ທຫລ ແລະສະຫວັນ ພົບປະຫາລືວຽກງານ

  ໃນວັນທີ 15 ທັນວາ 2020; ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ (ທຫລ) ພ້ອມຄະນະໄດ້ເຂົ້າຢ້ຽມຂໍ່ານັບ ແລະປຶກສາຫາລືວຽກງານກັບທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດທີ່ຫ້ອງວ່າການປົກຄອງແຂວງດັ່ງກ່າວ, ພ້ອມນັ້ນ, ຍັງໄດ້ເຄື່ອນໄຫວເຮັດວຽກຢູ່ເຂດເສດຖະກິດພິເສດສະ ຫວັນນະເຂດ ແລະ ຍັງໂອ້ລົມ, ພະນັກງານ ທຫລ ພາກກາງແຂວງສະຫວັນນະເຂດ-ບັນດາທະນາຄານທຸລະກິດຊຶ່ງໄດ້ມີການຕ້ອນຮັບຢ່າງອົບອຸ່ນຈາກພາກສ່ວນດັ່ງກ່າວ. 

   ສຳລັບການເຂົ້າຢ້ຽມຂໍ່ານັບທ່ານເຈົ້າແຂວງສະຫວັນນະເຂດ, ທ່ານຜູ້ວ່າການ ທຫລ ຍັງແຈ້ງສະພາບການມາເຄື່ອນໄຫວເຮັດວຽກຢູ່ແຂວງສະຫວັນນະເຂດ, ພ້ອມນັ້ນຍັງໄດ້ປຶກສາຫາລືວຽກງານຕ່າງໆທີ່ປິ່ນອ້ອມວຽກງານຂອງຂະແໜງການທະນາຄານ ແລະສະຖາບັນການເງິນຈຸລະພາກຢູ່ແຂວງສະຫວັນນະເຂດໂດຍລວມແມ່ນດີສາມາດດຳເນີນທຸລະກຳການເງິນດ້ວຍບັນຍາກາດທີ່ດີ, ຕັ້ງໜ້າ ຊຶ່ງນຳໃຊ້ແຫຼ່ງທຶນທະນາຄານ ແລະສະຖາບັນການເງິນຈຸລະພາກປະ ກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງເຮັດໃຫ້ຊາວ ແຂວງສະຫວັນນະເຂດ ມີຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ, ທາງດ້ານທ່ານເຈົ້າແຂວງສະຫວັນນະເຂດກໍໄດ້ຕີລາຄາສູງຕໍ່ບົດບາດຂອງທະນາຄານໃນການສະໜອງສິນເຊື່ອໃຫ້ແກ່ປະຊາຊົນບັນດາເຜົ່າຊາວແຂວງສະຫວັນນະເຂດໃນນີ້ໄດ້ສະໜອງສິນເຊື່ອໃຫ້ຜູ້ປະກອບການໄດ້ມີທຶນຮອນເຂົ້າໃນການຜະລິດ,ທຸລະກິດ ແລະການບໍລິການຕາມແນວທາງຂອງພັກ ແລະລັດຖະບານ; ຄຽງຄູ່ກັນນັ້ນ, ກໍ່ໄດ້ສະເໜີໃຫ້ຂະແໜງການທະນາຄານສືບຕໍ່ປັບ ປຸງ ໜ່ວຍບໍລິການຢູ່ບາງທ້ອງຖິ່ນໃຫ້ກ້ວາງຂວາງ ແລະທົ່ວເຖິງ.

 ສະເພາະຢູ່ເຂດເສດຖະກິດພິເສດສະຫວັນນະເຂດ,ທ່ານຜູ້ວ່າການ ທຫລ ຍັງໄດ້ຮັບຟັງການລາຍງານສະພາບການເຄື່ອນໄຫວວຽກງານຢູ່ເຂດດັ່ງກ່າວຈາກທ່ານ ທອງໃສ ໄຊຍະວົງຄຳດີ ຫົວໜ້າເຂດເສດຖະກິດພິເສດສະຫວັນນະເຂດທີ່ມີພາລະບົດບາດສຳຄັນໃນຂົງເຂດເສດຖະກິດຂອງຊາດຊຶ່ງໃນຜ່ານມາສາມາດຍາດໄດ້ຜົນສຳເລັດໃນຫຼາຍດ້ານ ແລະໃນຂະນະດຽວກັນຍັງຍົກໃຫ້ເຫັນດ້ານພົ້ນເດັ່ນ, ຂໍ້ຄົງຄ້າງ-ຂໍ້ຫຍຸ້ງຍາກ ແລະບັນຫາທ້າທາຍໃນຜ່ານມາ ແລະໃນຕໍ່ໜ້າ; ຈາກນັ້ນຄະນະຂອງທ່ານຜູ້ວ່າການ ທຫລ ຍັງໄດ້ໄປຢ້ຽມຢາມບັນດາໂຮງງານ ແລະສະຖານທີ່ປະຕິບັດໜ້າທີ່ວຽກງານຂອງພະນັກງານ-ລັດຖະກອນຢູ່ເຂດດັ່ງກ່າວ.

  ໃນຕອນແລງຂອງວັນດັ່ງກ່າວ, ຢູ່ສຳນັກງານສາຂາ ທຫລ ພາກກາງແຂວງສະຫວັນນະເຂດໄດ້ຈັດໃຫ້ມີກອງປະຊຸມໂດຍໄດ້ຮັບຟັງການລາຍງານສະພາບການພົ້ນເດັ່ນ ແລະຂໍ້ຄົງຄ້າງພ້ອມທັງຄຳສະເໜີໃນຂອງຫົວໜ້າສາຂາ ທຫລ ແລະບັນດາສາຂາ-ໜ່ວຍບໍລິການທະນາຄານທຸລະກິດໃນຜ່ານມາຊຶ່ງທ່ານຜູ້ວ່າການ ທຫລ ຍັງໃຫ້ກຽດໂອ້ລົມ-ຊີ້ນຳວຽກງານແກ່ພະນັກງານທະນາຄານ ທຫລ ພາກກາງແຂວງສະຫວັນນະເຂດ ແລະບັນດາທະນາຄານທຸລະກິດທີ່ທຳທຸລະກຳການເງິນຢູ່ແຂວງສະຫວັນນະເຂດທີ່ໄດ້ດຳເນີນຢ່າງມີຜົນດີແລະຍັງຮຽກຮ້ອງໃຫ້ທຸກຄົນຈົ່ງເສີມຂະຫຍາຍຜົນງານທີ່ຕັ້ງໜ້າ, ແກ້ໄຂບັນຫາອ່ອນ, ຂໍ້ຄົງຄ້າງໃນຜ່ານມາໂດຍສະເພາະຕ້ອງມີຄວາມສາມັກຄີເປັນເອກະພາບ, ມີຄວາມຊື່ສັດ, ປະຢັດ, ເຮັດໜ້າທີ່ຂອງຕົນດ້ວຍຄວາມຮັບຜິດຊອບສູງ, ແກ້ໄຂບັນຫາຕ່າງໆທີ່ຕິດພັນກັບສາຂາ-ໜ່ວຍບໍລິການຂອງຕົນໃຫ້ມີຫຼຸດລົງ, ມີຄຸນນະພາບ ແລະປະຕິບັດລະບຽບກົດໝາຍຢ່າງເຂັ້ມງວດ.

-------------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

• 16/12/2020