຕາມຫຼັກການບໍລິຫານຄວາມສ່ຽງເຂົ້າຮ່ວມ.

 ວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍເປັນວຽກງານທີ່ມີຄວາມສໍາຄັນຕໍ່ສະພາບການດໍາເນີນເສດຖະກິດໃນປະເທດ, ສປປ ລາວ ກໍຄືລັດຖະບານເຮົາໄດ້ໃຫ້ຄວາມສໍາຄັນໃນວຽກງານດັ່ງກ່າວໂດຍສ້າງຕັ້ງຄະນະກໍາມະການລະດັບຊາດໂດຍປະກອບມີຮອງນາຍົກລັດຖະມົນຕີເປັນປະທານ, ບັນດາລັດ ຖະມົນຕີ-ຮອງລັດຖະມົນຕີຈາກ 13 ກະຊວງ ທຽບເທົ່າເຂົ້າຮ່ວມໃນຄະນະແນໃສ່ຈັດຕັ້ງປະຕິບັດວຽກງານດັ່ງກ່າວບົນພື້ນຖານເງື່ອນໄຂ 40 ຂໍ້ແນະນໍາຂອງສາກົນທີ່ ສປປ ລາວ ເປັນພາຄີ, ໃນຜ່ານມາ ສປປ ລາວ ໄດ້ຮັບການປະເມີນຜົນຮອບດ້ານຄັ້ງທໍາອິດໃນປີ 2010 ຊຶ່ງຜົນການປະເມີນໃນຄັ້ງນັ້ນແມ່ນຕົກຢູ່ໃນບັນຊີເທົາເຮັດໃຫ້ ສປປ ລາວ ພົບຄວາມຫຍຸ້ງຍາກຫຼາຍດ້ານ, ເຖິງຢ່າງໃດກໍດີ ສປປ ລາວ ໄດ້ສູ້ຊົນປັບປຸງແກ້ໄຂຂໍ້ຄົງຄ້າງຕ່າງໆ ໂດຍໄດ້ອອກບັນດານິຕິກໍາທີ່ຕິດພັນຈໍານວນ 24 ສະບັບ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຕ້ານການຟອກເງິນໃຫ້ສອດຄ່ອງຕາມມາດຖານສາກົນ, ສ້າງກົນໄກແລະຂັ້ນຕອນຕ່າງໆ ເພື່ອນໍາໄປປະຕິບັດໃຫ້ເກີດປະສິດທິຜົນຕາມນິຕິກໍາທີ່ວາງອອກໄດ້ຈໍານວນໜຶ່ງຈຶ່ງເຮັດໃຫ້ ສປປ ລາວ ສາມາດອອກຈາກບັນຊີເທົາຂອງສາກົນໃນປີ  2017, ຫຼັງຈາກນັ້ນກໍ່ ມີການດໍາເນີນການປະເມີນຄວາມສ່ຽງລະດັບຊາດຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍສໍາເລັດໃນກາງປີ 2018 ຊຶ່ງສາມາດກໍານົດໄດ້ໄພຂົ່ມຂູ່ຂອງການຟອກເງິນ,ຂະແໜງການທຸລະກິດທີ່ມີຄວາມສ່ຽງຈະຖືກສວຍໃຊ້ໃນຂະບວນການຟອກເງິນ ແລະເລັ່ງແກ້ໄຂຂໍ້ຄົງຄ້າງທີ່ໄດ້ຈາກຜົນການປະເມີນເພື່ອປັບປຸງປະສິດທິພາບ ຂອງການຈັດຕັ້ງປະຕິບັດວຽກງານດັ່ງກ່າວໃຫ້ສອດຄ່ອງ ແລະຮັບປະກັນໄດ້ຕາມມາດຖານສາກົນຍິ່ງຂຶ້ນ.

ເພື່ອກະກຽມການປະເມີນຜົນຮອບດ້ານຄັ້ງທີ 2 ໃນສົກປີ 2020-2021, ລັດຖະບານໄດ້ສ້າງຕັ້ງຄະນະສະເພາະກິດຂຶ້ນໂດຍມີຮອງນາຍົກລັດຖະມົນຕີ, ລັດຖະມົນຕີຮອງລັດຖະມົນຕີຈໍານວນ 25 ທ່ານປະກອບຢູ່ໃນຄະນະກໍາມະການ ແລະໄດ້ແບ່ງເປັນ 4 ກຸ່ມວຽກຄື: ວຽກງານເຜີຍແຜ່ ແລະ ເຊື່ອມຊືມ,ວຽກງານນິຕິກໍາ ແລະ ກົນ ໄກ, ວຽກງານຄຸ້ມຄອງ ແລະວຽກງານການດໍາເນີນຄະດີ, ໃນນັ້ນມີ ສຕຟງ ເປັນກອງເລຂາທີ່ເຮັດວຽກໃນການປະສານງານ ແລະມາຮອດປະຈຸບັນ 4 ກຸ່ມວຽກດັ່ງກ່າວໄດ້ດຳເນີນການຕາມພາລະບົດບາດ, ໜ້າທີ່ຂອງຕົນຢ່າງເປັນເຈົ້າການ, ມີຄວາມຮັບຜິດຊອບສູງ ແລະມີຜົນຄືບໜ້າດີຂຶ້ນຕາມລຳດັບ.

  ສະນັ້ນ, ເພື່ອຮັບປະກັນໃຫ້ວຽກງານດັ່ງກ່າວດໍາເນີນໄປດ້ວຍຜົນສໍາເລັດນັ້ນມັນຈຶ່ງເລັ່ງທວງໃຫ້ທຸກພາກສ່ວນໃນສັງຄົມໂດຍສະເພາະບັນດາຮ້ານແລກປ່ຽນເງິນຕາ ແລະບໍລິສັດໂອນເງິນດ່ວນຕ້ອງໄດ້ສະໜອງຂໍ້ມູນໃຫ້ແກ່ອົງການກ່ຽວຂ້ອງໂດຍສະເພາະແມ່ນໃຫ້ລາຍງານຕໍ່ ສຕຟງ ເພື່ອນໍາໄປເຮັດການປະເມີນຕາມຫຼັກການບໍລິຫານຄວາມສ່ຽງ, ພ້ອມນີ້, ກໍ່ເພີ່ມທະວີຄວາມເປັນເຈົ້າການໃນຖານະຜູ້ເຮັດວຽກງານແລກປ່ຽນ ແລະໂອນເງິນດ່ວນຕ້ອງມີຄວາມຮັບຜິດຊອບຂອງຕົນໃຫ້ສູງຂຶ້ນກວ່າເກົ່າແນໃສ່ປົກປ້ອງຜົນປະໂຫຍດຂອງລັດ,ສັງຄົມ, ສິດ ແລະຜົນປະໂຫຍດອັນຊອບທໍາຂອງພົນລະເມືອງກໍຄືການປະຕິບັດພັນທະໜ້າທີ່ຂອງຕົນຕໍ່ສາກົນເຮັດໃຫ້ສັງຄົມມີຄວາມສະຫງົບແລະຄວາມເປັນລະບຽບຮຽບຮ້ອຍປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດກໍຄືຮັບປະກັນສະຖຽນລະພາບທາງດ້ານເສດຖະກິດ, ການເງິນ-ເງິນຕາ ໃຫ້ເປັນລະບຽບຮຽບຮ້ອຍ, ໝັ້ນຄົງຕາມກົດໝາຍ ແລະນິຕິກຳຕ່າງໆທີ່ຕິດພັນ.

-------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์