ສຳມະນາ ການປູກມອນ-ລ້ຽງມ້ອນ

ສະຖາບັນນິເວດວິທະຍາ ແລະເຕັກໂນໂລຊີຊີວະພາບ, ກະຊວງວິທະຍາສາດ ແລະເຕັກໂນໂລຊີ (ກວຕ) ຮ່ວມກັບບໍລິສັດສອງມືນາງຈຳກັດ ແລະມະຫາວິທະຍາໄລຊູໂຈ ໄດ້ຈັດກອງປະຊຸມສຳມະນາວິທະຍາສາດກ່ຽວກັບການປູກມອນ-ລ້ຽງມ້ອນ ໃນໂຄງການຮ່ວມມືພັດທະນາການປູກມອນ-ລ້ຽງມ້ອນ ເປັນອຸດສາຫະກຳ ແລະທັນສະໄໝ.

  ກອງປະຊຸມດັ່ງກ່າວໄດ້ຈັດຂຶ້ນໃນລະຫວ່າງວັນທີ 15-19 ທັນວາ 2020, ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຮ່ວມຂອງທ່ານ ນາງ ແກ້ວສາຍໃຈ ໄຊຍະສອນ ປະທານບໍລິສັດສອງມືນາງຈຳກັດ, ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ ແລະ ທ່ານ Huang Xing ຮອງອະ ທິການບໍດີມະຫາວິທະຍາໄລຊູໂຈ ລາວ, ເຂົ້າຮ່ວມມີທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ,ມີຫົວໜ້າຫ້ອງການ, ກົມ, ສະຖາບັນຈາກກະຊວງວິທະຍາສາດ ແລະເຕັກໂນໂລຊີ, ມີຜູ້ຕາງໜ້າກະຊວງອຸດສາຫະກຳ ແລະການຄ້າ, ກະຊວງກະສິກຳ ແລະປ່າໄມ້, ກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ, ມະຫາວິທະຍາໄລແຫ່ງຊາດ, ສະມາຄົມຫັດຖະກຳ, ນັກທຸລະກິດ, ກຸ່ມຜູ້ຜະລິດ, ຊາວສວນມອນ ແລະລ້ຽງມ້ອນ.

  ຈຸດປະສົງຂອງການຈັດກອງປະຊຸມສຳມະນາໃນຄັ້ງນີ້ແມ່ນເພື່ອເປັນການຖ່າຍທອດຄວາມຮູ້,ສົນທະນາ ແລະແລກປ່ຽນບົດຮຽນລະຫວ່າງບັນດາຜູ້ທີ່ດຳເນີນທຸລະກິດ, ນັກວິຊາການ ແລະ ຊ່ຽວຊານດ້ານການປູກມອນ-ລ້ຽງມ້ອນທັງສູນກາງ ແລະທ້ອງຖິ່ນ,ນອກຈາກນັ້ນຍັງໄດ້ຮັບຟັງການນໍາສະເໜີບົດຈາກຊ່ຽວຊານສະເພາະດ້ານການປູກມອນ-ລ້ຽງມ້ອນຈາກມະຫາວິທະຍາໄລຊູໂຈ ສປ ຈີນ, ຈາກວິຊາການປູກມອນ-ລ້ຽງມ້ອນ ຈາກສະຖາບັນນິເວດວິທະຍາ ແລະເຕັກໂນໂລຊີຊີວະພາບ ແລະຈາກບໍລິ ສັດສອງມືນາງຈຳກັດ ແລະບໍລິສັດ ປູກມອນ-ລ້ຽງມ້ອນ ແຂວງຊຽງຂວາງ ແລະແຂວງວຽງຈັນ.

   ນອກຈາກນັ້ນຜູ້ເຂົ້າຮ່ວມກອງປະຊຸມສໍາມະນາຍັງໄດ້ທັດສະນະສຶກສາທີ່ສວນສາທິດປູກມອນ-ລ້ຽງມ້ອນຫຼັກ 18 ຂອງ ບໍລິສັດສອງມືນາງ ຈໍາກັດ, ຊຶ່ງສວນດັ່ງກ່າວມີເນື້ອທີ່ຫຼາຍກວ່າ 8 ເຮັກຕາ ແລະມີໂຮງເຮືອນ 7 ຫຼັງ ສຳລັບລ້ຽງມ້ອນ, ສາວໄໝ-ລັງໄໝແລະເຮັດແຜ່ນຜ້າຫົ່ມ, ໂອກາດດັ່ງກ່າວນີ້, ຜູ້ເຂົ້າຮ່ວມທັງໝົດຍັງໄດ້ຮັບເບ້ຍມອນເພື່ອນຳໄປປູກທົດລອງທີ່ສວນຂອງຕົນເອງແລະນຳເອົາບົດຮຽນໄປເຜີຍແຜ່ໃຫ້ເກີດຜົນຢູ່ຂັ້ນທ້ອງຖິ່ນ.

แชร์