ກອງປະຊຸມຄົບຄະນະບໍລິຫານງານ ອພສ ແຂວງບໍ່ແກ້ວ

  ກອງປະຊຸມຄົບຄະນະບໍລິ ຫານງານປະຈຳການ ແລະຄະນະກັມມະການບໍລິຫານງານຂອງຄະນະອົງການພຸດທະສາສະໜາສັມພັນລາວ (ອພສ) ແຂວງບໍ່ແກ້ວຄັ້ງທີ I ສະໄໝທີ VII ໄດ້ຈັດຂຶ້ນໃນວັນທີ 15 ທັນວາ 2020 ທີ່ ແຂວງດັ່ງກ່າວ ໂດຍການເປັນປະທານຂອງພະຫຼັກຄໍາຣັດຕະນະມະນີໂຊຕິກາຈານ (ອາຊຍາທັມ ຄໍາເງິນ ຄໍາວົງສ໌) ເຈົ້າຄະນະແຂວງ, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ມີຄະນະບໍລິຫານງານປະຈໍາການ ແລະຄະນະກໍາມະການບໍລິຫານງານ ອພສ ແຂວງການນໍາຂັ້ນແຂວງ, ພະແນກການ, ພາກສ່ວນກ່ຽວຂ້ອງເຂົ້າຮ່ວມ.

  ກອງປະຊຸມຄັ້ງນີ້ໄດ້ສະຫຼຸບຜົນສຳເລັດການຈັດຕັ້ງປະຕິບັດກອງປະຊຸມໃຫຍ່ຜູ້ແທນພະສົງທົ່ວແຂວງບໍ່ແກ້ວ ຄັ້ງທີ VII ແລະທິດ ທາງແຜນການໃນຕໍ່ໜ້າ, ຮ່ວມກັນຄົ້ນຄວ້າພິຈາລະນາ ແລະ ໄດ້ຮັບຮອງຂໍ້ຕົກລົງຂອງປະທານສູນກາງ ອພສ ແຫ່ງ ສປປ ລາວ ສະບັບ ເລກທີ 323/ອພສ ລົງວັນທີ16   ພະຈິກ 2020 ວ່າດ້ວຍການຮັບຮອງເອົາຄະນະບໍລິຫານງານ ອພສ ແຂວງບໍ່ແກ້ວສະໄໝທີ VII(2020-2025), ຮັບຮອງເອົາບົດສະຫຼຸບລາຍຮັບ-ລາຍຈ່າຍການດຳເນີນຈັດຕັ້ງປະຕິບັດວຽກ ງານກອງປະຊຸມໃຫຍ່ຜູ້ແທນພະສົງທົ່ວແຂວງ ຄັ້ງທີ VII ລະຫວ່າງວັນທີ 18-19 ພະຈິກ 2020 ທີ່ຜ່ານມາ.

  ພະຫຼັກຄໍາຣັດຕະນະມະນີໂຊຕິກາຈານ (ອາຊຍາທັມ ຄໍາເງິນ ຄໍາວົງສ໌) ເຈົ້າຄະນະແຂວງ ແລະທ່ານ  ບົວຄົງ ນາມມະວົງ ເຈົ້າແຂວງ ບໍ່ແກ້ວໄດ້ຮຽກຮ້ອງໃຫ້ ອພສ  ແຂວງບໍ່ແກ້ວພ້ອມກັນສ້າງຄວາມສາມັກຄີເຮັດວຽກລວມໝູ່ຄະນະສຽງສ່ວນໜ້ອຍຂຶ້ນກັບສຽງສ່ວນຫຼາຍ, ຕ້ອງກຳນົດສ້າງແບບແຜນວິທີການປະຕິບັດວຽກງານຕົວຈິງ, ການກຳນົດເວລາຜັກຜ່ອນໃນບັ້ນດຳເນີນກອງປະຊຸມໃຫຍ່ແມ່ນມີຄວາມແກ່ຍາວ, ເຫັນດີເປັນເອກະພາບສູງ ແລະພ້ອມກັນຈັດຕັ້ງປະຕິບັດໃນການປະກອບຄໍາຄິດເຫັນຕໍ່ກອງປະຊຸມເພື່ອໄດ້ນໍາໄປແກ້ໄຂ, ປັບປຸງ ຂໍ້ບົກຜ່ອງໃຫ້ໄດ້ຮັບຜົນດີ ໃຫ້ມີແບບແຜນໃນການຈັດຕັ້ງປະຕິບັດວຽກງານຕົວຈິງໃຫ້ຈັດຕັ້ງປະຕິບັດແບບແຜນການບໍລິຫານງານ-ວິຊາການຕົວຈິງໃຫ້ແທດເໝາະ ແລະສອດຄ່ອງກັບຄວາມຮຽກຮ້ອງຕ້ອງການໃນປະຈຸບັນໃຫ້ໄດ້ ຮັບໝາກຜົນດີ.

ສ່ວນວຽກງານຕ່າງໆໃຫ້ຄະນະບໍລິຫານງານປະຈໍາ-ຄະນະກຳມະການ ອພສ ແຂວງທຸກອົງໄດ້ນໍາໄປຈັດຕັ້ງປະຕິບັດໃນຈຸດເວລາທີ່ມີຄວາມໝາຍສຳຄັນ ແລະຈົ່ງສາມັກຄີກັນເຂົ້າເປັນກ້ອນກຳລັງແຮງມະຫາສານ, ສືບຕໍ່ເສີມຂະຫຍາຍມູນເຊື້ອອັນສະຫງ່າຣາສີຂອງ ອພສ ເພື່ອພ້ອມກັນຍາດໃຫ້ໄດ້ຜົນສຳເລັດອັນໃຫຍ່ຫຼວງກວ່າເກົ່າທີ່ກອງປະຊຸມຄົບຄະນະບໍລິຫານງານປະຈໍາການ ອພສ ແຂວງຄັ້ງທີ I ສະໄໝທີ VII ໃນຄັ້ງນີ້ໄດ້ວາງອອກ, ເພື່ອເຮັດໃຫ້ວຽກງານກາຍເປັນການກະທຳຕົວຈິງໃນຊີວິດປະຈຳ ວັນພ້ອມທັງສູ້ຊົນເພື່ອພະພຸດທະສາສະໜາຈະເລີນກ້າວໜ້າອອກຕົນຍາດໂຍມຮັ່ງມີປະເທດຊາດເຂັ້ມແຂງສັງຄົມມີຄວາມຜາສຸກມີຄວາມສະເໝີພາບສີວິໄລແລະຍຸຕິທໍາ.

แชร์