ຫຼວງພະບາງ ຈັດງານສົ່ງເສີມອາຊີວະສືກສາ

  ແຂວງຫຼວງພະບາງຈັດງານສົ່ງເສີມອາຊີວະສຶກສາຮ່ວມກັບສະຖານປະກອບການ ຄັ້ງທີ II ປີ 2020 ໄດ້ຈັດຂຶ້ນໃນວັນທີ 14 ທັນວາ 2020 ທີ່ເດີ່ນທາດຫຼວງນະ ຄອນ-ຫຼວງພະບາງ ໂດຍການເຂົ້າຮ່ວມຂອງທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ,ມີຫົວໜ້າພະແນກການຂອງແຂວງ,ອຳນວຍການວິທະຍາໄລເຕັກນິກວິຊາຊີບ, ຕາງໜ້າສະພາການຄ້າ ແລະອຸດສາຫະກຳແຫ່ງຊາດລາວ, ສະພາການຄ້າ ແລະອຸດສາຫະກຳແຂວງ,ຜູ້ປະກອບການ, ຫົວໜ່ວຍທຸລະກິດພ້ອມດ້ວຍນັກສຶກສາເຂົ້າຮ່ວມ.

   ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະອຸດສາຫະກຳແຂວງຫຼວງພະບາງກ່າວວ່າ: ຈຸດປະສົງໃນການຈັດງານຄັ້ງນີ້ເພື່ອຊົມເຊີຍຜົນສຳເລັດກອງປະຊຸມໃຫຍ່ອົງຄະນະພັກແຂວງຫຼວງພະບາງຄັ້ງທີ 8 ແລະເປັນການສ້າງຂະບວນການຕ້ອນຮັບວັນຊາດ 2 ທັນວາ ຄົບຮອບ 45 ປີ ແລະວັນເກີດຂອງປະທານ ໄກສອນ ພົມ ວິຫານ ຄົບຮອບ 100 ປີ, ພ້ອມນີ້ຍັງເປັນການເປີດໂອກາດສ້າງຄວາມເຂົ້າໃຈ ແລະການມີສ່ວນຮ່ວມໃນວຽກງານອາຊີວະສຶກສາ, ການພັດທະນາແຮງງານລາວ, ເພື່ອກະຕຸກຊຸກຍູ້ໃຫ້ຜູ້ປະກອບການໄດ້ເຂົ້າຮ່ວມຈັດຕັ້ງປະຕິບັດວຽກງານອຸດສາຫະກຳ ແລະການຄ້າຢ່າງຈິງຈັງ ແລະສ້າງຄວາມເຊື່ອໝັ້ນດ້ານການຮຽນ-ການສອນອາຊີວະສຶກສາ, ເພື່ອເປັນການເປີດໂອກາດໃຫ້ທຸກພາກສ່ວນທີ່ເຂົ້າຮ່ວມໄດ້ມີການແລກປ່ຽນຂໍ້ມູນ, ການຮ່ວມ, ເຊື່ອມໂຍງ ແລະສ້າງສາຍພົວພັນແຮງງານທີ່ດີຮ່ວມກັນ,ທັງເປັນການເປີດໂອກາດໃນການພົບປະແລກປ່ຽນຂໍ້ມູນຂ່າວສານກ່ຽວກັບຕຳແໜ່ງງານ, ການຮັບພະນັກງານ, ການຊອກວຽກ ແລະ ການຕິດຕໍ່ໂດຍກົງກັບສະຖາບັນປະກອບການ ແລະພິເສດໃນງານນີ້ຈະໄດ້ຮ່ວມກັນຖາມ-ຕອບກັບຜູ້ປະກອບ ແລະນັກສຶກສາທີ່ປະສົບຜົນສຳເລັດຕື່ມອີກ.

 ເພື່ອເຮັດໃຫ້ງານຄັ້ງນີ້ມີຄວາມໝາຍສຳຄັນ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງໄດ້ເປັນກຽດຂຶ້ນມີຄຳເຫັນໂດຍເນັ້ນໃຫ້ຄະນະຮັບຜິດຊອບຕະ ຫຼອດຮອດຜູ້ເຂົ້າຮ່ວມຈົ່ງພ້ອມກັນເອົາໃຈໃສ່ດ້ວຍຄວາມຮັບຜິດສູງເພື່ອເຮັດໃຫ້ງານຄັ້ງນີ້ດຳເນີນໄປດ້ວຍຜົນສຳເລັດຕາມລະດັບຄາດໝາຍທີ່ວາງໄວ້ພ້ອມທັງກ່າວເປີດງານ ແລະຮ່ວມຕັດແຖບຜ້າເປີດງານຢ່າງເປັນທາງການ.

  ສໍາລັບງານຄັ້ງນີ້ແມ່ນໄດ້ເລີ່ມຕົ້ນແຕ່ວັນທີ 7-16 ທັນວາ 2020 ຈຶ່ງຈະອັດລົງ, ໄດ້ມີຮ້ານເຂົ້າຮ່ວມວາງສະແດງຜະລິດຕະພັນ, ການບໍລິການຈາກສະຖານປະກອບການ, ວິທະຍາໄລ ແລະຫົວໜ່ວຍທຸລະກິດເຂົ້າຮ່ວມທັງໝົດ 36 ຮ້ານ ໃນນີ້ວິທະຍາໄລມີ 20 ຮ້ານ ແລະສະຖານປະກອບການ 16 ຮ້ານ.

---------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์