ຄາຣາວານທ່ອງທ່ຽວພິຊິດຍອດພູເບ້ຍຄືໄຊຊະນະຢ່າງໃຫຍ່ຫຼວງການນຳຂັ້ນສູງຂຶ້ນຊື່ນຊົມ

  ວັນທີ 16 ທັນວາ 2020 ທ່ານ ພັນຄຳ ວິພາວັນ, ຮອງປະທານປະເທດ ແຫ່ງ ສປປ ລາວ, ຫົວໜ້າຄະນະຊີ້ນຳການພັດທະນາເຂດຈຸດສຸມໃຈກາງພ້ອມດ້ວຍຄະນະໄດ້ເປັນກຽດຂຶ້ນທ່ອງທ່ຽວພິຊິດຍອດພູເບ້ຍພູສູງທີ່ສຸດຂອງລາວ 2.820 ແມັດ ໂດຍມີທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນພ້ອມດ້ວຍຄະນະພັກ-ຄະ ນະນຳແຂວງ ແລະທ່ານ ຄຳໄພ ສົມຊະນະ ປະທານບໍລິສັດກຸ່ມບໍລິສັດຄຳໄພຊະນະຈຳກັດຜູ້ດຽວ ຕະຫຼອດຮອດພາກສ່ວນຈາກບັນດາກະຊວງຢູ່ສູນກາງ ແລະແຂວງເຂົ້າ ຮ່ວມຂະບວນການຢ່າງຫຼວງຫຼາຍ.

  ໂອກາດທີ່ມີຄວາມໝາຍສຳຄັນດັ່ງກ່າວທ່ານ ພັນຄຳ ວິພາວັນ ໄດ້ໃຫ້ກຽດໃຫ້ສຳພາດຕໍ່ນັກຂ່າວໜັງສືພິມເສດຖະກິດ-ສັງຄົມພວກເຮົາວ່າ: ພູເບ້ຍນອກຈາກມີຊື່ສຽງຄວາມສູງທີ່ສຸດຂອງລາວແລ້ວຍັງຄົງເຕັມໄປດ້ວຍຄວາມອຸດົມສົມບູນຮັ່ງມີຂອງຊັບພະຍາກອນທຳມະຊາດໂດຍສະເພາະແມ່ນຜືນປ່າໄມ້ໃຫຍ່ ແລະຊີວະພືດນາໆພັນທີ່ມີຄຸນຄ່າຢ່າງມະຫາສານຈົນບໍ່ສາມາດຕີລາຄາມູນຄ່າໄດ້, ມີຄວາມງົດງາມເໝືອນສວນອຸທິຍານຊຶ່ງບັນຫາສຳຄັນຕ້ອງໄດ້ປົກປັກຮັກສາ ແລະນຳໃຊ້ໃຫ້ເກີດປະໂຫຍດແກ່ປະ ເທດຊາດ ແລະບ້ານເມືອງ.

ສຳລັບໂຄງການພັດທະນາແມ່ນໄດ້ມອບໃຫ້ອຳນາດການປົກຄອງແຂວງໄຊສົມບູນສົມທົບກັບບໍລິສັດກຸ່ມຄຳໄພຊະນະຈຳກັດຜູ້ດຽວເພື່ອພັດທະນາພູເບ້ຍໃຫ້ກາຍເປັນແຫຼ່ງທ່ອງທ່ຽວທຳມະຊາດຮັບປະກັນຄຸນຄ່າທາງທຳມະຊາດພ້ອມກັນນັ້ນກໍນຳໃຊ້ໃຫ້ເກີດຜົນປະໂຫຍດສູງສຸດເພາະການທີ່ພວກເຮົາໄດ້ຂຶ້ນພິຊິດຍອດພູເບ້ຍນີ້ໄດ້ແມ່ນສະແດງ ໃຫ້ເຫັນໄຊຊະນະຢ່າງໃຫຍ່ຫຼວງຂອງວຽກງານປ້ອງກັນຊາດ ແລະປ້ອງກັນຄວາມສະຫງົບຂອງປະເທດເຮົາອັນໄດ້ປະກອບສ່ວນທີ່ສຳຄັນໃນການສະເຫຼີມສະຫຼອງວັນສະຖາປະນາ ສປປ ລາວ 2 ທັນວາຄົບຮອບ 45 ປີ ແລະ ວັນຄ້າຍວັນເກີດປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດຄົບຮອບ 100 ປີ ທັງນີ້ທ່ານກໍ່ໄດ້ກ່າວຍ້ອງຍໍຊົມເຊີຍທຸກພາກສ່ວນໂດຍສະເພາະກຳລັງປ້ອງກັນຊາດ, ປ້ອງກັນຄວາມສະຫງົບພໍ່ແມ່ພີ່ນ້ອງປະຊາຊົນລາວບັນດາເຜົ່າພາຍໃນ ແຂວງໄຊສົມບູນທີ່ໄດ້ມີສ່ວນຮ່ວມໃນການປົກປັກຮັກສາພູເບ້ຍແຫ່ງນີ້ຈົນມາເຖິງທຸກວັນນີ້.

  ທ່ານ ພົນໂທ ສຸວອນ ເລືອງບຸນມີ ຮອງລັດຖະມົນຕີກະຊວງປ້ອງກັນປະເທດກ່າວວ່າ: ວຽກງານປ້ອງກັນຊາດປ້ອງກັນຄວາມສະຫງົບຍາມໃດກໍ່ຕິດພັນກັບການພັດທະ ນາຊຶ່ງພູເບ້ຍແຫ່ງນີ້ແມ່ນຈຸດຍຸດທະສາດທີ່ສຳຄັນບໍ່ວ່າໃນຍາມຕໍ່ສູ້ກູ້ຊາດກໍ່ຄືໄລຍະການປົກປັກຮັກສາ ແລະສ້າງສາພັດທະນາປະເທດຊາດໂດຍການຂຶ້ນພິຊິດຍອດພູເບ້ຍແມ່ນມີຄວາມໝາຍສຳຄັນຊຶ່ງວຽກປ້ອງກັນຊາດປ້ອງກັນຄວາມສະຫງົບໄດ້ເປັນເງື່ອນໄຂ ແລະປັດໄຈສຳຄັນໂດຍສະເພາະແມ່ນການພັດທະນາຂອງບໍລິສັດຄຳ ໄພຊະນະແມ່ນໄດ້ສ້າງຄວາມສະດວກແກ່ການພັດທະນາຈະຮອດຈຸດໃດກຳລັງກໍ່ຈະຮອດຈຸດນັ້ນອັນໄດ້ເປັນສິ່ງສຳຄັນເຮັດໃຫ້ເຮົາສາມາດຂຶ້ນພິຊິດຍອດພູເບ້ຍໃນຄັ້ງນີ້.

  ດ້ານທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານ ແຫ່ງ ສປປ ລາວ ກ່າວວ່າ: ມື້ນີ້ຄະນະນຳທະນາຄານ ແຫ່ງ ສປປ ລາວ ແລະທະນາຄານທຸລະກິດປະກອບມີທະນາຄານພັດທະນາລາວ, ທະນາຄານນະໂຍບາຍ ແລະ ທະນາຄານການຄ້າຕ່າງປະເທດລາວມະຫາຊົນຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ໄດ້ຮ່ວມຄະນະຮັບຜິດຊອບຊີ້ນຳໆການພັດທະນາເຂດຈຸດສຸມໃຈກາງຂຶ້ນພິຊິດຍອດພູເບ້ຍເປັນຄັ້ງທຳອິດໃນຊີວິດຊຶ່ງຜ່ານມາໄດ້ຮໍ່າຮຽນແຕ່ໃນພູມສາດປະຫວັດສາດແຕ່ມື້ນີ້ໄດ້ມາສຳຜັດເຫັນວ່າເປັນສີ່ງທີ່ພິເສດທີ່ສຸດຍ້ອນມີຄວາມສວຍງາມຫຼາຍມີຄວາມອຸດົມສົມບູນ ແລະບໍ່ເຄີຍເຫັນຢູ່ທີ່ໃດມາກ່ອນຈາກທີ່ເຄີຍໄດ້ໄປທ່ຽວຫຼາຍໆປະເທດທັງນີ້ກໍ່ຂໍຂອບໃຈທາງບໍລິສັດກຸ່ມຄຳໄພຊະນະທີ່ໄດ້ສົມທົບກັບກຳລັງປ້ອງກັນຊາດປ້ອງກັນຄວາມສະຫງົບປະກອບສ່ວນໃນການພັດທະນາເຮັດໃຫ້ພວກເຮົາໄດ້ມາສຳຜັດຕົວຈິງ.

   ຜ່ານການຢ້ຽມຊົມນີ້ທ່ານ ນາງ ວັດທະນາ ດາລາລອຍ ກ່າວຢໍ້າວ່າ: ພາກສ່ວນທະນາຄານມີຄວາມພ້ອມແລ້ວທີ່ຈະປະກອບສ່ວນຊ່ວຍພັກຊ່ວຍລັດ ແລະບໍລິສັດໃນການພັດທະນາພູເບ້ຍແຫ່ງນີ້ໃຫ້ກາຍເປັນສະຖານທີ່ທ່ອງທ່ຽວເປັນແຫຼ່ງສ້າງລາຍຮັບແກ່ແຂວງກໍ່ຄືປະຊາຊົນໃນທ້ອງຖິ່ນເພື່ອເປັນສີ່ງເອກອ້າງແກ່ຊາວໂລກໂດຍຫວັງວ່າພວກເຮົາຈະໄດ້ມາທ່ຽວຊົມອີກຄັ້ງໃນຕໍ່ໆໄປ.

  ຂະນະທີ່ທ່ານ ຄຳໄພ ສົມຊະນະ ກ່າວວ່າ, ຄະນະນຳຂັ້ນສູງທີ່ຂຶ້ນທ່ອງທ່ຽວພິຊິດຍອດພູເບ້ຍໃນຄັ້ງນີ້ແມ່ນເປັນຄັ້ງປະຫວັດສາດ ແລະເຫັນວ່າແຕ່ລະທ່ານທີ່ມາຊື່ນຊົມນີ້ແມ່ນມີຄວາມສຸກຫຼາຍກັບຄວາມສວຍງາມຂອງພູເບ້ຍໂດຍສະເພາະຜືນປ່າໄມ້ໃຫຍ່ດົງດີບທີ່ປຽບສະເໝືອນຫຼັງຄາຂອງປະເທດລາວ, ດົງປ່າໄມ້ຂົນເທບນິຍາຍແຫ່ງຄວາມເປັນຈິງ, ຫີນສີລານໍແຮດລ້ານປີ, ສວນດອກກຸຫຼາບລ້ານປີ ແລະຊີວະນາໆພັນຕະຫຼອດຮອດສັດສາວາສີ່ງອື່ນໆ ໂດຍຫຼັງຈາກນີ້ທາງບໍລິສັດກໍຈະໄດ້ເລັ່ງໃນການປັບປຸງ ແລະກໍ່ສ້າງບັນດາກິດຈະກຳ ແລະເສັ້ນທາງເບຕົງຂຶ້ນຫາແຫຼ່ງທ່ອງທ່ຽວທີ່ມີຄວາມຍາວທັງໝົດ 20 ກວ່າກີໂລແມັດ ໃຫ້ສຳເລັດພາຍໃນປີ 2021 ກ່ອນຈະໄດ້ເປີດໃຫ້ບັນດານັກທ່ອງທ່ຽວທັງພາຍໃນ ແລະຕ່າງປະເທດໄດ້ຊື່ນຊົມຢ່າງເປັນທາງການພາຍໃນປີ 2022 ຢ່າງແນ່ນອນ.

แชร์