11 ເດືອນ ອັດຕະປືເກັບລາຍຮັບໄດ້ 97,82%

  ວັນທີ 11 ທັນວາ 2020 ທ່ານ ບຸນໂຈມ ອຸບົນປະເສີດ ຮອງ ລັດຖະມົນຕີກະຊວງການເງິນໄດ້ລົງພົບປະໂອ້ລົມພະນັກງານການເງິນທົ່ວແຂວງອັດຕະປື, ພິທີໄດ້ຈັດຂຶ້ນທີ່ພະແນກການເງິນແຂວງອັດຕະປື. 

  ໂອກາດດັ່ງກ່າວທ່ານຮອງລັດຖະມົນຕີກະຊວງການເງິນ, ກໍ່ໄດ້ຮັບຟັງການລາຍງານການຈັດຕັ້ງປະຕິບັດວຽກງານໃນ 11 ເດືອນ ປີ2020 ຈາກທ່ານ ຄຳເຜີຍ ໂສມ ຖາວອນ ຫົວໜ້າພະແນກການເງິນແຂວງອັດຕະປືຊຶ່ງໄດ້ຍົກໃຫ້ເຫັນການຈັດຕັ້ງປະຕິບັດແຜນງົບປະມານ11 ເດືອນ ແມ່ນການຈັດຕັ້ງປະຕິບັດແຜນລາຍຮັບ-ລາຍ ຈ່າຍງົບປະມານປີ 2020 ສາມາດບຸກທະລຸໄດ້ດ້ວຍການຂຸດຄົ້ນລາຍຮັບເຂົ້າງົບປະມານ ແລະປະຕິບັດການຄຸ້ມຄອງລາຍຈ່າຍງົບປະມານຜ່ານການຈັດຕັ້ງປະຕິບັດງົບ ປະມານໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງແຂວງ ແລະຕິດພັນກັບການຈັດຕັ້ງປະຕິບັດນະໂຍບາຍວຽກງານ 3 ສ້າງຂະແໜງ ການເງິນໃນການສ້າງແຂວງເປັນຫົວໜ່ວຍຍຸດທະສາດທາງດ້ານການເງິນ, ສ້າງເມືອງເປັນຫົວໜ່ວຍເຂັ້ມແຂງທາງດ້ານການເງິນ ແລະສ້າງບ້ານເປັນຫົວໜ່ວຍພັດທະ ນາດ້ານການເງິນ,ການຈັດຕັ້ງປະຕິບັດແຜນງົບປະມານໄດ້ຮັບຜົນສໍາເລັດຫຼາຍດ້ານໂດຍສະເພາະການຂຸດຄົ້ນລາຍຮັບເຂົ້າງົບປະມານສາມາດຕອບສະໜອງລາຍຈ່າຍໃຫ້ແກ່ການເຄື່ອນໄຫວຂອງກົງຈັກພັກ-ລັດເປັນຕົ້ນລາຍຈ່າຍເງິນເດືອນ, ເງິນນະໂຍບາຍ, ເງິນບໍລິຫານ, ເງິນດັດສົມ ແລະເງິນລົງທຶນໄດ້ໂດຍພື້ນຖານ, ສຳລັບວຽກງານລາຍຮັບງົບປະມານປະຕິບັດໄດ້ 125,57 ຕື້ກີບ ເທົ່າກັບ 97,82% ຂອງແຜນດັດແກ້,ລາຍຮັບສູນກາງປະຕິບັດໄດ້ 37,77 ຕື້ກີບ ເທົ່າກັບ 75,37% ຂອງແຜນດັດແກ້, ລາຍຮັບທ້ອງຖິ່ນປະຕິບັດໄດ້ 87,79 ຕື້ກີບເທົ່າກັບ 122,19% ຂອງແຜນດັດແກ້, ຮັບດຸ່ນດ່ຽງຈາກສູນກາງ 220,75 ຕື້ກີບ ເທົ່າກັບ 90,44% ຂອງແຜນດັດແກ້.

  ໂອກາດນີ້ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນໄດ້ໃຫ້ກຽດໂອ້ລົມ, ໂດຍໄດ້ເໜັ້ນໜັກຫຼາຍບັນຫາເພື່ອຊ່ວຍໃຫ້ວຽກງານການເງິນງົບປະ ມານຂອງແຂວງອັດຕະປືໂດຍສະເພາະກ່ຽວກັບກົນໄກການຄຸ້ມຄອງການບໍລິຫານການເງິນມີບາງຈຸດມີຄວາມອຸດຕັນດັ່ງນັ້ນຕ້ອງມີຄວາມຈຳເປັນປະຕິຮູບຂະແໜງການເງິນໃຫ້ເຂົ້າສູ່ລວງເລິກໂດຍສະເພາະກົນໄກສ່ວຍສາອາກອນ,ຕັ້ງໜ້າປັບປຸງລະບົບການຈັດຕັ້ງຂອງຂະແໜງການເງິນໃຫ້ກະທັດຮັດ,ໜັກແໜ້ນ ແລະເຂັ້ມແຂງມີຄວາມຄ່ອງຕົວ, ມີປະສິດທິພາບ ແລະປະສິດທິຜົນ, ມີຄວາມກົມກຽວລະຫວ່າງການຄຸ້ມຄອງລວມສູນຕາມສາຍຕັ້ງ ແລະສາຍຂວາງຂອງກະຊວງການເງິນ ແລະອົງການປົກ ຄອງທ້ອງຖິ່ນແຕ່ລະຂັ້ນ,ບໍາລຸງ ແລະກໍ່ສ້າງພະນັກງານ-ລັດຖະກອນຂະແໜງການເງິນໃຫ້ມີຄວາມໜັກແໜ້ນທາງດ້ານຄຸນທາດການເມືອງ, ຄຸນສົມບັດສິນທໍາປະຕິ ວັດ, ມີຈັນຍາບັນ, ຈັນຍາທຳ, ມີຄວາມເຂັ້ມແຂງທາງດ້ານວິຊາສະເພາະ ແລະສ້າງໃຫ້ເປັນລະບົບຄົບຊຸດເຂົ້າສູ່ມາດຕະຖານຕາມຕໍາແໜ່ງງານແຕ່ລະປະເພດ ແລະຫັນເປັນວິຊາຊີບ, ຕັ້ງໜ້າສູ້ຊົນປັບປຸງກົນໄກຄຸ້ມຄອງການເງິນ-ງົບປະມານໃຫ້ມີປະສິດທິພາບໂລ່ງລຽນ,ຫຼຸດຜ່ອນບັນດາຂອດຂັ້ນ ແລະສິ່ງອຸດຕັນຕ່າງໆ, ເຂັ້ມງວດປະຕິບັດວິໄນການເງິນ-ງົບປະມານຕາມການແບ່ງຂັ້ນຄຸ້ມຄອງແຕ່ສູນກາງລົງຮອດທ້ອງຖິ່ນ.

แชร์