ກຸ່ມປູກຜັກກະລໍ່າປີ ຍົກລະດັບມາດຖານກະສິກຳສະອາດ

  ໃນທ້າຍອາທິດຜ່ານມາທີ່ຫ້ອງການນາຍບ້ານໆຫ້ວຍແສງຊາວກະສິກອນກຸ່ມປູກຜັກກະລໍ່າປີຈຳນວນ 15 ຄອບຄົວບ້ານຫ້ວຍແສງ ເມືອງເລົ່າງາມ ແຂວງສາລະວັນ ໄດ້ຮັບການຝຶກອົບຮົມກ່ຽວກັບມາດຕະຖານກະສິກຳສະອາດໂດຍການເຂົ້າຮ່ວມຂອງທ່ານ ນາງ ຄຳພຽນ ພັນທະບູລີ ຮອງຫົວໜ້າພະແນກກະສິກຳ ແລະປ່າໄມ້ແຂວງສາລະວັນ, ທ່ານ ຫຼິ່ງຫຼ້ອງ ສິດທິໄຊ ຮອງຫົວໜ້າພະແນກແຜນການ ແລະການຮ່ວມມືກົມປູກຝັງກະຊວງກະສິກຳ-ປ່າໄມ້ ທັງເປັນຜູ້ປະສານງານໂຄງການ,ມີວິທະຍາກອນ, ສຳມະນາກອນກຸ່ມປູກຜັກກະລໍ່າປີບ້ານຫ້ວຍແສງເຂົ້າຮ່ວມ.

 ທ່ານ ຫຼິ່ງຫຼ້ອງ ສິດທິໄຊ ໄດ້ໃຫ້ສຳພາດວ່າ:  ໂຄງການດັ່ງກ່າວນີ້ມີຈຸດປະສົງພັດທະນາຕ່ອງໂສ້ການຜະລິດ ແລະຂະຫຍາຍວຽກງານການຕະຫຼາດ,ຊຶ່ງຈັດຕັ້ງປະຕິບັດມີຢູ່ 5 ແຂວງຄື: ນະຄອນຫຼວງວຽງຈັນ, ແຂວງວຽງຈັນ, ຈໍາປາສັກ, ເຊກອງແລະແຂວງສາລະວັນ, ສຳລັບແຂວງສາລະວັນແມ່ນໄດ້ກຳນົດເອົາບ້ານຫ້ວຍແສງ ເມືອງເລົ່າງາມ ແລະມີຄອບຄົວກຸ່ມປູກຜັກກະລໍ່າປີເຂົ້າຮ່ວມຝຶກອົບຮົມທັງໝົດ 15 ຄອບຄົວ, ພ້ອມນັ້ນຍັງໄດ້ຝຶກໃຫ້ຜູ້ປະສານງານຂັ້ນບ້ານຈຳນວນ 2 ທ່ານ ເພື່ອເປັນຕົວ ແທນໃຫ້ກັບໂຄງການໃນການຕິດຕາມກວດກາກຸ່ມປູກຜັກຕາມມາດຕະຖານ ແລະມີຈັນຍາບັນ, ການຝຶກອົບຮົມໃນຄັ້ງນີ້ທາງໂຄງການແມ່ນໄດ້ນໍາເອົາຄວາມຮູ້ເຕັກນິກ ໃໝ່ໆ ແລະວິທີການໃນການບົວລະບັດຮັກສາພືດຜັກຂອງຊາວກະສິກອນໂດຍການນຳໃຊ້ເຕັກນິກມາດຕະຖານກະສິກຳທີ່ດີ, ເນັ້ນໃສ່ການຜະລິດທີ່ສະອາດ, ພາຍຫຼັງທີ່ປູກແລ້ວທາງບໍລິສັດຈະເກັບຊື້ ແລະມີແຜນທີ່ຈະຝຶກອົບຮົມວິທີເຮັດຝຸ່ນຊີວະພາບໃຫ້ກັບກຸ່ມປູກຜັກຕື່ມອີກ.

  ທ່ານຍັງໄດ້ກ່າວໃຫ້ຮູ້ຕື່ມອີກວ່າ: ສຳລັບພືດທີ່ໂຄງການໃຫ້ການສະໜັບສະໜູນມີຢູ່ 4 ຊະນິດ ຄື: ກາເຟ, ຖົ່ວດຳອິນຄາ, ມັນຕົ້ນ ແລະຜັກກະລໍ່າປີ, ໂດຍໄດ້ຮັບການຊ່ວຍເຫຼືອຈາກໂຄງການສ້າງຄວາມເຊື່ອມໂຍງເພື່ອຂະຫຍາຍເຄືອຂ່າຍກະສິກຳ ຫຼື ໂຄງການຄຣີນທີ່ໄດ້ຮັບການສະໜັບສະໜູນໂດຍກະຊວງກະສິກຳປະເທດອາເມລິກາ ໂດຍມອບໃຫ້ອົງການວິນຣ໋ອກສາກົນຮ່ວມກັບລັດຖະບານລາວກໍຄືກົມປູກຝັງກະຊວງກະສິກຳແລະປ່າໄມ້ເປັນຜູ້ຈັດຕັ້ງປະຕິບັດ.

 ----------------

ຂ່າວ: ສິດຕາ ເພັດວົງສາ

ຮູບພາບ: ໜັງສືພິມເສດຖະກິດ-ສັງຄົມ

แชร์