ຮອງນາຍົກ ລົງກວດກາຈຸດສ້າງຂົວລາວ-ໄທ ແຫ່ງທີ 5 ຄາດລົງມືຕົ້ນເດືອນໜ້າ

   ໃນວັນທີ 15 ທັນວາ 2020, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນພ້ອມດ້ວຍຄະນະ ແລະການນຳແຂວງບໍລິຄຳໄຊ ລົງຢ້ຽມຢາມພື້ນທີ່ຈຸດທີ່ຈະສ້າງຂົວມິດຕະພາບລາວ-ໄທ ແຫ່ງທີ 5 ຊຶ່ງເຊື່ອມຕໍ່ລະຫວ່າງແຂວງບໍລິຄຳໄຊປະເທດລາວ ແລະແຂວງບຶງການປະເທດໄທ, ທັງນີ້ກໍເພື່ອຕິດຕາມຄວາມຄືບໜ້າ ແລະການຈັດຕັ້ງປະຕິບັດວຽກງານຕ່າງໆ.

  ອີງຕາມການລາຍງານຈາກເຈົ້າໜ້າທີ່ກ່ຽວຂ້ອງໃຫ້ຮູ້ວ່າ: ມາຮອດວັນທີ 30 ພະຈິກ 2020 ໄດ້ສຳເລັດການເຊັນສັນຍາກ່ຽວກັບໜ້າວຽກຕ່າງໆເປັນຕົ້ນແມ່ນສັນຍາການກໍ່ສ້າງຂົວຊຶ່ງຄວາມຍາວທັງໝົດ 535 ແມັດ ມູນຄ່າ 379 ລ້ານກວ່າບາດ ໂດຍຈະໃຊ້ເວລາໃນການກໍ່ສ້າງ 24 ເດືອນໃຫ້ ສຳເລັດ ແລະ ຄາດວ່າຈະເລີ່ມລົງມືກໍ່ ສ້າງໃນວັນທີ1 ມັງກອນ 2021, ວຽກການກໍ່ສ້າງຂົວດັ່ງກ່າວນີ້ແມ່ນຮັບເໝົາໂດຍຝ່າຍໄທ.

 ພ້ອມກັນນັ້ນກໍໄດ້ສຳເລັດການເຊັນສັນຍາການກໍ່ສ້າງເສັ້ນທາງເຂົ້າຂົວທີ່ມີຄວາມຍາວທັງໝົດ 2.860 ແມັດ ແລະອາຄານດ່ານ ມູນຄ່າ 773 ລ້ານກວ່າບາດ ໂດຍຈະໃຊ້ເວລາໃນການກໍ່ສ້າງໃຫ້ສຳເລັດໃນ 30 ເດືອນ, ສຳລັບການກໍ່ສ້າງທາງເຂົ້າຂົວ ແລະ ອາຄານດ່ານແມ່ນຮັບເໝົາໂດຍບໍລິສັດຈາກປະເທດໄທຮ່ວມກັບບໍລິສັດຂອງລາວ ຊຶ່ງປະຈຸບັນນີ້ໄດ້ເລີ່ມລົງມືບຸກເບີກສະຖານທີ່ກໍ່ສ້າງດັ່ງກ່າວແລ້ວໂດຍໄດ້ເລີ່ມມາແຕ່ວັນທີ 9 ທັນວາ 2020 ເປັນຕົ້ນມາ.

   ນອກນັ້ນກໍໄດ້ສຳເລັດການເຊັນສັນຍາການຮັບຮອງເອົາບໍລິສັດທີ່ປຶກສາເຂົ້າຄຸ້ມຄອງການກໍ່ສ້າງໂຄງການດັ່ງກ່າວໂດຍແມ່ນບໍລິສັດຈາກປະເທດໄທ.

-------------

ຂ່າວ: ສິງຄຳ, ຮູບພາບ: ໜັງສືພິມເສດຖະກິດ-ສັງຄົມ

แชร์