ສພຂ ຫຼວງພະບາງ ປະຊຸມທ້າຍທັນສະໄໝ

  ສະພາປະຊາຊົນແຂວງ (ສພຂ) ຫຼວງພະບາງໄດ້ເປີດກອງປະຊຸມທ້າຍສະໄໝຊຸດທີ I ໃນວັນທີ 16 ທັນວາ 2020 ໂດຍການເປັນປະທານຂອງທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ຄຳຂັນ ຈັນທະວີສຸກ ເລຂາພັກແຂວງເຈົ້າແຂວງຫຼວງພະບາງ, ມີສະມາຊິກສະພາປະຈຳເຂດເລືອກຕັ້ງທີ 6,ຄະນະປະຈຳພັກແຂວງກຳມະການພັກແຂວງ, ສະມາຊິກສະພາປະຊາຊົນແຂວງ,ຄະນະປະຈຳສະພາ ປະຊາຊົນແຂວງ, ມີຫົວໜ້າ-ຮອງພະແນກການ, ອົງການຈັດຕັ້ງມະຫາຊົນຂອງ ແຂວງເຂົ້າຮ່ວມ.

   ທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງກ່າວວ່າ: ກອງປະຊຸມຄັ້ງນີ້, ຈະໄດ້ຮັບຟັງການລາຍງານຫຍໍ້ກ່ຽວກັບການຊີ້ນໍາໆພາຈັດຕັ້ງປະຕິບັດວຽກງານຮອບດ້ານ 5 ປີ ຜ່ານມາ 2016–2020, ຈາກນັ້ນທ່ານເຈົ້າແຂວງ ແລະກ່າວລາໜ້າທີ່, ເລືອກຕັ້ງເອົາເຈົ້າແຂວງຜູ້ໃໝ່ຕາມການສະເໜີຂອງຄະນະປະຈໍາສະພາປະຊາຊົນແຂວງ ແລະພິຈາລະນາຮັບຮອງເອົາໂຄງປະກອບກົງຈັກຂອງອົງການປົກຄອງແຂວງ, ການແຕ່ງຕັ້ງຮອງເຈົ້າແຂວງ, ພ້ອມດ້ວຍຫົວໜ້າພະແນກການ, ຫົວໜ້າອົງການລັດທຽບເທົ່າພະແນກຕາມການສະເໜີຂອງທ່ານເຈົ້າແຂວງ, ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຮອບດ້ານຂອງອົງການ ປົກ ຄອງແຂວງ, ພະແນກການກົມກອງ ອ້ອມຂ້າງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງຫຼວງພະບາງປະຈໍາ ປີ 2020 ແລະແຜນການປະຈໍາປີ 2021 ແລະ ຮັບຟັງລາຍງານກ່ຽວກັບການເຄື່ອນໄຫວຈັດຕັ້ງປະຕິບັດວຽກງານ 5 ປີ, ວຽກງານ 1 ປີ ຜ່ານມາ ແລະ ແຜນການປະຈໍາປີ 2021 ຈາກຄະນະປະຈໍາສະພາປະຊາຊົນແຂວງ.

  ພ້ອມນີ້ບັນດາສະມາຊິກສະພາປະຊາຊົນແຂວງໄດ້ເປັນເອກະພາບຮັບຮອງເອົາການຈັດວາງບຸກຄະລາກອນເຂົ້າຮັບຕຳແໜ່ງເປັນຫົວໜ້າພະແນກ ແລະຫ້ອງການທຽບເທົ່າໃນກົງຈັກການຈັດຕັ້ງ ຂອງແຂວງຕາມການສະເໜີຂອງທ່ານ ເຈົ້າແຂວງ ເພື່ອສືບຕໍ່ຊີ້ນຳ-ນຳພາ ແລະພັດທະນາແຂວງຫຼວງພະບາງໃນ 5 ປີ ຕໍ່ໜ້າປະກອບມີຄື: ຮັບຮອງເອົາທ່ານ ຄຳຂັນ ຈັນທະວີສຸກ ເປັນເຈົ້າແຂວງຫຼວງພະບາງ, ທ່ານ ບຸນເລື່ອມ ມະນີວົງ ແລະທ່ານ ນາງ ສີລິພອນ ສຸພັນທອງ ເປັນຮອງເຈົ້າແຂວງ, ທ່ານ ຄຳຫຼ້າ ລຽນປະດິດ ເປັນປະທານກວດກາລັດ ແຂວງ, ທ່ານພົນຈັດຕະວາ ສົມຈັນ ແກ້ວຈັນດາ ເປັນຫົວກອງບັນຊາການປ້ອງກັນຄວາມສະຫງົບແຂວງ, ທ່ານ ພັນເອກ ແປ້ນຄຳ ບຸດຈັນແພງ ເປັນຫົວ ໜ້າການເມືອງກອງບັນຊາການທະຫານ,ທ່ານ ສົມພອນ ສີອຸດົມພັນ ຫົວໜ້າພະແນກພາຍໃນ, ທ່ານ ສຸລິສັກ ພົມມາລີ ຫົວໜ້າພະ ແນກແຮງງານແລະສະຫວັດດີການສັງຄົມ, ທ່ານ ມີໄຊ ໄຊເກີຢາຈົ່ງຕົ່ວ ເປັນຫົວໜ້າພະແນກຍຸຕິທຳ, ທ່ານ ບຸນສົມ ຄຸນມະນີ ຫົວໜ້າພະແນກອຸດສາຫະກຳແລະການຄ້າ, ທ່ານ ສີວອນ ວົງຄໍາຈັນ ຫົວໜ້າພະແນກກະສິກໍາ ແລະປ່າໄມ້ແຂວງ, ທ່ານ ຈິນດາວົງ ໂພສີຄໍາ ເປັນຫົວໜ້າພະແນກແຜນການ ແລະການລົງທຶນ, ທ່ານ ສໍານານ ສົນທະນີ ຫົວໜ້າຫ້ອງວ່າການປົກຄອງແຂວງ,ທ່ານ ຄໍາສອນ ພົງສະຫວັດດີ ເປັນຫົວໜ້າພະແນກສາທາລະນະສຸກແຂວງ, ທ່ານ ຄິນຄໍາ ເລັ່ງສະຫວັດ ເປັນຫົວໜ້າພະແນກການເງິນ, ທ່ານ ບົ່ງວ່າງ ຫວ່າງ ເຈ່ຍຊ່າ ເປັນຫົວໜ້າພະແນກໂຍທາທິການ ແລະຂົນສົ່ງ, ທ່ານ ນາງ ສຸດາພອນ ຄົມທະວົງ ເປັນຫົວໜ້າພະແນກຖະແຫຼງ ຂ່າວ, ວັດທະນະທໍາ ແລະທ່ອງທ່ຽວ, ທ່ານ ວົງເພັດ ອຸດົມລິດ ເປັນຫົວໜ້າພະ ແນກສຶກສາທິການ ແລະກີລາ, ທ່ານຈັນທະວົງ ຜົນນະຈິດ ເປັນຫົວໜ້າພະ ແນກຊັບພະຍາກອນທໍາມະຊາດ ແລະສິ່ງ ແວດລ້ອມ,ທ່ານ ລັດຕະນະໄຊ ຄໍາສີດາ ຫົວໜ້າພະແນກການຕ່າງປະເທດ, ທ່ານ ສົມໃຈ ວັນນະສີ ຫົວໜ້າພະແນກພະລັງ ງານ ແລະບໍ່ແຮ່, ທ່ານ ພູມີ ອໍເພັດສານ ເປັນຫົວໜ້າພະແນກໄປສະນີໂທລະຄົມມະນາຄົມ ແລະການສື່ສານ,ທ່ານ ສະເຫວີຍ ສີລາວົງ ເປັນຫົວໜ້າຫ້ອງການມໍລະດົກໂລກປະຈໍາແຂວງ, ທ່ານ ເພັງ ຄໍາມະວົງ ເປັນຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ.

  ກອງປະຊຸມດັ່ງກ່າວຈະດຳເນີນໄປເປັນເວລາ 4 ວັນ ຈຶ່ງຈະສໍາເລັດ.

--------------

ຂ່າວ: ສີສຸວັນ ຮູບພາບ: ໜັງສືພິມເສດຖະກິດ-ສັງຄົມ

แชร์