ງານມະໂຫລານສຽງແຄນເຊື້ອຊາດລາວ ມໍລະດົກໂລກຈະມີຫຼາຍກິດຈະກໍາສໍາຄັນ

  ສະມາຄົມສິລະປະແຄນລາວຈະຈັດງານມະໂຫລານສຽງແຄນເຊື້ອຊາດລາວມໍລະດົກໂລກຂຶ້ນໃນວັນທີ 18 ທັນວາ 2020 ທີ່ຫໍວັດທະນະທໍາແຫ່ງຊາດເພື່ອສະເຫຼີມສະຫຼອງວັນຊາດຄົບຮອບ 45 ປີ, ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ ແລະຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກໃຫ້ມີບັນຍາກາດຟົດຟື້ນ.

   ທ່ານ ຄໍາພັນ ເໝືອນສິດທິດາປະທານສະມາຄົມສິລະປະແຄນລາວໄດ້ຖະແຫຼງຂ່າວກ່ຽວກັບການກະກຽມຈັດງານດັ່ງກ່າວໃນວັນທີ 11 ທັນວາຜ່ານມາວ່າ: ງານມະໂຫລານສຽງແຄນເຊື້ອຊາດລາວມໍລະດົກໂລກຈະມີຫຼາຍກິດຈະກໍາສໍາຄັນຄື: ການແຂ່ງຂັນສຽງແຄນເຊື້ອຊາດລາວມໍລະດົກໂລກກັບລຸ້ນສືບທອດຍິງ-ຊາຍອາຍຸລະ ຫວ່າງ 7-14 ປີ, ແຂ່ງຂັນສີມືຊ່າງເຮັດແຄນດີເດັ່ນທົ່ວປະເທດປະຈໍາ ປີ 2020 ແລະການສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກທີ່ຈະໄຂຂຶ້ນໃນຕົ້ນປີ 2021 ນີ້, ເພື່ອສ້າງຈິດສໍານຶກໃຫ້ປວງຊົນລາວທັງຊາດໄດ້ຈາລຶກ ແລະຮູ້ບຸນຄຸນຂອງພັກປະຊາຊົນປະຕິວັດລາວຜູ້ນໍາພາທຸກໄຊຊະນະຂອງການປະຕິວັດຢູ່ປະເທດເຮົາ.

  ແຄນ ແມ່ນມີປະຫວັດຄວາມເປັນມາຫຼາຍກວ່າ 3.000 ປີ ດ້ວຍພູມປັນຍາຂອງບັນພະບູລຸດລາວທີ່ໄດ້ປະດິດສ້າງສືບທອດກັນມາຕິດພັນກັບວິຖີຊີວິດ ແລະວັດທະນະທໍາອັນດີງາມຂອງຊາດລາວນັ້ນໃນສະໄໝກ່ອນຖືວ່າສຽງແຄນ, ສຽງຂັບ-ສຽງລໍາ ແລະຊ່າງຜະລິດແຄນແມ່ນມີຄວາມຮຸ່ງເຮືອງສີວິໄລຫຼາຍ, ພໍຕົກມາໄລຍະທີ່ປະເທດລາວເຮົາໄດ້ຕົກເປັນເມືອງຂຶ້ນກັບຕ່າງຊາດໃນຫຼາຍຮ້ອຍປີ, ສຽງແຄນ, ສຽງຂັບ-ສຽງລໍາ, ຊ່າງຜະລິດແຄນໃນທົ່ວສັງຄົມລາວໄດ້ງຽບເຫງົາ, ຖືກຫ້າມເປົ່າແຄນ, ຫ້າມຂັບ-ລໍາ, ແຕ່ພາຍຫຼັງທີ່ມີການນໍາພາຂອງພັກສຽງແຄນ, ສຽງຂັບລໍາ, ຊ່າງຜະລິດແຄນໄດ້ຮັບການຟື້ນຟູ.

  ແຄນ ແລະສຽງແຄນໄດ້ຕິດພັນກັບຂະບວນການປະຕິວັດຊາດປະຊາທິປະໄຕທີ່ຍືດເຍື້ອຍາວນານ ແລະ ສິ່ງທີ່ພາກພູມໃຈທີ່ສຸດແມ່ນສຽງແຄນເຊື້ອຊາດລາວໄດ້ຮັບການຈົດທະບຽນຈາກອົງການອຸຍແນສໂກເປັນມໍລະດົກວັດທະນະທໍານາມມະທໍາຂອງຄົນເຊື້ອຊາດລາວ ແລະ ເປັນມໍລະດົກວັດທະນະທໍານາມມະທໍາຂອງມວນມະນຸດໂລກໃນວັນທີ 7 ທັນວາ 2017 ຕາມການສະເໜີຂອງ ສປປ ລາວ, ອັນໄດ້ສ້າງກຽດຊື່ສຽງທີ່ໃຫຍ່ຫຼວງໃຫ້ແກ່ ສປປ ລາວ ເຮົາໃນພາກພື້ນ ແລະສາກົນນັບມື້ສູງເດັ່ນຂຶ້ນ.

แชร์