ສະຫວັນ ຜ່ານຮ່າງປັບປຸງແຜນຜັງເທສະບານ 2 ເມືອງ

 ເມື່ອອາທິດຜ່ານມາທີ່ຫ້ອງປະຊຸມພະແນກໂຍທາທິການ ແລະຂົນສົ່ງ ແຂວງສະຫວັນນະເຂດ ໄດ້ຈັດກອງປະຊຸມສໍາມະນາຜ່ານຮ່າງກ່ຽວກັບການສຶກສາທົບທວນ ແລະປັບປຸງແຜນຜັງຊີ້ນໍາລວມ ແລະການວາງແຜນຜັງລະອຽດເທສະບານນະຄອນໄກສອນ ພົມວິຫານ ແລະເທສະບານເມືອງອຸທຸມພອນພ້ອມຜ່ານຮ່າງແຜນຈັດສັນທີ່ດິນເບື້ອງຕົ້ນຂອງແຂວງ ໂດຍການເປັນປະທານຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ມີບັນດາທ່ານສະມາຊິກສະພາແຫ່ງຊາດ, ສະ ມາຊິກສະພາປະຊາຊົນແຂວງ, ການນໍາຈາກພະແນກການ, ອະດີດການນໍາແຂວງ, ພະນັກງານປະຕິວັດອາວຸໂສບໍານານ ແລະພາກສ່ວນກ່ຽວຂ້ອງຈາກພະແນກໂຍທາທິການ ແລະຂົນສົ່ງ ແລະພະແນກຊັບພະຍາກອນທໍາມະຊາດແລະສິ່ງແວດລ້ອມແຂວງເຂົ້າຮ່ວມ.

  ທ່ານ ນາງ ພາວັນ ບົວຫຼວງລາດ ຮອງຫົວໜ້າພະແນກໂຍທາທິການ ແລະຂົນສົ່ງແຂວງໄດ້ສະເໜີລາຍງານ 8 ຫົວ ຂໍ້ໃຫຍ່ເປັນຕົ້ນ: ສະພາບການພັດທະນາ ແລະການຄຸ້ມຄອງຕົວເມືອງນະຄອນ ໄກສອນ ພົມວິຫານ ແລະເມືອງອຸທຸມພອນໃນໄລຍະຜ່ານມາ,ຈຸດປະສົງຂອງການສຶກສາທົບທວນ ແລະປັບປຸງແຜນຜັງ, ຄວາມຈໍາເປັນຂອງການສຶກສາ, ທົບທວນ ແລະປັບປຸງແຜນຜັງ, ວິໄສທັດຂອງການພັດທະນາ, ຂອບເຂດ ຂອງການສຶກສາທົບທວນ ແລະປັບປຸງແຜນຜັງ, ບາດກ້າວ, ຂັ້ນຕອນໃນການຈັດຕັ້ງປະຕິບັດ, ຜົນໄດ້ຮັບຈາກການວາງແຜນ, ຄາດຄະເນການພັດທະນາ ແລະມາດຕະການໃນການຈັດຕັ້ງປະຕິບັດ, ນະຄອນໄກສອນ ພົມວິຫານ ເປັນເມືອງເອກຂອງແຂວງເປັນຈຸດໃຈກາງທາງດ້ານການປົກຄອງ, ການຄ້າ, ການສຶກສາ, ການລົງທຶນ, ການບໍລິການ, ສາທາລະນຸປະໂພກ, ສາທາລະນະປະໂຫຍດອື່ນໆ ຊຶ່ງມີພົນລະເມືອງ 1 ແສນກວ່າຄົນ ໂດຍນະຄອນໄກສອນ ພົມວິຫານ ໄດ້ເຮັດການສຶກສາທົບທວນແຜນຜັງຊີ້ນໍາລວມກວມເອົາ 36 ບ້ານ ແຕ່ການກໍານົດເນື້ອທີ່ສໍາຫຼວດອອກແບບ ແລະການວາງແຜນຜັງລະອຽດຂອງເທສະບານມີພຽງ 16 ບ້ານ; ສ່ວນເມືອງອຸທຸມພອນເປັນຈຸດໃຈກາງຂອງເສັ້ນທາງຜ່ານ, ເປັນຈຸດຕັດກັນຂອງເສັ້ນທາງການຂົນສົ່ງສິນຄ້າລະຫວ່າງຫວຽດນາມ-ໄທຜ່ານຂົວມິດຕະພາບ 2 ເຂົ້າສູ່ສາຍທາງຍຸດທະສາດເລກທີ 13 ຂອງລາວ ໂດຍຜ່ານທາງເລກ 9 ນອກ ຈາກນີ້, ຍັງມີເຂດຍຸດທະສາດການທະຫານທີ່ສໍາຄັນໃນການປົກປັກຮັກສາເອກະລາດຂອງຊາດເຮົາ, ຊຶ່ງເມືອງອຸທຸມພອນມີປະຊາກອນ 95 ພັນກວ່າຄົນ ເປັນເມືອງທີ່ຕັ້ງຂອງເຂດເສດ ຖະກິດພິເສດສະຫວັນ-ເຊໂນ, ເປັນສະຖານທີ່ຕັ້ງອໍານວຍຄວາມສະດວກທາງດ້ານການຜະລິດ, ມີສູນກາງດ້ານໂລຈິສຕິກ ແລະອະນາຄົດສະໜາມບິນສະຫວັນນະເຂດອາດຈະຖືກຍົກຍ້າຍອອກມາຢູ່ເມືອງອຸທຸມພອນ ແລະຄາດວ່າຈະມີຜົນທາງດ້ານບວກໃຫ້ແກ່ເສດຖະກິດຂອງຂົງເຂດດັ່ງກ່າວຊຶ່ງການທົບທວນແຜນຜັງຊີ້ນໍາລວມຂອງເມືອງອຸທຸມພອນກວມເອົາ 13 ບ້ານ ໃນນັ້ນໄດ້ສໍາຫຼວດ ແລະວາງແຜນຜັງລະອຽດພຽງ 4 ບ້ານຄື: ບ້ານໄຊອຸດົມ, ໄຊຍະມຸງຄຸນ, ວົງພັນສີ ແລະບ້ານອຸດົມມີໄຊ, ເວົ້າລວມແລ້ວ 2 ຕົວ ເມືອງດັ່ງກ່າວໄດ້ຮັບການວາງແຜນຜັງຫຼ້າສຸດມາແຕ່ປີ 1998 ຮອດປະຈຸບັນເຫັນວ່າຕົວເມືອງໄດ້ມີການຂະຫຍາຍຕົວຢ່າງວ່ອງໄວ.

   ສ່ວນທາງດ້ານພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງໄດ້ຜ່ານບົດສະເໜີ 5 ເນື້ອໃນປະກອບມີ: ຈຸດປະສົງຂອງການສ້າງແຜນຈັດສັນທີ່ດິນ, ເຫດຜົນ ແລະຄວາມຈໍາເປັນໃນການສ້າງແຜນຈັດສັນທີ່ດິນ, ສະພາບການກະກຽມການສ້າງແຜນຈັດສັນທີ່ດິນ, ໂຄງປະກອບ ແລະເນື້ອໃນສໍາຄັນ ແລະຜົນປະໂຫຍດທີ່ຄາດວ່າຈະໄດ້ຮັບ, ຈຸດປະສົງຂອງການສ້າງແຜນຈັດສັນທີ່ດິນເບື້ອງຕົ້ນແມ່ນແນໃສ່ເພື່ອຮັບປະກັນການປົກປັກຮັກສາ, ພັດທະນາ ແລະການນໍາໃຊ້ທີ່ດິນຖືກຕ້ອງຕາມເປົ້າໝາຍເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ, ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະຍຸຕິທໍາ.

--------------

ຂ່າວ: ສະຫວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์