ວິທະຍາ ຄອງແຊ້ມ ເທັນນິດ ນໍ້າດື່ມຫົວເສືອ ໂອເພັນ 2020

   ພິທີປິດການແຂ່ງຂັນເທັນນິດນໍ້າດື່ມຫົວເສືອ 2020 ໄດ້ ມີຂຶ້ນໃນວັນທີ 13 ທັນວາຜ່ານມາທີ່ສະໂມສອນເທັນນິດເຈົ້າອານຸວົງນະຄອນຫຼວງວຽງຈັນ, ໃຫ້ກຽດ ເຂົ້າ ຮ່ວມໂດຍ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວ, ທ່ານ ສູນທອນ ພົມມະຈັກ ປະທານບໍລິສັດເບຍລາວ ຈຳກັດ ແລະທ່ານ ດາວວອນ ພະຈັນທະວົງ ປະທານສະຫະພັນເທັນນິດແຫ່ງຊາດລາວພ້ອມດ້ວຍພາກສ່ວນທີ່ກ່ຽວຂ້ອງ, ຄູຝຶກ, ນັກກີລາ ແລະພໍ່ແມ່ຜູ້ປົກຄອງນັກກີລາຢ່າງຫຼວງຫຼາຍ.

  ໂອກາດດັ່ງກ່າວ, ທ່ານ ດາວວອນ ພະຈັນທະວົງ ກ່າວວ່າ: ການແຂ່ງຂັນຄັ້ງນີ້ຈັດຂຶ້ນກໍເພື່ອສະເຫຼີມສະຫຼອງວັນຊາດທີ 2 ທັນວາຄົບຮອບ 45 ປີ ແລະວັນຄ້າຍວັນ ເກີດຂອງທ່ານປະທານ ໄກສອນ ພົມວິຫານ ຄົບຮອບ 100 ປີ ພ້ອມທັງຈັດຂຶ້ນເພື່ອສ້າງຂະບວນການ ແລະໃຫ້ນັກກີລາລາວໄດ້ມີການອອກກໍາລັງກາຍສາມາດພັດທະ ນາສີມືຕົນເອງເພື່ອເປັນນັກກີລາທີມຊາດລາວໃນອະນາຄົດໂດຍຈັດຂຶ້ນມາແຕ່ວັນທີ 14 ພະຈິກ ຈົນເຖິງ 13 ທັນວາ 2020 ໂດຍມີການຊີງໄຊ 11 ລາຍການ ແລະຊີງເງິນລາງວັນລວມ 25 ລ້ານກີບ ແລະມີນັກກີລາເຂົ້າຮ່ວມແຂ່ງຂັນທັງໝົດ 135 ຄົນ (ຍິງ 15 ຄົນ).

   ຜ່ານການແຂ່ງຂັນຜົນປາກົດວ່າປະເພດຊາຍດ່ຽວສາຍ ກ ຊະນະເລີດ ວິທະຍາລາຊາວະດີໄດ້ຮັບຂັນແຊ້ມພ້ອມເງິນ 1,5 ລ້ານກີບ ແລະຮອງຊະນະເລີດສະຖາພອນ ສິມມະລາວົງ ໄດ້ຮັບຂັນພ້ອມເງິນລາງວັນ 8 ແສນກີບ; ປະເພດຊາຍ ຄູ່ສາຍ ກ+ຂ ຊະນະເລີດ ວິທະຍາ+ ໄຊສົງຄາມ ແລະຮອງຊະນະເລີດ ສະຖາພອນ+ວິລະກົດ; ປະເພດຊາຍຄູ່ສາຍ ຂ ຊະນະເລີດໂຕນີ+ຫຼອຍ ໄດ້ຮັບຂັນແຊ້ມ ແລະຮອງຊະນະ ເລີດຈັກປະເສີດ ພອນປະເສີດ ແລະພຸດທະວົງ ໄດ້ຮັບຂັນຮອງແຊ້ມ.

ສ່ວນປະເພດຊາຍຄູ່ສາຍ ຄ ຊະນະເລີດ ທ່ານ ແສງພອນ ພົນອາມາດ + ທ່ານ ສົມສັກ ສະກຸນຄໍາ ແລະຮອງຊະນະເລີດ ທ່ານ ພຸດທະ ສັກພົມມະຈັກ-ທ່ານ ວິສິດ ຈັນ ທະພອນ; ປະເພດອາວຸໂສ ທີ 1 ທ່ານ ດຣ ຄໍາຮຸ່ງ ພົມມະທະວົງສາ +ທ່ານ ກະລຸນາ ອະໄພ ແລະຮອງຊະນະເລີດທ່ານ ປຣະດິດ + ທ່ານ ຄຸນໂນພອນ ສົມເດັດ; ປະ ເພດຄູ່ປະສົມຊະນະເລີດ ທ່ານ ນາງ ນີ ນີ+ທ່ານ ແສງພອນ ພົນອາມາດ ແລະຮອງຊະນະເລີດ ທ່ານ ນາງ ມະໄລທອງ ມະຫາວັນ+ທ່ານ ຕຸ້ຍ ບຸນທະລາ; ປະເພດເຍົາວະຊົນ 12 ປີຊະນະເລີດ ທ້າວ ໄດມ້ອນ ບຸນທະລາ ໄດ້ຮັບຂັນແຊ້ມພ້ອມເງິນລາງວັນ 1 ລ້ານກີບ; ປະເພດເຍົາວະຊົນຊາຍ 14 ປີ ຊະນະເລີດ ທ້າວ ໄດມ້ອນ ບຸນທະລາ ໄດ້ຮັບຂັນແຊ້ມພ້ອມເງິນລາງວັນ 1 ລ້ານກີບ;ປະເພດເຍົາວະຊົນຊາຍ 16 ປີທ້າວ ສົມພອນ ໄດ້ຮັບຂັນແຊ້ມພ້ອມເງິນລາງວັນ 1 ລ້ານກີບ; ປະເພດເຍົາວະຊົນຍິງ 16 ປີຊະນະເລີດ ນາງ ມາໄລລັກ ປະທຸມມາກູໂຄແນນ ໄດ້ຮັບຂັນແຊ້ມພ້ອມເງິນລາງວັນ 1 ລ້ານກີບ.

 ໃນພິທີປິດການແຂ່ງຂັນລາຍການດັ່ງກ່າວ ກໍຍັງໄດ້ມີພິທີມອບ-ຮັບການສະໜັບສະໜູນຫຼັກຈາກບໍລິສັດ ເບຍລາວ ຈຳກັດ ລວມມູນຄ່າ 90 ລ້ານກີບ ໃຫ້ກຽດມອບໂດຍທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດບໍລິສັດ ເບຍລາວ ຈຳກັດ ແລະ ທ່ານ ຕຸ້ຍ ບຸນທະລາ ອຸປະຖຳເຄື່ອງຕ່າງໆ ແລະເພື່ອເປັນການຕອບສະໜອງຄວາມຮູ້ບຸນຄຸນທາງສະຫະພັນເທັນນິດແຫ່ງຊາດກໍຍັງໄດ້ມອບໃບກຽດຕິຄຸນໃຫ້ແກ່ທັງສອງພາກສ່ວນອີກດ້ວຍ. 

แชร์