ໃຊ້ງົບ 9,2 ຕື້ກີບ ສ້າງອາຄານຫ້ອງການພະແນກ ຮສສ ໄຊສົມບູນ

  ລັດນຳໃຊ້ງົບປະມານ 9,2 ຕື້ກີບ ສ້າງອາຄານຫ້ອງການພະແນກແຮງງານ ແລະສະຫວັດດີການສັງຄົມ (ຮສສ) ແຂວງໄຊສົມບູນ ພາຍຫຼັງທີ່ເລີ່ມລົງມືມາຮອດປະຈຸ ບັນໄດ້ສຳເລັດເປັນທີ່ຮຽບຮ້ອຍແລ້ວແລະມີພິທີມອບ-ຮັບພ້ອມເປີດ ເປັນທາງການຂຶ້ນໃນວັນທີ 14 ທັນວາຜ່ານມາ.

 ການມອບ-ຮັບຄັ້ງນີ້ຈັດຂຶ້ນທີ່ອາຄານດັ່ງກາວເຂົ້າຮ່ວມຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ມີທ່ານ ພອຍຄໍາ ຮຸ່ງບຸນຍວງ ແລະທ່ານ ແດງ ປະທຸມທອງ ຮອງເຈົ້າແຂວງໄຊສົມບູນ, ມີພະແນກການອ້ອມຂ້າງແຂວງ, ພະນັກງານພາຍໃນພະແນກ ແລະຝ່າຍບໍລິສັດພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ວຽງສະຫວັດ ດວງມະນີ ປະທານບໍລິສັດ ໂຊກຈະເລີນ ກໍ່ສ້າງ ຈຳກັດຜູ້ດຽວ ຜູ້ຮັບເໝົາກໍ່ສ້າງລາຍງານ ແລະກ່າວມອບວ່າ: ໂຄງການກໍ່ສ້າງອາຄານຫ້ອງການພະແນກ ຮສສ ແຂວງໄຊສົມບູນ ເປັນອາຄານ 2 ຊັ້ນ, ໂຄງສ້າງອາຄານເບຕົງເສີມເຫຼັກ, ການມຸງດ້ວຍຊີແພັກພາຍໃນອາຄານປະກອບດ້ວຍສິ່ງອຳນວຍຄວາມສະດວກຫຼາຍຢ່າງເປັນຕົ້ນລະບົບໄຟຟ້າ, ນໍ້າປະປາພ້ອມດ້ວຍເຄື່ອງຕົກແຕ່ງພາຍໃນອາຄານຊຶ່ງເປັນງົບປະມານການລົງທຶນຂອງລັດ 100% ລວມມູນຄ່າການກໍ່ສ້າງທັງໝົດ 9,2 ຕື້ກີບ ຊຶ່ງໂຄງການດັ່ງກ່າວແມ່ນຖືກຕ້ອງແບບແຜນຜັງການກໍ່ສ້າງຖືກຕ້ອງຕາມເງື່ອນໄຂມາດຕະຖານເຕັກນິກທີ່ກຳນົດໄວ້ທຸກປະການ.

   ຈາກນັ້ນ ທ່ານ ຄຳແພງ ໄຊສົມແພງ ກໍ່ໄດ້ຂຶ້ນກ່າວຮັບ ແລະມອບຕໍ່ໃຫ້ການນຳແຂວງໄຊສົມບູນຊຶ່ງຕາງໜ້າກ່າວຮັບໂດຍທ່ານ ແດງ ປະທຸມທອງ ພ້ອມນີ້ທ່ານຮອງເຈົ້າແຂວງກໍໄດ້ສະແດງຄວາມຂອບໃຈມາຍັງທຸກພາກສ່ວນທີ່ໄດ້ພ້ອມກັນປະກອບສ່ວນຈົນສ້າງອາຄານຫຼັງນີ້ສຳເລັດຊຶ່ງມັນເປັນການປະກອບສ່ວນທີ່ສຳຄັນຕໍ່ການພັດທະ ນາແຂວງໄຊສົມບູນພ້ອມທັງໃຫ້ຄຳໝັ້ນສັນຍາວ່າຈະຄຸ້ມຄອງປົກປັກຮັກສາ ແລະນຳໃຊ້ອາຄານດັ່ງກາວໃຫ້ເກີດປະໂຫຍດສູງສຸດ.

   ຈາກນັ້ນ ທ່ານ ລັດຖະມົນຕີ ພ້ອມດ້ວຍການນຳແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມໄດ້ເຂົ້າຮ່ວມຕັດແຖມຜ້າ ແລະເຊັນມອບ-ຮັບຢ່າງເປັນທາງການພ້ອມທັງຍ່າງຊົມອາຄານຫຼັງໃໝ່.

แชร์