ລາວ-ຍີ່ປຸ່ນ ຜັນຂະຫຍາຍຮ່ວມມືເຕັກນິກວິຊາການ

ວັນທີ 16 ທັນວາ 2020 ທີ່ກະຊວງການຕ່າງປະເທດ,ໄດ້ມີພິທີລົງນາມຈົດໝາຍແລກປ່ຽນລະຫວ່າງລາວ ແລະຍີ່ປຸ່ນ (Exchange Notes) ເພື່ອຜັນຂະຫຍາຍສັນຍາວ່າດ້ວຍການຮ່ວມມືດ້ານເຕັກນິກ-ວິຊາການລະຫວ່າງອາຊຽນ-ຍີ່ປຸນ ທີ່ໄດ້ລົງນາມກັນໃນເດືອນພຶດສະພາຜ່ານມາ, ຕາງໜ້າຝ່າຍລາວຮ່ວມລົງນາມຄັ້ງນີ້ແມ່ນທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ແລະ ຕາງໜ້າຝ່າຍຍີ່ປຸ່ນແມ່ນ ທ່ານ ທາເກວາກະ ເຄໂຊ (TAKEWAKA Keizo), ເອກອັກຄະລັດຖະທູດຍີ່ປຸ່ນປະຈໍາ ສປປ ລາວ ແລະມີບັນດາພະນັກງານກ່ຽວຂ້ອງຂອງທັງສອງຝ່າຍເຂົ້າຮ່ວມຢ່າງພ້ອມພຽງ.

  ຈຸດປະສົງລະດັບຄາດໝາຍຂອງການລົງນາມຈົດໝາຍແລກປ່ຽນໃນຄັ້ງນີ້ແມ່ນເພື່ອຜັນຂະຫຍາຍສັນຍາວ່າດ້ວຍການຮ່ວມມືທາງດ້ານເຕັກນິກ-ວິຊາການລະຫວ່າງອາຊຽນ ແລະຍີ່ປຸ່ນທີ່ໄດ້ລົງນາມກັນໃນເດືອນພຶດສະພາ 2020 ຜ່ານມາໂດຍສະເພາະການອະນຸມັດ ແລະອຳນວຍຄວາມສະດວກໃຫ້ແກ່ບັນດາຊ່ຽວຊານ ແລະອາສາສະໝັກຍີ່ປຸ່ນໃນເວລາເດີນທາງເຂົ້າມາປະຕິບັດໜ້າທີ່ວຽກງານຢູ່ ສປປ ລາວ ຕາມໂຄງການແຜນງານພາຍໃຕ້ສັນຍາຮ່ວມມືທາງດ້ານເຕັກນິກ-ວິຊາການດັ່ງກ່າວ.

   ໃນໂອກາດນີ້, ທ່ານ ທອງຜ່ານ ສະຫວັນເພັດ ໄດ້ຕີລາຄາສູງ ແລະສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນຊ່ວຍເຫຼືອຂອງລັດຖະບານຍີ່ປຸ່ນໃຫ້ແກ່ ສປປ ລາວ ໃນໄລຍະຜ່ານມາ, ຊຶ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະຫວັງຢ່າງຍິ່ງວ່າຍີ່ປຸ່ນຈະສືບຕໍ່ໃຫ້ການສະໜັບສະໜູນ ແລະຊ່ວຍເຫຼືອໃນໄລຍະຕໍ່ໜ້າໂດຍສະເພາະການຮັດແຄບຄວາມແຕກໂຕນດ້ານການພັດທະນາພາຍໃນອາຊຽນດ້ວຍການຈັດຕັ້ງປະຕິບັດແຜນປະຕິບັດງານຂໍ້ລິເລິ່ມການເຊື່ອມໂຍງອາຊຽນສະບັບທີ 4 ຫຼື ໄອເອໄອສະບັບທີ 4 ໄລຍະ 2021-2025, ການຈັດຕັ້ງປະຕິບັດແຜນແມ່ບົດວ່າດ້ວຍການເຊື່ອມຈອດອາຊຽນ 2025, ການພັດທະນາຊັບພະຍາກອນມະນຸດ ແລະການຮ່ວມມືພາຍໃຕ້ເຄືອຂ່າຍຕົວເມືອງອັດສະລິຍະອາຊຽນ.

  ໃນໂອກາດດຽວກັນນີ້, ທ່ານ ທາເກ ວາກະ ເຄໂຊ ໄດ້ສະແດງຄວາມຍິນດີທີ່ໄດ້ຕາງໜ້າໃຫ້ລັດຖະບານຍີ່ປຸ່ນຮ່ວມລົງນາມຈົດໝາຍແລກປ່ຽນລະຫວ່າງ ສປປ ລາວ ແລະ ຍີ່ປຸ່ນໃນຄັ້ງນີ້ ແລະເຊື່ອໝັ້ນວ່າ: ການຮ່ວມມືດ້ານເຕັກນິກ-ວິຊາການລະຫວ່າງອາຊຽນ ແລະ ຍີ່ປຸ່ນຈະປະກອບສ່ວນອັນສຳຄັນ ແລະ ເສີມເຕີມໃຫ້ແກ່ການສະ ໜັບສະໜູນ-ຊ່ວຍເຫຼືອສອງຝ່າຍຂອງລັດຖະບານຍີ່ປຸ່ນໃຫ້ແກ່ ສປປ ລາວ ນັບມື້ນັບເພີ່ມຂຶ້ນ ແລະປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ກໍ່ຄືປະກອບສ່ວນເຂົ້າໃນການສົ່ງເສີມການພົວພັນ-ຮ່ວມມືສອງຝ່າຍລາວ-ຍີ່ ປຸ່ນນັບມື້ນັບແໜ້ນແຟ້ນ.

แชร์