ຝຶກອົບຮົມການປ້ອນຂໍ້ມູນໃນສະຖານການສຶກສາກ່ອນໄວຮຽນ

  ວັນທີ 14 ທັນວາ 2020 ທີ່ຫ້ອງປະຊຸມພະແນກສຶກສາທິການ ແລະກີລາແຂວງໄຊຍະບູລີ ໄດ້ຈັດກອງປະຊຸມຝຶກອົບຮົມການປ້ອນຂໍ້ມູນການສັງລວມ ແລະການນຳໃຊ້ຖານຂໍ້ມູນວຽກງານນໍ້າ ແລະສຸຂະອະນາໄມໃນສະຖານການສຶກສາກ່ອນໄວຮຽນໂດຍນຳໃຊ້ຮູບແບບ 3 ດາວ ໃຫ້ວິຊາການຂັ້ນເມືອງ 11 ເມືອງທົ່ວແຂວງໄຊຍະບູລີເປັນກຽດເຂົ້າຮ່ວມຂອງທ່ານ ອ່ອນຕາ ພົມມະຈິດ ຫົວໜ້າພະແນກສຶກສາທິການ ແລະກີລາແຂວງໄຊຍະບູລີທ່ານ ບົວຈັນ ຈັນສົມຜູ້ບໍລິຫານວຽກງານການສຶກສາກ່ອນໄວຮຽນ, ອົງການຮ່ວມມືລາວ-ເຢຍລະມັນເພື່ອການພັດທະນາ,ທ່ານ ບຸນເພັງ ວຽງສົມບັດ ຫົວໜ້າພະແນກກວດກາ, ຕິດຕາມປະເມີນຜົນກະຊວງສຶກສາທິການ ແລະກີລາ, ມີບັນດາຫົວໜ້າ-ຮອງຫົວໜ້າໜ່ວຍງານການສຶກສາກ່ອນໄວຮຽນ, ຫົວໜ້າໜ່ວຍງານສະຖິຕິພ້ອມດ້ວຍວິຊາການຈາກ 11 ເມືອງເຂົ້າຮ່ວມ.

 ໃນກອງປະຊຸມທ່ານ ອ່ອນຕາ ພົມມະຈິດ ຫົວໜ້າພະແນກສຶກສາທິການ ແລະກີລາແຂວງໄຊຍະບູລີກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມຄັ້ງນີ້ຈັດຂຶ້ນເພື່ອຝຶກອົບຮົມການປ້ອນຂໍ້ມູນ, ສັງລວມຂໍ້ມູນ ແລະການໃຊ້ຖານຂໍ້ມູນວຽກງານນໍ້າ ແລະສຸຂະອະນາໄມໃນສະຖານການສຶກສາກ່ອນໄວຮຽນໂດຍນຳໃຊ້ຮູບແບບ 3 ດາວ ໃຫ້ວິຊາການຂັ້ນເມືອງຈຸດປະສົງກອງປະຊຸມຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບຄວາມເປັນມາຂອງວຽກງານນໍ້າ ແລະ ສຸຂະອະນາໄມໃນສະຖານການສຶກສາກ່ອນໄວຮຽນ, ການກະກຽມຄວາມພ້ອມກ່ອນການປ້ອນຂໍ້ມູນແນະນຳການປ້ອນຂໍ້ມູນ ແລະ ຝຶກການປ້ອນຂໍ້ມູນວຽກງານນໍ້າ ແລະ ສຸຂະອະນາໄມ, ແຕ່ລະເມືອງປ້ອນຂໍ້ມູນໂຮງຮຽນພາຍໃນເມືອງຂອງຕົນເຂົ້າຖານຂໍ້ມູນ, ການກວດຜົນປະເມີນ ໃນຖານຂໍ້ມູນ, ຝຶກການສົ່ງຂໍ້ມູນໃຫ້ ກັບແຂວງ, ແລະສົ່ງຖານຂໍ້ມູນຕົວຈິງ, ການຂຽນລາຍງານໂດຍນຳໃຊ້ຜົນການປະເມີນຈາກຖານຂໍ້ມູນ, ສ້າງແຜນຜັນຂະຫຍາຍການປະເມີນວຽກງານນໍ້າ ແລະ ສຸຂະອະນາໄມໃນສະຖານການສຶກສາກ່ອນໄວຮຽນໂດຍນຳໃຊ້ຮູບແບບ 3 ດາວ, ສ້າງແຜນຕິດຕາມຄວາມຄືບໜ້າຂອງຂັ້ນເມືອງ,ແຂວງ ແລະກະຊວງທ່ານຍັງໄດ້ເນັ້ນໜັກໃຫ້ສຳມະນາກອນທຸກຄົນຈົ່ງພ້ອມກັນປະກອບຄຳຄິດຄຳເຫັນຕໍ່ບັນຫາເຊິ່ງກັນ ແລະກັນຊອກຫາວິທີການແກ້ໄຂຢ່າງຖືກຕ້ອງທັງໝົດເຫຼົ່ານັ້ນແນໃສ່ພັດທະນາວຽກງານການສຶກສາກໍຄືວຽກງານປັງປຸງຄຸນນະພາບການສຶກສາຂອງແຂວງໄຊຍະບູລີໃຫ້ສູງຂຶ້ນເລື້ອຍໆ.

------------

ຂຽນໂດຍ: ນາລີ ແພງວິໄລ

ຮູບພາບ: ໜັງສືພິມເສດຖະກິດ-ສັງຄົມ

แชร์