ຄະນະຮັບຜິດຊອບຊີ້ນຳພັດທະນາເຂດຈຸດສຸມໃຈກາງໄຊສົມບູນຕີລາວຽກ 1 ປີ

   ວັນທີ 15 ທັນວາ 2020 ຄະນະຮັບຜິດຊອບຊີ້ນຳການພັດທະນາເຂດຈຸດສຸມໃຈກາງແຂວງໄຊສົມບູນໄດ້ຈັດກອງປະຊຸມສະຫຼຸບຕີລາຄາການຊີ້ນຳຂອງຄະນະປະຈຳປີ 2020 ຂຶ້ນທີ່ແຂວງດັ່ງກ່າວໂດຍພາຍໃຕ້ການເປັນປະທານຂອງທ່ານ ພັນຄຳ ວິພາວັນ ຮອງປະທານປະເທດທັງເປັນຫົວໜ້າຄະນະຊີ້ນຳພັດທະເຂດຈຸດສຸມໃຈກາງພ້ອມດ້ວຍບັນດາຄະນະຮັບຜິດຊອບ, ການນຳແຂວງ ແລະແຂກຖືກເຊີນທີ່ກ່ຽວຂ້ອງຈາກສູນກາງເຂົ້າຮ່ວມຢ່າງພ້ອມພຽງ.

   ທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນໄດ້ລາຍງານຕໍ່ພິທີວ່າ: ໃນໄລຍະ 1 ປີທີ່ຜ່ານມາຄະນະຮັບຜິດຊອບຊີ້ນຳການພັດທະນາເຂດຈຸດສຸມໃຈກາງ ແຂວງໄຊສົມບູນ ແລະຄະນະພັກ, ອົງການປົກຄອງແຂວງໄດ້ເອົາໃຈໃສ່ໃນການຊີ້ນໍາ-ນໍາພາຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ ປີ 2020 ເປັນຕົ້ນແມ່ນຕາມດຳລັດ 414/ລບ ໄດ້ເຮັດໃຫ້ເສດຖະກິດຂອງແຂວງຍັງສືບຕໍ່ຂະຫຍາຍຕົວຢ່າງຕໍ່ເນື່ອງ, ຄາດຄະເນໝົດປີເສດຖະກິດຂອງແຂວງຂະຫຍາຍຕົວຢູ່ໃນລະ ດັບ5%, ລວມຍອດຜະລິດຕະພັນພາຍໃນບັນລຸ 1.097 ຕື້ກີບ, ທຽບໃສ່ແຜນປີ ເທົ່າກັບ 97,8% ສະເລ່ຍລາຍຮັບໃສ່ຫົວຄົນໄດ້ 11,3 ລ້ານ ກີບ.  

ການເກັບລາຍຮັບແຜນເບື້ອງຕົ້ນ 83,80 ຕື້ກີບ, ມາຮອດ 10 ເດືອນ ທ້າຍປີກະຊວງການເງິນມີການດັດແກ້ຕາມດໍາລັດ 414/ລບ ມາເປັນ 320,58 ຕື້ກີບ ຜ່ານການຈັດຕັ້ງປະຕິບັດ 11 ເດືອນ ປະຕິບັດໄດ້ 331,71 ຕື້ກີບ, ເທົ່າກັບ 103,47% ຂອງແຜນດັດແກ້, ຄາດຄະເນໝົດປີຈະບັນລຸ 356,04 ຕື້ກີບ, ເທົ່າກັບ 111,06% ຂອງແຜນການດັດແກ້;ແຜນລາຍຈ່າຍເບື້ອງຕົ້ນ365,45 ຕື້ກີບ, ປະຕິບັດ 11 ເດືອນໄດ້ 267,43 ຕື້ກີບ, ເທົ່າກັບ 83,07% ຂອງແຜນດັດແກ້, ຕາມແຜນລາຍຮັບ 414/ລບ ແຂວງໄຊສົມບູນຄາດຄະເນຈະມີລາຍຮັບເກີນດຸນ 36,93 ຕື້ກີບ.  

  ດ້ານການລົງທຶນຂອງລັດໂຄງການທີ່ສໍາເລັດໜ້າວຽກ 100% ແລະຊໍາລະໝົດຕາມມູນຄ່າລວມຂອງໂຄງການ 18 ໂຄງການ ມູນຄ່າລວມ 19,95 ຕື້ກີບ ແລະຊໍາລະຜ່ານມາ 11,71 ຕື້ກີບ ແລະຊໍາລະໃນປີ 2020 ຈໍານວນ 7,35 ຕື້ກີບ, ໂຄງການທີ່ຈັດຕັ້ງປະຕິບັດໜ້າວຽກສໍາເລັດ 100% ແລະສືບຕໍ່ຊໍາລະ 125 ໂຄງການ ມູນຄ່າ 1.848,75 ຕື້ກີບ, ຊໍາລະແລ້ວ 416,75 ຕື້ກີບ ແລະຍັງຄ້າງຊໍາລະ 1.428,99 ຕື້ກີບ.

  ການລົງທຶນຂອງເອກະຊົນພາຍໃນ ແລະຕ່າງປະເທດປີ 2020 ໄດ້ເຊັນບົດ ບັນທຶກຄວາມເຂົ້າໃຈ (MOU) 13 ໂຄງການ, ຄົ້ນຄວ້າເຊັນສັນຍາສໍາປະທານ 1 ໂຄງ ການ, ປະຈຸບັນມີໂຄງການສໍາປະທານທັງໝົດ 11 ໂຄງການ, ມູນຄ່າ 2.125 ຕື້ກີບ ຫຼືປະມານ 240,15 ລ້ານໂດລາ ແລະກິດຈະການທົ່ວໄປທີ່ໄດ້ຮັບແຈ້ງຂຶ້ນທະ ບຽນວິສາຫະກິດມີທັງໝົດ 19 ຫົວໜ່ວຍ ໂດຍມີມູນຄ່າທຶນຈົດທະບຽນທັງໝົດ 495,19 ຕື້ກີບ.

ທຶນຊ່ວຍເຫຼືອ (ODA) ມີ 8 ໂຄງການ ໃນນັ້ນຂະແໜງສາທາລະນະສຸກ 6 ໂຄງການ, ຂະແໜງໂຍທາທິການ ແລະຂົນສົ່ງ2 ໂຄງການ (ກໍາລັງຢູ່ໃນຂັ້ນຕອນປະກອບເອກະສານ, ສຶກສາສໍາຫຼວດຂໍ້ມູນ ແລະສະເໜີທຶນສົມທົບຈາກລັດຖະບານລາວ); ໂຄງການຊ່ວຍເຫຼືອ 2 ຝ່າຍ ລາວ-ຫວຽດນາມມີ 5 ໂຄງການໃນນັ້ນ: ກໍາລັງຈັດຕັ້ງປະຕິບັດ 3 ໂຄງ ການ ແລະ 2 ໂຄງການ ກໍາລັງຢູ່ໃນຂັ້ນຕອນຜ່ານແບບ ແລະ ແກ້ໄຂຜົນກະທົບຄື: ໂຄງການກໍ່ສ້າງໂຮງໝໍແຂວງໄຊສົມບູນ ແລະ ໂຄງການກໍ່ສ້າງຊົນ ລະປະທານ 4 ແຫ່ງ ແຂວງໄຊສົມບູນ.

 ຫຼັງຈາກນັ້ນ ທ່ານ ພັນຄຳ ວິພາວັນ ກໍໄດ້ເປັນກຽດໃຫ້ທິດຊີ້ນຳກອງປະຊຸມຊຶ່ງກ່ອນອື່ນທ່ານໄດ້ຍ້ອງຍໍຊົມເຊີຍທີ່ຄະນະຮັບຜິດຊອບ ແລະການນຳແຂວງຈັດຕັ້ງປະຕິບັດວຽກງານ 1 ປີຜ່ານມາ ຢ່າງມີໝາກຜົນສຳເລັດໃນຫຼາຍດ້ານໂດຍສະເພາະແມ່ນວຽກງານກໍ່ສ້າງຮາກຖານການເມືອງແນວຄິດ, ການປ້ອງກັນຊາດ-ປ້ອງກັນຄວາມສະ ຫງົບ ແລະ ດ້ານເສດຖະກິດ-ສັງຄົມ ກໍໄດ້ຮັບການພັດທະນາໃຫ້ສືບຕໍ່ຂະຫຍາຍຕົວຢ່າງຕໍ່ເນື່ອງສ່ວນໃນຕໍ່ໜ້າທ່ານໄດ້ຊີ້ນຳເນັ້ນໃຫ້ເອົາໃຈໃສ່ຕື່ມຫຼາຍບັນຫາເປັນຕົ້ນແມ່ນສືບຕໍ່ຮັດແໜ້ນຄວາມສາມັກຄີຂອງການນຳໃນການຊີ້ນຳໆ ພາປະຕິບັດວຽກງານ, ຍົກສູງຄວາມເປັນເຈົ້າການໃນການນຳພາຄະນະພັກທຸກຂັ້ນ, ສຶກສາອົບຮົມການເມືອງແນວຄວາມຄິດຂອງປະຊາຊົນໃຫ້ເຂົ້າໃຈຕໍ່ແນວທາງນະໂຍບາຍພັດທະນາຂອງພັກ-ລັດ ແລະ ຄວາມເປັນແບບຢ່າງໃນການຈັດຕັ້ງນຳພາຂອງພະນັກງານ-ລັດຖະກອນ ແລະວຽກງານອື່ນໆອີກຈຳນວນໜຶ່ງ.

แชร์