ກະສິກຳ ເມືອງຮ້ຽມຊຸກຍູ້ ປະຊາຊົນປູກພືດລະດູແລງ

ຂຽນໂດຍ: ຜ.ຜົນບຸນ

   ທ່ານນາງ ຈັນສີ ສຸກກະເສີມ ຮອງຫົວໜ້າຫ້ອງການກະສິກຳ-ປ່າໄມ້ເມືອງຮ້ຽມ ແຂວງຫົວພັນໄດ້ໃຫ້ຮູ້ວ່າ: ພາຍໃນເມືອງຂອງພວກເຮົາມີເນື້ອທີ່ນາ 1.100 ເຮັກ ຕາ, ສະມັດຖະພາບຜົນຜະລິດໄດ້ 3,5 ໂຕນຕໍ່ເຮັກຕາ, ສາເຫດຂອງຜົນຜະລິດຫຼຸດຄາດໝາຍຈາກປີທີ່ຜ່ານມາກໍ່ຍ້ອນວ່າເກີດຜົນກະທົບຈາກໄພທຳມະຊາດຫຼາຍຢ່າງເຮັດໃຫ້ຜົນລະປູກເຂົ້ານາຕາຍແຫ້ງຈຶ່ງເຮັດໃຫ້ຊາວນາ,ຊາວສວນສ່ວນຫຼວງຫຼາຍເກັບກູ້ຜົນຜະລິດບໍ່ໄດ້ຕາມເປົ້າໝາຍເມື່ອເປັນແນວນັ້ນທາງພາກສ່ວນທີ່ກ່ຽວຂ້ອງໂດຍສະເພາະຫ້ອງການກະສິກຳ-ປ່າໄມ້ ເມືອງຈຶ່ງໄດ້ມີການແບ່ງພະນັກງານຂອງຕົນລົງສົມທົບກັບຊາວກະສິກອນທັງ 35 ບ້ານພາຍໃນເມືອງເຂດທີ່ມີເງຶ່ອນໄຂເໝາະສົມແກ້ການຜະລິດ, ເພື່ອລົງຊຸກຍູ້ແນະນຳດ້ານເຕັກນິກວິທີການກ່ຽວກັບການປູກຝັງ-ລ້ຽງສັດ, ອ້າຍນ້ອງພະນັກງານຂອງເມືອງໄດ້ລົງສຳຫຼວດເບິ່ງພື້ນທີ່ຕົວຈິງຈາກນັ້ນ, ຈຶ່ງໄດ້ມີການວາງແຜນການໃຫ້ພໍ່ແມ່ປະຊາຊົນແຕ່ລະຄອບຄົວກະກຽມທຳການຜະລິດລະດູແລ້ງຕາມທ່າແຮງຂອງແຕ່ລະຄົນເປັນຕົ້ນແມ່ນການປູກເຂົ້ານາແຊງດ້ວຍກ້າກີບດຽວ, ປູກສາລີຫວານ, ປູກໝາກຖົ່ວ, ຜັກບົວ, ຜັກທຽມ, ໝາກແຕງຊັງ, ໝາກແຕງໂມ ແລະພຶດຜັກລົ້ມລຸກຕ່າງໆໃຫ້ໄດ້ 50 ກວ່າເຮັກຕາ ແລະໃຫ້ຜົນຜະລິດມີຄຸນນະພາບເພີ່ມສູງຂຶ້ນກວ່າເກົ່າ.

  ທ່ານຮອງຫົວໜ້າຫ້ອງການກະສິກຳ ແລະປ່າໄມ້ເມືອງຮ້ຽມຍັງໄດ້ເວົ້າຕື່ມອີກວ່າ: ນອກຈາກເຮັດນາແຊງ, ປູກພືດລະດູແລງຕາມທ່າແຮງແລ້ວພວກເຮົາຍັງໄດ້ປຸກລະ ດົມໃຫ້ພໍ່ແມ່ປະຊາຊົນເອົາໃຈໃສ່ໃນການປູກຝັງ-ລ້ຽງສັດໃຫ້ຫຼາຍເພື່ອຂາຍເປັນສິນຄ້າຈົນສາມາດສ້າງລາຍຮັບໃຫ້ແກ່ຄອບຄົວຫຼຸດພົ້ນຈາກຄວາມທຸກຍາກຕາມແນວ ທາງທີ່ພັກ-ລັດໄດ້ວາງໄວ້.

แชร์